الحب لا يموت

الجزء 44

السي حمد : يالاه عاودي لينا دبا، فين كنتي و فين مشيتي و علاش، نسمة "معرفت ما نقول ليهم دبا، واش نقوليهم كلشي و اللي بغا يوقع يوقع ولا نخلق شي كذبة؟ ولكن شنو نقدر نقول" فكرات حتا عيات و سرسبات ليه كلشي، السي حمد : إيه هدشي اللي كان ناقص، من تالي أيامي بنتي تخرج مع الزوافرية فنصايص الليل، علم الله آش درتو هدشي غير اللي عاودتي يعلم الله شنو مزالا مخبية، بالحق الغلطة ماشي منك أنا اللي رخيت ليكم الحزام و طلقتكم تديرو ما بغيتو قلت راكم بعقلكم ساعا شوف فين ولينا، بالحق من اليوم أنا غادي نوريك، نسمة : والله أ بابا حتا قلت ليك كلشي أقسم ليك بالله ما خبيت عليك شي حاجة، السي حمد : معنديش أنا البنات اللي يخرجو للزنقة، من اليوم  غادي تجلسي فداركم، نسمة : ولكن أبابا خدمتي؟ السي حمد : ما بقات لا خدمة لا والو بغيتي الفلوس ولا أي حاجة غنعطيوها ليك ما ناقصك حتا خير ديك الخدمة و القراية برا و المشي و المجي بزاف هو اللي ضسركم، و داك علاء ولا منعرف شنو سميتو نسايه عليا.....نسمة (يالاه غتهضر و هو يغوت) : آري داك التلفون و طلعي عليا ما نشوفش وجهك.........مقدراتش تقول لا عطاتو ليه و طلعات لبيتها هي و ختها و جلسات تتبكي، ميسم (جلسات حداها) : وا صافي اصحبتي أنت عارفاه كيفاش داير غيدوز غير شي وقيت كلشي غيرجع كيفما كان، نسمة : واش أنت ما عارفاهش كيفاش ولا؟ من نهار تزوج بديك العقروشة غتلقايه هي اللي تتحرشو علينا، فين عمر بابا غوت علينا ولا خصر لينا خاطرنا؟ و زيد عليه عمتي و مي حتا هوما غتلقايهم عمرو ليه راسو و كلاو ليه دماغو، ميسم : هاكي بعدا هضري مع علاء عاودي ليه كلشي باش تكون فراسو، نسمة : مخاصمين، ميسم : وايلي علاش؟ نسمة : تزايدنا فالهضرة و تقلق مني، ميسم : و حتا أنت تديري علاش، شوفي ماشي وقت المخاصمة دبا شدي هضري معاه أنا خارجة حتا تسالي على خاطرك، نسمة : شكرا بزاف، ميسم : الهبيلة راكي ختي .
*التلفون تيصوني* علاء : آلو، نسمة : آلو علاء، علاء : آه نسمة ياك لاباس، نسمة : شنو تدير؟ علاء : غير شي خدمة خصني نكملها، ياك لاباس بعدا؟ نسمة : صافي حتا تسالي على خاطرك، علاء : لا غير قولي أنا مسالي، ياكما وقع ليك شي مشكل مع الدار؟ كيبقيتي بعدا؟ نسمة : واخا أنا نعاود ليك.....*عاودات ليه كلشي* علاء : فهمت دبا، يعني منقدروش نبقاو نتلاقاو، نسمة : حاليا لا، علاء : امممم، كاين الحل، نسمة : بصح شنو هو؟ علاء : نتفارقو، نسمة (مقدرات تنطق بحتا كلمة)، علاء : هههه واش تيقتيني على أنا نقدر نتفرق عليك، بصح تتفقصيني بعض المرات و تتعصبيني و تنبغي نطرطق حتا تنقول صافي حبس ولكن متنقدرش تنبغيك واخا تنحس بيك شي مرات ما تايقاش فيا ولا مكافيكش يمكن و تنرجع اللوم لراسي، تيقيني إلا قلت ليك كل ليلة تنشد تصويرتك تنبقى نتأملها بالساعات و متنملش فحالا تنشوفها لأول مرة، فاش ما تتكونيش مسالية تهضري معايا تنرجع نسمع لفوكالات اللي تتسيفطي ليا و تنقرا هضرتنا لدرجة أنني حفضتها أكثر من سميتي، نسمة واش تيقي باللي الواليدة ديالي عارفة حتا الماكلة اللي تتعجبك و الوقت معاياش تتفيقي و فوقاش تيبدا يجيك النعاس و إلا عاودت ليها شي حاجة درناها تتعرف حتا ردة الفعل ديالك و كيفاش تقدري تصرفي فداك الموقف، أنا متأكد بأنني تنبغيك أكثر من أي شخص، عمرني بغيت شي واحد قدك، و عمري نبغي، أنت ماشي نزوة فحياتي، أنت حياتي كلها، تصوري بأنني حداك فهاد اللحظة، تنشوف واحد الابتسامة كبيرة على وجهك، و دموعك نازلين واخا تقولي لا، أنا مستعد من غدا نجي نهضر مع باباك، باغي نكمل معاك حياتي، موافقة، نسمة (سكتات مدة عاد قالت) : معرفت منقول ما خليتي ليا ما نقول، علاء : قل بحبك قل بكرهك قل أي حاجة، قولي آه، نسمة : على قلبي و عقلي و لساني يقدرو يقولو شي حاجة من غيرها، علاء : حبيبة ديلي تنموت عليك، نسمة : وانا أكثر، علاء : يالاه نوضي غسلي وجهك و كولي ليك شي حاجة و أنا نصف ساعة و نعاود نصوني ليك نهضرو واخا، نسمة : واخا........دوزو داك الليل كامل و هوما تيهضرو مع بعضياتهم و تيضحكو حتا طلع النهار، علاء : الخايبة خليتيني بلا نعاس، سيري فطري و ارتاحي ليك شوية را منعستيش واخا كنتي عيانة و أنا خصني نمشي واخا ما سخيتش بيك ولكن الغالب الله الخدمة تابعاني ولكن را العشية ندوز نهضر مع الوالد ديالك باش نفضيو هاد المشكل مبغيتش نجبد ليك الصداع مع حتا واحد و خصوصا عائلتك، نسمة : انتوحشك بزااااف تهلا فراسك و لبس مزيان، علاء : واخا بالسلامة، نسمة : آه حقا بغيت نقطع شعري، علاء : إلا قطعتيه مغنعاودش نهضر معاك، نسمة : حرام عليك علاش، علاء : بقدر ما تتحمقيني تيحمقني شعرك، نسمة : ولكن را طوال بزاف بغيت غير ننقص منو شوية، علاء : أنا قلت ليك إلا قستيه غادي نخاصمك، يالاه بالسلامة، نسمة : لا بلاتي، اوووف قطع......عنقات التلفون اللي سمعها صوتو و بقات تضحك غير بوحدها .