الحب لا يموت

الجزء 62 و الأخير 👪

داز أسبوع جات فيه ميسم و حمزة و الحاج و الحاجة و شهد للمغرب تلاقاو بنجاة و تعرفو عليها و علاء تعرف على خوتو و حتا هوما، كان كلشي زوين كلشي فرحان و علاء طول ديك المدة و هو تيحزر ف شهد خافتو لا ميبقاش معاهم، و كان حاط نسمة فوق راسو و كل مرة يخرجها و يشري ليها كان متحمس بزاااف، الفنكوش زيد كبر و بدا تينوض السنينات، و مراد و صفاء فرحو بزاف فاش تجمعات العائلة عاود، السي حمد من ورا ما خلاتو نورة تأزم بزاف و مرض شد الفراش، و هوما بالطبع ما قدروش يتخلاو على باباهم حيت تيبقا الأب ديالهم فجميع الأحوال، مشاو لعندو فاش شافوه نسمة ما قدراتش تشد دموعها من البكا، عنقاتو و بقات تتبكي و هو تيطلب منهم السماحة، تسامحو معاه و تصافاو القلوب و رجع كلشي حسن من الاول.......دازو ثلاثة أشهر نسمة بدات كرشها تتكبر و عرفو بأن عندهم بنت علاء كان طاير بالفرحة، نسمة : علاء شنو نلبس حسن هادي ولا هادي؟ علاء : حتا وحدة فيهم، هاكي لبسي هادي، نسمة : حرام عليك عرس خويا خليني نبان شوية، علاء : ولكن دكشي اللي وريتيني معيق، نسمة : اويلي ياك بجوج طوال و سامبل آش بغيتي؟ علاء : المشكلة واخا تلبسي اللي لبستي غاتباني توتة، مبغيتش شي واحد يبقا مطول فيك الشوفة، نسمة : هههه وا لاواه هادي كلها غيرة، آجي بعدا أنت اللي الكومبلي و الروايح مالك على هدشي كامل، علاء : إيوا را عندي أخت وحدة نهار عرسها خصني نبان مفركس زعما، نسمة : لا لبس جلابة و دير القب عينيك منبغيهمش يبانو أنا عارفة البنات عينيهم زايغين يبقاو يشوفو ليا فيك و أنت عاطي العين من بعيد، نسمة : ويتك على الحب تتغير، صافي شفتي شنو، لبسي اللي بغيتي و خليني أنا لابس....."من بعد 5 دقايق لقاها تتبكي" علاء : اويلي مالكي تتبكي، نسمة : بجوجهم ما جاونيش اهئ اهئ، علاء : إيوا حيت الكريشة تتكبر، بنتي باغا تكبر دغيا و تجي تونسنا، نسمة : و أنا شنو نلبس، ميسم : هههه أنا نعطيك ما تلبسي غير كوني على خاطرك، نسمة : ههههه.....لبسو تكاشطهم و مشاو للقاعة كانو الناس عاد تيجيو، دخلو مقابطين و جلسو فجناح العائلة، داز عرس ولا أروع شهد جات تتحمق و سيف حتا هو، كلشي كان زوين ما كمل العرس حتا كان كلشي تيهضر غير عليه، شهد تفارقات مع الحاجة بالبكاء و مشات دوز شهر العسل مع سيف فسويسرا كانت هاديك هي الرغبة ديالها، قررو نسمة و علاء و حمزة و ميسم و الحاجة و الحاج يستقرو فالمغرب، علاء و حمزة نقلو المشاريع تاعهم لهنا و سكنو حدا بعضهم، و حتا الحاجة مينا و الحاج كانو قراب ليهم، و نجاة سكنات مع نسمة و علاء بناءا على الطلب تاع نسمة اللي ما بغاتش تفارقها، و ميسم تكفلات ب باباها ترعاه حيت مريض و بغات تبقا معاه، من بعد مدة ساقو الخبار را أسامة دار كسيدة تشلل بسبابها و ما بقاش قادر يتحرك و نورة خسرات عليه كاع فلوسها و تأزمات لحالهم، ما كانوش باغيين يصيبهم دكشي ولكن ربي تيجازي كل واحد بأفعالو، و عرفو باللي هو اللي كان استدرج علاء و طمعو يلقا عائلتو هادي شحال باش ياخد منو فلوسو كلشي تصدم من أفعالو..........
ديك الليلة ناضت نسمة تتقطع بالوجع فيقات علاء بالغوات كانت غادي تولد، ناض مقلوب و مخلوع داها هو و نجاة للطبيب هو كان لابس غير بيجاما عينيه مقلوبين و كلو دايخ، بقاو تيتسناو حتا خرج عندهم الطبيب : مبروك عليك، يمكن ليك تدخل تشوفها، فاش دخل مشا عند نسمة باسها و مشا عند بنتو كانو عاد غسلو ليها و لبسوها، كانت صغيورة و فنيونة، هزها بين دراعو و طاحت دمعة من عينو، أذن ليها فودنها و عطاها لنسمة ترضعها.....الغد كان كلشي فالغرفة مجموع عليها تيبوسو فيها و تيباركو ليهم، بعد أسبوع دبحو ليها و دارو سبوع كيداير كلشي كان فرحان، سماوها بسمة حيت دخلات بحال الملاك رسمات البسمة على وجوههم........دازو أيام كلها سعادة و فرح و بسمة تتكبر قدام عينيهم، ولات تتمشى شوية و تتخرج كليمات، كانت زويونة بزاف عويناتها زيتيين و بلقة فحال ماماها و شعرها أسود كثيف و عندها غمازات فحال باباها، كانو مفششينها بزاااف و متيخصروش ليها خاطرها فمرة و هي كانت متعلقة بيهم، ميسم ما بغاتش تحمل دبا قالت ليك مزالا باغا تعيش الحياة ما بغاتش تقيد بالحمل و الاولاد هههه واخا حمزة مشوق ليهم بزاااف ولكن صابر ليها و لحماقها.......علاء : نسمة عندي ليك واحد المفاجأة، نسمة : شنو هي شنو قول ليا دغيا، علاء : وا خليك تشوقي شوية، نسمة : وا عافااااك، علاء : هههه والو الصبر معندكش، نسمة : راك عارفني، ماشي عاد تزوجنا، علاء : هاكي حليها غادي تلقاي فيها واحد الحاجة.....حلات الظرف لقات فيه جوج تذاكر سفر للعمرة تاع رمضان، فرحات بزاف كانت أفضل هدية ممكن تجيها، عنقاتو و فرحات بزاف، فاش جا الوقت وجدو الأمتعة ديالهم و خلاو بسمة مع الحاج و الحاجة و نجاة و شدو الطيارة للسعودية.......دوزو مناسك العمرة فأجواء رمضانية زوينة بزاف و تقربوا أكثر لبعضهم، كانو أيام أحلى من العسل، فاش رجعو نسمة التازمات بالحجاب عن قناعة و ميسم غارت منها و دارتو حتا هي و دارت عقلها هههههه، و كانت هادي هي النهاية كلها سعادة و فرح و حب و قولو ليا على سلامتك هههه شحفتكم معايا.......تسناوني فقصة أخرى قريب إن شاء الله ♡