الحب لا يموت

الجزء 3

نسمة : هاد المرة انتبه مزيان، ولا سير عاود دوز البيرمي حسن ليك، ركبات فطونوبيلتها و مشات و خلاتو، نسمة (تتهضر مع راسها) : تفو على نهار كيداير، واش تيدعي فيا شي واحد ولا شنو؟ أش هاد المرض.....أعوذ بالله من الشيطان الرجيم، هذا غير الشيطان تيوسوس ليا و صافي، انمشي للدار نتوضا و نصلي، يا ربي تسمح ليا عطلت الصلاة بالسيف ميكون نهاري خايب .
رجعات نسمة للدار طلعات نيشان لبيتها توضات و صلات و مشات تقلب على التوأم ديالها....هبطات للكوزينة لقات رحمة و البنات تيوجدو الغذاء، نسمة : خالتي رحمة مبانتش ليك ميسم؟ رحمة : رآ حتا هي كانت تتقلب عليك الصباح، را واقيلا مشات للورشة تشوفك تما، نسمة : صافي انا نمشي نشوفها، الله يعاونكم، رحمة : آمين ابنتي، طلعات نسمة لبيتها بدلات حوايجها و فاش كانت خارجة بانت ليها ميسم جاية، مشات بالجرا لعندها، نسمة : ميسم فين كنتي؟ نسمة : كنت خارجة، نسمة : و علاش مقلتيهاش ليا نخرجو بجوج؟ ميسم : ايوا منعرف شكون خرج الصباح بلا ميقولها للآخر و معيط مسول، نسمة : و صافي سمحيليا والله كنت مدوخة بغيت نبقا بوحدي حتا نتهدن، و صافي حيدي ديك الغوباشة، ميسم (ضحكات) : و متبقايش تعاودي، نسمة : أمرك مولاتي، ميسم : اه حقا فخبارك را أسامة رجع من فرنسا، نسمة غير سمعات السمية تبدل فيها اللون، رجعو ليها كاع الذكريات الخايبة، طلعات تتجري لبيتها و سدات عليها و جلسات تتبكي.....'باش نقرب ليكم الصورة كثر انا انحكي ليكم القصة ديال هاد العائلة من الأول، كانت مكونة من الأب و الأم و جوج ولاد و التوأم ديالنا و أسامة اللي هو ولد جارهم و الإبن ديال أعز صديقات الأم، كان تيزورهم دائما و شحال من مرة تيبات عندهم، فاش كانت عندهم 6 سنين مشاو يقراو فمدرسة داخلية و كانو تيشوفو والديهم غير فالسبت و الأحد و العطل، فاش ماتت ماماهوم رجعو هوما للدار و كملو حياتهم عادي و كانت عندهم ديك الساعة 13 عام، وهاد أسامة كانت عندو 18، المشكل هو أنه كان تيتحرش بنسمة و تيهددها أنه يقتلها لقالتها لشي واحد، هي مسكينة كانت تتخاف و مقدرات تقولها لحتا واحد حتا التوأم ديالها، باباها كان مشغول بالخدمة و مكانش يقدر يشك فيه حيت معتابرو فحال ولدو .
دازو سنين و هي تتعاني فصمت حتال نهار قرر يكمل قرايتو ففرنسا عاد رتاحت منو، 5 سنين باش مشافتوش ولكن هاهو رجع و رجع معاه نفس الإحساس، باقا فوقما تتذكر سميتو تتشدها الخلعة....بكات حتا عيات و نعسات و هي جامعة رجليها عندها و مخلوعة، الغد فاقت دوشات و لبسات حوايجها و نشفات شعرها و نزلات تفطر مع العائلة، نسمة : صباح الخير، الجميع : صباح النور، جرات الكرسي و جلسات تتاكل و متبعا هضرتهم، السي حمد : الأمور فالشركة غادة مزيانة، سيف الدين : اه أبابا كلشي هو هداك، السي حمد : فخباركم را غيدخل معانا شريك جديد، نتوما را تتعرفوه، مراد : شريك جديد؟ شكون هذا؟ السي حمد : أسامة ولد نورة عقلتي عليه، را كان مشا يكمل قرايتو ففرنسا و راه دابا تخرج و بغا يرجع للمغرب يبدا مشروع ديالو و انا اقترحت عليه يدخل معانا، راه قاري و شاد الدبلوم ديالو من فرنسا و ناجح بمعدل طالع غينفعنا، مراد : اذا كان هكا مزيان، سيف الدين : حتا انا معنديش مشكل، نسمة طاحت ليها المعلقة من يديها و جات تنوض و هي تخوي عليها الحليب سخون و بقات تتغوت، كلشي ناض مخلوع و هي كثر، جات رحمة تتجري دارت ليها الثلج على يدها حيت تحرقات فيها و طلعاتها تبدل ليها حوايجها، رحمة : مالكي ابنيتي شنو واقع ليك ليوم؟ نسمة : والو اخالتي والو، صافي غير حيدي هاد الثلج انا اندخل ندوش دغيا و نخرج باش نمشي نخدم، رحمة : واخا، تبغي شي حاجة؟ نسمة : لا صافي، خرجات رحمة لقات كلشي مخلوع عليها، هي طمناتهم و كل واحد مشا يقدي شغلو، أما نسمة فدخلات للدوش و طلقات الما بارد و جلسات تتبكي تحتو .
حتا حسات بشي واحد دخل عليها، ميسم : نسمة مالكي شنو واقع ليك؟ نسمة : والو، ميسم : و مالكي تتبكي؟ نسمة : غير تضرني الحرقة، ميسم : ممخبياش عليا شي حاجة زعما؟ نسمة : لا، ميسم : متأكدة؟ نسمة : اه، ميسم : ايوا آجي نلبسك حوايجك، نسمة : غير خليك، ميسم : لا غير آجي، لبساتها حوايجها و داوات ليها بلاصة الحرقة و مشاو بجوج للورشة، بقاو تيخدمو حتا عياو، ميسم : جاني الجوع، نسمة : حتا انا، ميسم : انت را مفطرتيش أصلا، يالاهي نمشيو نجيبو مناكلو، نسمة : غير سيري انت انا انكمل الخدمة، ميسم : شنو بغيتي تاكلي؟ نسمة : اللي تجيبي لراسك جيبي ليا معاك، ميسم : صافي انا منتعطلش عليك، مشات ميسم و بقات نسمة بوحدها تتخدم، دازت ربع ساعة و هي ترجع ميسم هازة فيدها الماكلة و ريحتها تتشهي و داخلة فرحانة، ميسم : هانا جيت، نسمة : مرحبا، يالاه حطي قبل ميبرد، ميسم : بلاتي عرفتي شنو طرا، نسمة (بتعجب) : شنو طرا؟