الحب لا يموت

الجزء 51

الغد فاقت نسمة على صوت الدقان فالباب، نسمة : شكون؟ علاء : هذا أنا حلي، مشات حلات ليه و هي مقلوبة بالنعاس و شعرها كلو مرون هو شافها بقا حابس الضحكة، نسمة : صباح الخير، علاء : هههه صباح النور، عاد فقتي، نسمة : امممم، علاء : النعاسة، يالاهي دغيا را مزال عندنا شلا ما يدار، شافت فالساعة لقاتها عاد 07:15، نسمة : مزال الحال علاش مفيقني دبا! علاء : وا دغيا بغيت نخرجك يالاهي حيدي منك العكز لبسي دغيا و يالاهي معايا، نسمة (بقات تتشوف فيه عاد قالت) : اوووف هانا جايا......خدات دوش بالزربة و لبسات اللي لقاتو قدامها و جمعات شعرها حيت مزال فازك و هزات مونطو فيديها و هبطات لقاتو تيتساينها، ركبو فالطونوبيل و بقاو غاديين و هي تتكمع، علاء : مكانش يسحابلي أنت نعاسة لهاد الدرجة، نسمة : را ماشي قضية نعاسة و لكن را عندي خصاص فالنعاس و مع العيا الواحد تيبغي يرتاح شوية، علاء : إيوا أنا غادي نحيدو منك، طلق ليها الأغنية اللي تتعجبها و هي غير سمعاتها ناضت تتغني و تشطح معاها دغيا طار منها النعاس و هو تيشوف فيها فرحان، وصلو للمدينة و نزلو قبطات ليه فيديه و بقاو غاديين تيتمشاو فداك الصباح و الجو زوين بزاف، مشاو لواحد الكافي و كومونداو الفطور و بقاو تيهضرو واخا مكانتش شي هضرة مهمة ولكن غير حيت مع بعضياتهم مكرهوش متسالاش، فاش سالاو خرجو مشاو للمول و بقاو تيختارو ليها الحوايج فالاشكال و الأنواع، خداو صيكان و سباسط و عطور و اكسسوارات أي حاجة عجباتها متيقولش ليها لا، من بعد مشاو تيختارو الماكياج علاء ما كان تيفهم والو فدكشي و هي تتوريه كل حاجة لاش تتصلاح و هو غير معجب، داو دكشي للطونوبيل و كملو المساريا ديالهم من بعد مشاو لواحد الريسطو تغداو و كملو المسارية ديالهم حتال الليل وقفو قدام واحد المحل كبير تاع الذهب و المجوهرات، جر ليها بيديها و دخلو، علاء (تيهضر مع مول المحل) : عافاك بغيت شي خواتم تاع الخطوبة تكون شي حاجة زوينة و عاد خرجات، مول المحل : هي اللولة، نسمة بقات غير تتشوف ما فهمات والو، علاء : مالكي مصدومة واش جاتك شي حاجة عجب! نسمة : آه، لا، شوية، هههه معرفتش جيتيني على غفلة، علاء : آجي اختاري الموديل اللي عجبك، جبد ليهم السيد بزاف ديال الخواتم كانو كلهم زوينين نسمة احتارت شنو تاخد، بقاو تيتخيرو و يتحيرو فالاخير خدات واحد الخاتم فيه حجيرات زوين بزاف و حتا علاء خدا واحد، عاد رجعو، كانت ميسم خارجة مع حمزة هوما تعشاو و خرجو للجردة بقاو تما حتا عياو و رجعو كل واحد فبلاصتو .
دازو أيام على هاد المنوال حتا جا نهار الحناء، صايبو ليهم و دارو ليهم الماكياج و لبسو بجوج قفاطن فالاخضر غير الشكل اللي مختلف جاو تيحمقو وحدة تنسيك فالأخرى، نقشو ليهم يديهم ورجليهم على الغناء والزغاريد و دازت ديك العشية كأجمل ما يكون، الغد جات الكوافورة قادات ليهم و لبساتهم طلعو فنات، دارت ليهم مكياج ثقيل زادهم جمال على جمال، ميسم لبسات تكشيطة فالابيض جات فحال شي أميرة، وميسم فالابيض و الفضي، هبطات ليهم الزيف على وجههم و هبطو من الدروج بالزغاريد حتا وصلو للصالون فين كان جالس حمزة و علاء و حداهم العدول و كانت الحاجة مينا مامات علاء و لالا حسناء مامات حمزة جالسين حدا بعضهم و الفرحة ما قاداهمش، وطبعا شهد اللي ليوم من أسعد أيام حياتها، فرحانة بخوها علاء حبيب قلبها، و لخوها حمزة، و صحاباتها و خواتاتها و حبيبات قلبها نسمة و ميسم، علاء و حمزة ما هبطوش عينيهم عليهم، كل وحدة جلسات حدا مكتوبها و فاش سكت الغناء و كلشي نطق العدول : بسم الله الرحمن الرحيم و الصلاة و السلام على أكرم المرسلين سيدنا وحبيبنا محمد صلى الله عليه وسلم، هاد النهار نهار ديال الخير جمعنا ربي فهاد المجلس الكريم باش نربطو بين هاد الناس فالحلال إن شاء الله، نبداو على بركة الله، السيد حمزة ولد يوسف ولد علي، واش قابل تزوج بميسم بنت حمد ولد عمر على سنة الله و رسوله بلا إكراه ولا ضغط ديال حتا واحد؟ حمزة : آه قابل، العدول : ميسم بنت حمد ولد عمر، واش قابلة تزوجي بالسيد حمزة ولد يوسف ولد علي، على سنة الله و رسوله بلا إكراه ولا ضغط ديال حتا واحد؟ ميسم : آه، آه قابلة، فاش قالتها كلشي بدا تيضحك حيت المفروض غادي تحشم و تبقا ساكتة ساعا هي كانت زربانة مقدراتش تصبر، عطاهم العدول سناو فالعقد من بعد قال : اعلنكما زوجا و زوجة، مبروك عليكم، كلشي بقا تيصفق و هي فرحانة بزاااف، حمزة هز الغطا على وجهها و باسها فجبهتها و داز العدول لعلاء و نسمة اللي واخا فرحانة و لكن متوترة بزاف، العدول : السيد علاء ولد عبد الصمد ولد صالح، واش قابل تزوج بنسمة بنت حمد ولد عمر على سنة الله و رسوله بلا إكراه ولا ضغط ديال حتا واحد؟ علاء : آه قابل، العدول : نسمة بنت حمد ولد عمر، واش قابلة تزوجي بالسيد علاء ولد عبد الصمد ولد صالح، على سنة الله و رسوله بلا إكراه ولا ضغط ديال حتا واحد؟ تما لسانها تشلل و مقدراتش تنطق بحتا كلمة، معرفاتش شنو وقع ليها يمكن حيت توثراث بزاف ولا خافت، بقاو دموعها تينزلو على يديها و تتحاول تكبتهم بز منها .
يتبع.............