الحب لا يموت

الجزء 13

نسمة : واو هدشي كلو و مزال متشبت بالأمل سعداتك، علاء : بالأمل نحيا، نسمة : جاني الجوع، علاء : حتا انا، نسمة : را جبنا معانا شي حاجة يالاه ناكلو، علاء : و يقد؟ نسمة : البركة البركة هههه، علاء : هههه يالاه، نسمة : ميسم حبوبتي مجاكش الجوع؟ ميسم : كنا تنهضرو محسيتش بيه، حمزة : حتا انا جاني فالحقيقة، نسمة : ايوا تفضلو و قبلو علينا شي حاجة خفيفة، علاء : الله أودي، ميسم : هههه فزكتي كلك، نسمة : السي علاء هو السباب شغاندير؟ ميسم : حتا أنا بغيت ندخل غير مزعمتش، نسمة : غير يالاه البحر زوين بزاف، ندخلو كلنا، حمزة : و حوايجنا؟ نسمة : اللي ليها ليها عيشوا اللحظة و متفكروش فشي حاجة باقا موصلات ومولاها ربي، حمزة : يالاه زيدو، علاء : آري يدك، نسمة : علاش؟ علاء : قبطي فيا ندخلو كلنا دقة وحدة، نسمة : آه واخا "كانت يدو كبيرة عليا، العروقة ديالها باينين، زير عليا و قبطت فميسم و هي فحمزة" الكل : واحاااااد جووووووج ثلاثااااا هوب هههههه، مشاو تيجريو و تلاحو فالبحر و جلسو تيعومو، نسمة : ناااري شعري كلو تخرمز، علاء : ههههه كلو طاح على وجهك، قرب منها و حيد ليها الشعر على عينيها و هي ساهية فيه، شوية خشا ليها راسها تحت الما و هرب منها، نسمة : كح كح كح ناري حرام عليك، عاد دابا شوية كنتي بعقلك، علاء : ههههه، نسمة : غير بلاتي نقبطك و تشوف، علاء : لقبطتيني غير ديري اللي بغيتي، بقات تابعاه و هو هارب و والو مقدراتش تقبطو، عامو حتا شبعو و جلسو حدا الرملة مقابلين الغروب حتا غابت الشمس و طاح الظلام، نسمة : تعطلنا خصنا نرجعو، علاء : دبا عاد تتحلا الجلسة، نسمة : مكاينش هنا الريزو كوراهم تشوشو علينا، علاء : صافي نجلسو و شوية نمشيو، نسمة : ميسم شنو بان ليك؟ ميسم : خلينا شوية و نمشيو، نسمة : صافي، علاء : ايوا يالاهي معايا، نسمة : فين؟ علاء : غير آجي متخافيش.........بقاو تيتمشاو حتا فاتو البلاصة فين كانو، وصلو لواحد البلاصة فحال الغابة فيها الشجر، نسمة : علاش جينا لهنا؟ علاء : نجمعو شوية الحطب باش نشعلو العافية و حوايجنا ينشفو، نسمة : اه واخا، جمعو الحطب و هزوه باش يرجعو، علاء : بلاتي، نسمة : نعام، علاء : بقينا بوحدنا دبا، نسمة تفكرات نهار سد عليها أسامة فالبيت، *بقينا بوحدنا دبا* قال حتا هو نفس الهضرة، نسمة مبقات تتبان ليها حتا حاجة، من غير الصورة ديال أسامة قدام عينيها باغي يدير ليها فحال داك النهار، رمات الحطب من يديها و مشات تتجري و علاء شافها هكاك مفهم والو و بقا تابعها، علاء : نسمة مالكي سايني، نسمة نسمة، لحق عليها قبطها و هي غير تتغوت و تبكي، نسمة (بخوف) : لا عافاك طلق مني، بعد مني اهئ اهئ، علاء : بسم الله عليك مالكي شنو واقع ليك؟.........عنقها و بقا تيقرا عليها القرآن حتا تهدنات و جلس حداها، علاء : نسمة قوليليا مالكي، سمحيليا كنت غير تنضحك معاك واش تخلعتي؟ نسمة : صافي صافي، علاء : كيفاش صافي، هاديك ماشي الحالة ديال شي واحد نورمال، نسمة : خلينا الحطب تما، علاء : لا مغنمشيوش حتا تقوليلي مالكي، نسمة : معرفتش، غير يالاه، علاء : مفهمتش مالكي......رجعو هزو الحطب و علاء مفاهم والو و نسمة شاداها الخلعة، رجعو لقاو حمزة و ميسم تيتسناوهم، ميسم : تبارك الله عليكم فين تعطلتو هاد الوقت كامل؟ نسمة : جبنا الحطب و جينا، ديرو بلاصة فين نحطو هدشي، نسمة : واخا......شعلو العافية و دارو عليها باش يسخنو حيت الجو برد و حوايجهم كانو باقين فازكين، علاء : شكون تيعرف يغني فيكم؟ حمزة : أنت، نسمة : واو بصح؟ علاء : شوية و صافي، حمزة : لا غير تيكذب، صوتو واعر، نسمة : غني لينا عافاك، علاء : هههه وا را قلت ليك صوتي مزوينش، نسمة : عافاااك، علاء : صافي واخا و لكن را غير حيت طلبتيني، نسمة : ياااس، علاء : شو نغني ليكم؟ حمزة : غني ليهم مرسول الحب.........بدا تيغني و كلشي تفاجأ من صوتو، كان زوين بزاف متكرهش غير تسمع ليه، غير سالا ناضت نسمة تتصفق ليه، نسمة : واو صوتك زوين ماشاء الله عليك، ميسم : وي عندك الحق، علاء : شوية وصافي، نسمة : التواضع زعما هههه، ميسم : حتا نسمة صوتها زوين فالغنا، نسمة : أنا يا لكذابة أشمن تهمة هادي، ميسم : تنكري؟ ماشي كانت المعلمة حسنة ديما مدايراك ففرقة الغناء نسيتي؟ نسمة : كنت صغيرة و صوتي رقيق هدشي علاش، و أصلا حنا صوتنا متشابه، علاء : إيوا غني لينا، نسمة : ألا، علاء : عافاك، نسمة : هههه إيوا بلاتي، احم احم أنا بعدا مقابلة البحر ليرحل، أنا بعدا مقابلة المواج لتعواج، أنا بعدا خصني جيلالا و نفيق هههههه، الجميع : ههههههههه، علاء : ناااري أنت بزاف، نسمة : ناااري 11 هادي تعطلنا، حمزة : وي بصح يالاه نمشيو.........طفاو العافية و جمعو حوايجهم داوهم للطونوبيل و رجعو دغيا، غير وصلو ملقاو حتا واحد فالدار، ميسم : أو هادو فين يكونو مشاو؟ نسمة : كوراهوم دارونا فمختفون، نااري التيليفون تيصوني، ميسم : شكون؟ نسمة : سيف، ميسم : ايوا جاوبي دغيا، نسمة : آلو، سيف : على السلامة عاد فقتي، نسمة : فقت؟! سيف : حنا عند خالتي نورة، بغيت نقوليكم فاش تساليو دوزو لعندنا ساعا تيليفوناتكم كانو طافيين قلت راكوم ناعسين حتا تفيقو و نعاود نصوني، المهم لبسو و آجيو دغيا تعشاو، نسمة : اه واخا، هههههه ميسم هادو كاعما فراسهم را عاد وصلنا يسحابليهم كنا ناعسين، المهم زيدي نبدلو علينا و نمشيو را غنتعشاو تما، ميسم : ههههه على زهر عندنا، نسمة : وايييه .