الحب لا يموت

الجزء 30

"السلام نسمة، نتمنى تكوني بألف خير، معرفتش علاش مباغاش تجاوبي على المكالمات ديالي، ربما مباغاش تهضري معايا و ربما تكوني حشمانة من قبيلة واخا مكاين لاش تحشمي، أنا غدا فالصباح غادي ندوز على داركم باش ندي شهد و من تما غادي نمشي للمطار، مكرهتش نتلاقاك عندي شي هضرة مهمة نقولها ليك، أنا غادي نمشي لفرنسا و مباقيش غادي نرجع للمغرب، غادي نتوحشك بزاف، و راكي فمتابة ختي الصغيرة، و متنسايش را"........كانت تتقرا و عينيها تغرغرو بالدموع حتا مبقاتش تتشوف الكتابة و مقدراتش تكمل، لاحت التليفون و جلسات تتبكي و شهد و ميسم مفاهمين والو، ميسم : مالكي شنو قاليك، شوفي فيا قوليليا شنو كاين واش شي حاجة خايبة؟ شهد : حبيبة متبكيش عافاكي، نسمة : صافي مشا مباقيش ايرجع، علاء ايمشي و يخليني، غدا غادي لفرنسا و مباقيش ايجي عاود، كنت عارفاها، هو حاسبني غير فمتابة ختو الصغيرة و صافي، اهئ اهئ اهئ، انبان ليه دبا غير برهوشة، شهد : لا ميمكنش ميمكنش يدير فحال هكا، واخا يكون خويا ولكن انت صحبتي، انا غنصوني عليه نعرف مالو، نسمة : لا لا متصونيش، منزييدش نتشوه كثر، ميسم : ناااري مصدقش والله مسحابلي أيكون هكا، واش هدشي اللي قاليك صافي؟ نسمة : قال شي حاجة اخرى ولكن مقدرتش نكمل، شنو ايقول كاع، ايودعني و يقوليا طهلاي فراسك اهئ اهئ، ميسم : آري نشوف، نسمة : هاكي.......قرات نسمة الميساج كامل و هي طلق واحد الضحكة بقاو غير تيشوفو فيها، نسمة : مالكي؟ ميسم : ههههه شدي شدي قراي، نسمة : مبغيتش نتفقص، صافي انمسحو من حياتي و غنساه مع الوقت، ميسم : قلت ليك شدي قراي........مسحات عينيها من الدموع و شدات التلفون تكمل الميساج نسمة "......غادي نتوحشك بزاف، و راكي فمتابة ختي الصغيرة، و متنسايش راكي اتبقاي ديما فبالي و عمري نساك، و بغيت نقوليك من هاد المنبر نوضي غسلي خنونتك و بقاي تقراي كلشي حيت متأكد 100% غتقراي غير النص ولا متكمليهش كاع و غتجلسي دمعي، را مكاين لا ختي لا زعلولة، را غنمشي على قبل شي خدمة و انرجع الشهر الجاي و لا قبل كاع حيت انتوحشك بزاااف و مغنصبرش ندوز هاد المدة كلها بلا بيك، و غدا باغي نشوفك قبل منمشي مكرهتش نتلاقاو و نقوليك شي هضرة......تنبغيك ولكن متقوليها لحتا واحد 3> " قراتو و عاودات قراتو كثر من عشرة المرات و هي ممصدقاش شنو تتشوف، نسمة : ميسم شفتي شفتي شنو قال، ناري لا انا غنسخف ليكم هنا، قيسي قلبي قرب يسكت، ميسم : نااري و الله إيلا قلبك تيضرب بزاف، شهد : الحب هداك، نسمة : ياااي و أخيرا......بقات تتنقز فحال الحمقة و تدور حتا طاحت من فوق الناموسية، ميسم : نسمة واش لاباس واش تقسحتي بزاف؟ نسمة (تضحك) : هههههه والله ماحاسة بشي حاجة من غير الفرحة، ميسم : هبيلة، مكانش يسحابليا الحب تيدير هدشي كامل، نسمة (غوبشات) : ولكن....ميسم : مالكي ياك يالاه كنتي غطيري بالفرحة؟ نسمة : ولكن هو ايمشي، ميسم : و ايرجع، نسمة : ولكن شهر كامل، منتحملش، ميسم : بيناتكم التلفون، نسمة : لا لا من بعد هدشي كامل وليت تنحشم نشوف حتا فتصويرتو عاد نهضر معاك، ميسم : ايوا معندك مديري، نسمة : و حاجة اخرى، ميسم : شنو هي؟ نسمة : شنو فنظرك ايقوليا غدا؟ ميسم : والله معرفت، أيكون باغي غير يشوفك قبل ميسافر، نسمة : والله معرفت، شهد نعسات، ميسم : آه مسكينة عيات، يالاه حتا حنا نعسو و غدا يصبح و يفتح، نسمة : واخا تصبحي على خير، ميسم : و أنت بألف خير
و صبح الصباح، نهار جديد، نسمة غير شافت الضو يدا تيطلع و هي تفيق ميسم و شهد، أما هي كاعما نعسات الليل كامل و هي تتحلم بعلاء و تتفكر فالهضرة المهمة اللي ايقوليها و كل مرة تقرا داك الميساج و تجلس تضحك غير بوحدها، ميسم : شحال فالساعة، نسمة : را الستة دبا مشا الحال، ميسم : الستة، واش ضربك حمار الليل ولا شنو، انا انرجع نعس حتال العشرة و فيقيني، نسمة : لا حرام عليك والله، نوضي بغيت نقاد راسي قبل ميجي علاء، ميسم : آآآآه القضية فيها علاء و أنا نفهم، نسمة : يالاه نوضي، يالاه ندوشو بجوجنا شحال مدرناها، ميسم : ههه واخا غير زيدي، شهد : صباح الخير، نسمة و ميسم : صباح النور ياكما فيقناك بصداعنا، شهد : لا أنا أصلا تنفيق بكري، نسمة : حنا داخلين للدوش، شهد يالاهي معانا حتا انت، شهد : هههه شنو، ميسم : آه والله حتا تكون واعرة، شهد : ولكن، نسمة : الدوش كبير يكفينا كاملين، حتا إذا دخلت انا و علاء و انت و سيف و ميسم و حمزة اتبقا بلاصة للطيابة و مولات السطولا و تشيط البلاصة كاع، ميسم : دبا حنا كاملين اندوشو مع بعضياتنا ياكي، نسمة : اه "سحابليها واش عليهم هوما بثلاثة" ميسم : أنا و انت و شهد و علاء و حمزة و سيف ياكي، نسمة (ولات حمرا) : لا لا لا القصد ديالي حنا بثلاثة هداكشي قلتو غير باش نبين را الحمام كبير، ميسم و شهد : هههههه