الحب لا يموت

الجزء 5

حسات بشي يد تحطات على راسها و هي تقفز من الخلعة و تفاجئات فاش لقاتو نفس الشاب ديال ديك النهار، بقات تتشوف فيه و الدموع نازلين من عينيها و هو تيشوف فيها بحالا تيتسناها تقول شي حاجة، مسحات عينيها و قالت : انت عاود ! و أخيرا نطق و سمعات صوتو، جاوبها بابتسامة : اه علاش تعجبتي؟ كان صوتو رجولي زوين و حنين، هي : شكون أنت؟ هو : و علاش باغا تعرفي؟ هي : خصني نعرف را هادي ثاني مرة نتلاقاو فيها، هو : ماشي ثاني مرة، شفتك شحال من مرة قبل، و هضرت معاك، نسيتي نهار تلاقينا فالريسطو، كنتي ضاحكة و فرحانة، معرفتش علاش تتبكي دابا .
"كانت باغا تقوليه راه هضر مع ختها ماشي معاها، ولكن فضلات متسرعش و تخلي حتا يجي الوقت المناسب، كتافات بالصمت و رجعات تتشوف فالمنظر اللي قدامها و عقلها ماشي معاها، مرة مرة تتخطف فيه الشوفة بلا ميعيق بيها، تتلقاه ساهي حتا هو ....كانت تتشوف فيه بنص عين حتا دار شافيها بالزربة و هي مركات معرفات مدير، هو : حصلتك! بلا متبقاي تشوفي فيا بنص عين، هي : لا ماشي هاكاك، هو : عارف راسي زوين، هي : مالك حاس براسك ، هو : ماشي حاس براسي را تنقول غير دكشي اللي كاين، هي : شكون كذب عليك؟ هو : كلشي، هي (جمعات الوقفة) : بفف مكانش يسحابلي حاس براسك فحال هاكا، هو : دابا لكنت خايب و قلتها غنتسمى صريح ولا كنت زوين و قلتها غنتسمى مغرور و حاس براسي، فين هو اللوجيك؟ هي : عرفتي شنو، هانا مشيت بالسلامة....خلاتو و زادت و هي تتعاير فيه مع راسها "مغرور...متكبر، حاس براسو و عاجبو زينو، معياق، كتبان فيه ضريف، المظاهر خداعة تلقاه حتا هو غير ولد الفشوش" بقات غادة تتخبط فرجليها و نسات الموضوع ديال أسامة محسات براسها حتا وصلات للدار....دازو دوك الأيام عادية، كانت تتقضي وقتها مع ختها ما بين الخدمة و الدار و مرة مرة تيخرجو بجوج، كانت تتحاشى تلاقا بأسامة و البلاصة اللي يكون فيها تتخويها .
فاقت داك الصباح بكري و خرجات باش تمشى فحال كل أحد، مراد : ميسم ميسم تسناي، دارت نسمة بان ليها خوها مراد، نسمة : مراد صباح الخير، مراد : صباح النور، هز شعرها على عنقها و بانت ليه السنسلة اللي تديرها نسمة دائما فيها حرف N كانت شراتها ليها ماماها فاش تولدات هي و ميسم باش تفرق بيناتهم، ميسم نهار ماتت ماماها حيداتها و خباتها فواحد الصندوق فبيت الخزين فالفوقي، أما نسمة مبقاتش حيداتها حيت تتفكرها بيها، مراد : اه نسمة كنت تنقلب عليك، نسمة : تتقلب عليا؟ (ابتسمت) شنو بغاني خويا حبيبي؟ مراد : خارجة تمشاي، نسمة : اه، مراد : نمشي معاك ولا تبغي تبقاي بوحدك؟ نسمة : يا فرحاتي تمشي معايا شكون فحالي، مراد : هه ايوا يالاهي قبل ميسخن الحال، أصلا شحال مخرجنا بجوج...بقاو تيتمشاو فالطبيعة و تيهضرو، كانو منساجمين و فرحانين، أصلا نسمة و مراد واخا فارق السن بيناتهم كبير شوية *9 سنين* إلا أنهم مفاهمين بزاف حيت الشخصيات ديالهم متشابهة، و فوقما تيكون عند شي واحد منهم شي مشكل تيجي يعاودو للآخر، هضرو على الخدمة و العائلة و هضرو حتا على الشركة، هضرو و هضرو حتا ضارت الهضرة و وصلات لباباهم سي حمد، نسمة : خويا مراد قوليا، واش باقي بابا تيتعامل معاك خايب؟ مراد : امم لا علاش؟ نسمة : شوفيا، لا تتكذب، مراد : بابا را ماشي تيتعامل معايا خايب غير هو باغيني نكون فواحد الصورة و أنا مقدرتش نوصل ليها، نسمة : انا عارفاه تيضغط عليك بزاف، لا من ناحية الخدمة ولا من ناحية....(كانت غتقوليه ولا من ناحية الموضوع ديال الحفيد حيت باقي ربي مسهلش عليه بالولاد ولكن سكتات حيت هاد الموضوع حساس بالنسبة ليه) مراد : ولا من ناحية الحفيد، مغيتهناش حتا يطلقنا، نسمة : لا متقولش هاكاك، مراد : انت عارفة بابا كيمداير، من نهار تزوجنا و هو باغينا نولدو، ولكن مكتبش الله، نسمة (شدات ليه فيديه) : أنت شخص مزيان و قلبك بيض مكتآذي حتا واحد، ربي كبير ميخيبكش، مراد : عندك الصح ربي كبير :) نسمة : مراد نسولك؟ مراد : سولي، نسمة : أسامة واش مبقاش ايرجع لفرنسا عاود؟ مراد : أسامة استقر هنا، راه ولا شريك معانا فالشركة، نسمة (بحزن) : اه صافي، مراد : اه حقا فكرتيني، نهار الثلاثاء اتجي خالتي نورة من فرنسا و غادي دوز عندنا، نسمة (تتهضر و هي معاجباهاش الحال حيت لا أسامة ولا ماماه متيبغيو يتسرطو ليها) : ديك العقروشة غتجي حتا هي، مراد : ههه سكتي راها كبر منك، نسمة : مالك واش كذبت؟ أنا بعدا جنوني متيحملوهاش، مراد : ولكن انت راكي عزيزة عليها، نسمة : امم عزيزة عليها، هاديك را أكبر منافقة على وجه الأرض، مراد : حتا أنا معنديش معاها بزاف ولكن الواحد ضروري يتعامل معاها بالصواب، نسمة : امم صافي .