الحب لا يموت

الجزء 60

صهيب : ماشي فايت تلاقينا حدا البحر واحد المرة؟ نسمة (بقات تتفكر) : آآآآه بصح عاد تفكرت دبا، فالغروب ياك، صهيب : ايييه هانتي عقلتي، نسمة : ولكن شنو كنتي تدير تما؟ صهيب : هههه كنت مخاصم مع خطيبتي حتا قلنا غادي نتفارقو، و مشيت جلست حدا البحر، نسمة : و واش تفارقتو؟ صهيب : راها حاملة فشهرها الثامن دبا، نسمة : تبارك الله، صهيب : غير باش تعرفي الواحد تيوصل لبعض اللحظات تيقول هادي هي النهاية، ولكن ربي تيلطف بينا، السي علاء تيبغيك بزاف، بصح أنا غير خدام عندهم ولكن دايرني فحال صاحبو، أنا و منال كنا تنبغيو بعضنا بزاف، مكنتش تنتصور حياتي بلا بيها، تيقي إلا قلت ليك را قبل منتخطبو كنا تفارقنا عام عاد رجعنا، الحب إلا كان صادق عمرو تيموت فالقلب، أنا متأكد غادي تصالحو و يتحل المشكل و ترجعو حسن من قبل كاع، نسمة : شكرا بزاف والله كنت محتاجة شي واحد يقول ليا فحال هاد الكلام، صهيب : على الرحب و السعة .
وصلو للمغرب شدو طاكسي ما عارفينش فين غادي يمشيو و منين غادي يبداو، مشاو لواحد القهوة فطرو بعدا و جلسو تيفكرو شنو يديرو، نسمة : أنا عارفة شنو غادي نديرو بعدا، صهيب : شنو؟ نسمة : غادي نمشيو عند خالتي نجاة هي اللي تقدر تعاونا، صهيب : اللي بغيتي، مشات لعندها دقات و بقات تتسنا شوية و هي تحل ليها غير شافتها عنقاتها و نجاة بقات غير متفاجأة، دخلاتهم و جلسو، نجاة : نهار كبير هذا، ولكن علاش ما علمتينيش؟ نسمة : غير بلاتي اخالتي انا غادي نشرح ليك كلشي، بلاتي غير نعيط لسيف هو اللي يقدر يعاوني، تسناو شوية و هو يجي، سيف : نسمة شنو جابكم لهنا؟ و فين هو علاء؟ و شكون هذا؟ نسمة : غير وحدة بوحدة غنقوليكم كلشي، عاودات ليهم كلشي بالتفصيل، سيف : عليها جا علاء داك النهار مزروب، نسمة : واش جا علاء تلاقيتيه؟ سيف : آه هادي شي أربعة أيام جا تيسول على أسامة ما قال والو دغيا مشا، و أنت هادي مدة و الإتصال معاك مقطوع تنبغي غير نهضر معاكم نسول فيكم و نعاود ليكم و والو، نسمة : را كنت مشطونة جات حاجة تابعة حاجة، واش وقعات شي حاجة؟ سيف : على هي غير حاجة وحدة! را حوايج وقعو، داك النهار جا أسامة تيحيح علينا سكران قال لبابا راكم تزوجتو بابا مشا يحماق، و ديك نورة طلعات بنت الحرام مقطرة فاش شافت الشركة غادا و تتكفس كشطاتو و خلاتو يكتب ليها شحال من حاجة بسميتها فالاخير طلبات الطلاق صافي كملات عليه دكشي اللي بيه، راه دبا غير شاد الفراش بغا غير يشوفكم و يتسامح معاكم دخلاتو الندامة على دكشي اللي دار، نسمة : واش هدشي كامل واقع و حنا ما جايبين للدنيا خبار، سيف : ااايه، نسمة : و فين مشات هي دبا؟ سيف : غتكون مشات هي و ولدها لشي بلاصة برا، ما بقيناش حنا تسوقنا ليهم مزال، قولي لي غير شنو غادي ديري أنت دبا؟ نسمة : والله معرفت شنو بان ليك أنت؟ سيف : شفتي داك أسامة غير نسايه بعدا، را حسهم غبر بجوج، أنت شوفي غير علاء نلقاوه هادي أهم حاجة، بقاي أنت مع نجاة من الأفضل ما تمشيش للدار دبا وأنا و صهيب غادي نقلبو عليه حتا نلقاوه كوني هانية، نسمة : صافي تنتيق فيكم، سيف : خالتي نجاة هايا نسمة أمانة عندك، نجاة : كون مهني عليها....
داز داك النهار ارتاحت فيه نسمة شوية و حتا بالها ما بقاش مشوش فحال قبل، نجاة ما خلات ما صايبات ليها تاع الشهيوات حيت تتوحم، هضرات مع ميسم و الحاجة عاودات ليهم كلشي، الغد صبحت نسمة مريضة عاود بسبب الوحم، نجاة : واش نديك للطبيب؟ نسمة : خالتي را غير الوحم عدي يوقع فحال هكا، نجاة : علاه المرأة الموحمة مكتمشيش للطبيب؟ انت مزال ما دوزتي ما والو ضروري خصك تمشي، يالاه لبسي و زيدي معايا، شافت حتا عيات لبسات و مشاو عند طبيبة تاع الحوامل شافتها و دوزات ليها و عطاتها شي مقويات، و قالت ليها را خصها الراحة و متعصبش و متوترش بزاف، و رجعو للدار، نجاة : آجي ندخلك ندوش ليك، نسمة : بلاش اخالتي ندخل بوحدي، نجاة : لا غير زيدي، دخلاتها دوشات ليها و خرجات مشات للبيت باش تبدل، نجاة : بصحتك الحمام، نسمة : الله يعطيك الصحة اخالتي، لبسات نسمة حوايجها و جلسات هي و نجاة كيتحتو، نجاة : آجي نوريك الألبوم تاع التصاور، نسمة : واخا نيت عمرك ما وريتيه ليا، جبدو الألبوم تيتفرجو فالتصاور حتا طاحت عينيها على تصاور الخطبة، نسمة : خالتي واش داك الخاتم اللي فيديك هو اللي تخطبتي بيه؟ نجاة : هذاك كان شراه ليا المرحوم، نسمة : واش عمي صالح؟ نجاة : لا ماشي ولد عمي، را قلت ليك قبل منو تزوجت بالتخبية، نسمة : و داك الخاتم واش مزال عندك؟ نجاة : كنت خشيتو لولدي مع حوايجو قبل ما ياخدوه ليا......