الحب لا يموت

الجزء 42

فاش سالاو جابو الحطب و داروه فالموقد و شعلوه باش تدفا الدار، مشات نسمة جلسات حداه و بقات تتسخن يديها، جا جلس حداها علاء : الجو بارد، ياكي؟ نسمة : آه، علاء : ياكما فيك البرد، نسمة : لا، علاء : واش مقلقة؟ نسمة : لا عادي، علاء : لا مقلقة مقلقة، قوليلي مالكي، نسمة : مماليش، علاء : صافي على خاطرك، نسمة : أنا مشيت نعس، علاء : تصبحي على خير.......عطاتها رقية واحد البيت تنعس فيه حطات راسها و بقات تتبكي حتا سمعات الباب تحل و هي تغطي راسها و دارت فحالا ناعسة، علاء : نعستي؟ امممم واقيلا نعسات، انشوف.....بقا تيطل عليها و تيحيد الغطا و هي تتجرو عليها، هي تتجر و هو تيجر حتا غلبها، علاء : وي ربحت، نسمة : خليني نعس، علاء : شكون اللي مقلق مني شكون، نسمة : وا خليني، علاء : نسمة را هكا تديري فحال الدراري الصغار صافي كبري عقلك شويا، نسمة :هي أنا وليت برهوشة دبا ياك، إيوا صافي خليني، علاء : واش أنا قلت هكا؟ نسمة : علاش تدير معايا هكا، علاء : شنو درت؟ نسمة : لا مدرتي والو، علاء : وا لا دبا إلا مقلتيش ليا حتا إلا كنت خطئت مغنقدرش نصلح الخطأ ديالي، نسمة : تتقلقني أ علاء، دبا واش أنا ختك؟ علاء : وا غير فهمي، واش إلا قلت ليهم راكي ماشي ختي هوما غادي يتفهمو و غتجيهم عادي؟را غير اينويوها شي حاجة خايبة و صافي، و أنا منرضاش شي واحد يهضر عليك بالخايب، و بالخصوص ناس العروبية واخا نعياو نشرحو ليهم مغيفهموش، نسمة : صافي صافي، و متبقاش تغوت عليا، علاء : را حتا انا بغيت نرجع لدارنا و لكن هانتي تتشوفي معندنا منديرو، ميمكنش الناس مضايفينا عندهم و نبقاو مصدعينهم، نسمة : صافي، علاء : و باقا مقلقا مني؟ نسمة : لا، علاء : حلفي، نسمة : را قلت ليك، علاء : لا حلفي، نسمة : والله، علاء : لا قوليها كاملة، نسمة : ههههه وا والله ما مقلقة منك، يالاه سير خليني نعس، علاء : معندي فين نمشي غنعس هنا، نسمة : اويلي واش منيتك؟ علاء : ههه ايوا خالتي قالتليا انعطيك بيت نعس أنت و ختك، نسمة : يخوي ليك الضراس، علاء : خايبة، يالاه انا نصلي و نجي نرتاحو شويا بينما تنقص الشتا شوية باش نمشيو مع أنور، نسمة :  واخا سير
مشا صلا و فرش فالأرض باش ينعس و نسمة فوق الناموسية وصوت الشتا غادي و تيتزاد حتا ضرب البرق و هي تقفز من بلاصتها و مشات تخشات حداه، علاء : هههه خوافة، نسمة: تيخلعني، علاء : يالاه بقاي حدايا حتا يحبس و رجعي لبلاصتك، نسمة : واخا، عرفتي فاش كنت صغيرة كان ديما فاش تيكون الجو هكا تنمشي نعس حدا ماما و ميسم تتغير و تتجي تزاحم معانا، و تتبقا ماما تغني لينا حتا تنعسو، علاء : إيوا شفتي را عندك ذكريات زوينة، الله يرحمها و يوسع عليها، نسمة : بغيت نسولك، علاء : سولي، نسمة: تتبغيني ياك، علاء : لا، نسمة : لا وا جاوبني نيشان، علاء : راكي عارفة جوابي، نسمة : بغيت نسمعو، علاء : تنبغيك بعدد قطرات الندى، و بعدد حبات الرمل، تنبغيك فحال حب الأم لولدها، و فحال عشق قيس لليلى، تنبغيك فحالي عمري بغيت شي وحدة، تنحماق عليك القطيوطة ديالي، أنت زويونة بزاف، و قلبك حنين و رهيف، و مشاعرك صادقة، و بريئة، فحال شي صفحة بيضاء، نسمة : واعدني عمرك تخلى عليا، علاء : عمري نخليك، نسمة : عرفتي كنت ديما تنفكر فالشخص اللي ممكن شي نهار نبغي، فالمواصفات ديالو، علاء : و شنو هوما هاد المواصفات؟ نسمة : يكون ضريف و زوين و حنين، و فنفس الوقت شخصية، يكون تيبغيني و تيغير عليا، و يكون حمق و يقدر يدير معايا أي حاجة، نقوليه خرجني نتسارا مع الفجر يقولي لبسي و يالاه، يكون ضارب الدنيا بركلة و عايش الحياة، و نكونو صحاب كثر من أننا جوج تيبغيو بعضياتهم، نكون فمتابة اختو ميطمعش فيا ولا يبغيني على المصلحة، و يبين ليا انه تيبغيني ماشي غير هضرة، علاء : واو هدشي زوين، اممم و لقيتي هدشي ولا لا، نسمة : الواقع حسن من الأحلام، لقيت فيك كلشي، علاء : إيوا نقوليك حتا أنا، دكشي كلو اللي كنت تنتمنى لقيتو فيك، نسمة : بصح بصح، علاء : لا غير كذوب، نسمة (دفعاتو بشوية) : الحمق لاخر، علاء : هههههه، ياااه شوفي الثلج تيطيح، نسمة : وايلي انشوف، مشات تطل لقات الثلج بدا تيطيح و الجو برد بزاااف، رجعات تخشات حداه عنقها و نعسو حتال الصباح......الغد فاقو بكري لقاو الدنيا كلها بيضاء و الثلج مغطي الدنيا، لقاو كلشي فايق تجمعو على الطبلة و جلسو تيفطرو، أنور : الليل الشتا محبساتش و مع الثلج الطريق تقطعات خاص عاد يحلوها عاود، نسمة : هههههه صافي بقينا هنا، رقية : عادي موالف هدشي تيوقع فاش تتجي الشتا و شحال من مرة فاض علينا الواد غير الله يستر هاد العام و صافي، نسمة : واش بصح اخالتي، رقية : آه تنوليو مقطوعين على الدنيا حتا تيجيبو المساعدات عاد تيفكونا، علاء : سمحولينا تقلنا عليكم، السي علي : لاواه اولدي متقولش هكا حتا نتوما ظروفكم را ماشي لخاطركم الدار داركم حتا يشوف ربي من حالنا، أميمة : أنا غادة نجمع الحطب محد الثلج حبس شوية را قرب يتسالا، رقية : و دي معاك خوك يعاونك، أميمة : واخا، نسمة : انا نمشي معاك، رقية : غير جلسي ابنتي الدنيا خايبة تما، نسمة : ماشي مشكل تنعاونو ميمكنش نبقا غير جالسة، أميمة : واخا هاكي لبسي هدا على البرد و يالاهي، علاء : و حضي راسك أنا نمشي نعاون انور إلا خصاتو شي حاجة، نسمة : واخا منتعطلوش .