الحب لا يموت

الجزء 24

طلبو الفطور ديالهم و جلسو تياكلو مجموعين، نسمة : عرفتي حنا جينا بغينا نتسجلو فلاصال، علاء : هههه بصح، مرحبا بكم، نسمة : مالك تضحك، علاء : والو غير جاتني فشكل، شهد : واو أفضل حاجة والله منها نيت نكونو صحابات، انا جيت من فرنسا متنعرف هنا حتا شي واحد، ميسم : مرحبا بك معانا، لبغيتي نبقاو نخرجو و آجي لعندنا و لحتاجيتي لشي حاجة متحشميش منا ديرينا خواتاتك، شهد : يااه بصح شكرا بزاف والله.......ميسم : اااي، *تتهضر بشوية * مالكي ضربتيني واش تسطيتي؟ نسمة : حتا نخرجو و نتفاهمو، علاء : المهم لبغيتو تسجلو انا نقاد ليكم كلشي و غدا آجيو نبداو، عندكم 3 المرات فالسيمانا، انا نهار الجمعة تنكون فالخدمة متنجيش لهنا، ولكن را داك الولد يعاونكم فاللي بغيتو، ميسم : و حمزة؟ علاء : را حتا حمزة تيتريني فلاصال غير هو مخالف معاكم، ميسم : اممم صافي، نسمة : اوكي حتال غدا و نبداو، شهد تشرفت بمعرفتك وشكرا على الحوايج، ميسم يالاه، ميسم : حتا أنا شرفت بيك و متنسايش هضرتي، شهد : شكرا بزاف، هايا نمرتي لبغيتيها........خرجات نسمة و تبعاتها ميسم : مالكي مع البنت تتهضري معاها ناقص شنو دارت ليك، نسمة : انت اللي مالكي، انا تنقوليك علاء را قاليك تيبغيها و انت شوفي كيفاش تتعاملي معاها، ميسم : مبايناش فيهم نكذب عليك، كون رآه بغاك تغيري و صافي، وأصلا شهد ضريفة، نسمة : و أنا مالي معجبتكش، ميسم : أنت تدخلي شي فشي، وا يالاه للدار حتا نمشيو و نتفاهمو......مشاو للدار تغداو و خرجو تيدورو حتال الليل و رجعو، قادو فراشهم و مشاو ينعسو، نسمة : ميسم حطي داك المشقوف خلينا نعسو باش غدا نفيقو بكري، ميسم : واخا أنا شوية و نعس، نسمة : معامن تتهضري، ميسم : مع شهد، عرفتي هاد البنت ضريفة والله، نسمة : تصبحي على خير، ميسم : بونوي
نعسات نسمة ديك الليلة مفقوصة، الغد مشاو بكري للاصال، ميسم متحمسة بزاف حيت اتلاقا بشهد و نسمة فقدات كاع داك الحماس اللي كان فيها، وقت الغداء تجمعو تياكلو و هي غير ساكتة تتشوفهم مجمعين و كاعما مسوقين ليها، و فالعشية خرجو معا شهد باش تاخد ليها حوايج جداد و مشات معاهم نسمة بزز، نسمة : آجي ندخلو لهاد المحل فيه الحوايج واعرين، شهد : يالاه، ميسم : شوفي هاد الموديل يجي معاك، شهد : واو زوين غادي ناخدو، حتا هذا شوفي الألوان ديالو زوينين، ميسم شوفي هاد اللبسة تجيك واعرة، ميسم : بصح؟ شهد : وي دخلي قيسيها و تشوفي......مشات ميسم تقيس و خرجات، شهد : يااا جيتي زوينة بزاف بهاد اللبسة، ميسم : بصح، شهد : والله، ميسم : ميسم شوفي كيجاتني؟ نسمة : اممم مبيهاش، شهد : لا بالعكس جاتك زوينة، ميسم : صافي اناخدها، نسمة : هانا فالطونوبيل حتا تساليو و آجيو، ميسم : بقاي حتا نمشيو كلنا، نسمة : لا غير خليكم......مشات نسمة لطونوبيل و بقات جالسة فيها "شهد شهد شهد شهد، آو بزاف، شنو يكون فيها زايد كاع، حتا واحد مبقا مسوق ليا صوا كنت صوا لا، و حتا ميسم تبدلات عليا" ديمارات طونوبيلتها و مشات حدا البحر جلسات فوق الرملة تتراقب الغروب، صوت : الغروب زوين......دارت لقاتو واحد الشاب طويل و داير كاسكيط كحلا على راسو مقدراتش تميز الملامح ديالو مزيان، جلس حداها و بقا تيهضر : الغروب زوين، تيخليك تحس بواحد الصفاء فشي شكل، واحد الراحة عجيبة، فوقما تنكون مخنوق تنجي غير هنا تنجلس و تنبقا نتأمل فهاد المنظر، نقدر نبقا جالس بالساعات بلا منمل، ربما تجيك هضرتي تافهة، ولكن را بصح، نسمة : لا ماشي تافهة بالعكس، كلشي اللي قلتيه صحيح....شاف فيها و بانو ليها الملامح ديالو مزيان، كان عادي سمر و عندو اللحية و شعرو رطب و ملوي، ولكن شي حاجة فعينيه تتخليك تبغي غير تشوف فيهم، بقاو جالسين حتا طاح الظلام، نسمة : انخليك دبا ظلام الحال، الولد : واخا مسخيتش بيك ولكن داركم هي اللولة، نسمة : مقلتيش ليا سميتك، الولد : سميتي صهيب و انت؟ نسمة : انا نسمة، تشرفت بمعرفتك، صهيب : تقدري تخلي ليا نمرتك نبقاو على إتصال؟ نسمة : ضاع ليا التيليفون لبارح، صهيب : على أي منبززش عليك، ربما نتلاقاو شي مرة أخرى، نسمة : ربما.......رجعات نسمة للدار و جلسات فالارجوحة فالجردة و الهوا بارد تيسوط فوجهها، صفاء : عنداكي يضربك البرد، نسمة : أنا شوية و ندخل، صفاء (جلسات حداها) : الخريف دخل و الجو تبدل ولا تيبرد، نسمة : اه مشا الصيف، شحال عندك من شهر دبا، صفاء : الثامن، نسمة : قربتي تولدي، صفاء : اه مبقا ليا والو، نسمة : تبارك الله، يكبر فعزكم إن شاء الله، صفاء : آمين احبيبة، نسمة : أنا طالعة نعس، صفاء : تصبحي على خير
حطات راسها فوق الفراش و بقات تتفكر فنهارها "وليت تنفكر بزاف، الناس فاش تيبغيو تيتهناو وانا عاد ما تنزيد هم على هم" سمعات الباب تحل و دارت راسها ناعسة، ميسم : نسمة فين مشيتي قبيلة و خليتينا كون مكانتش شهد كون تميت جاية على رجلي، نسمة معاك تنهضر نوضي......مشات عندها تفيقها ووالو، فالاخير خلاتها و بقات ملاهية مع تليفونها حتا داها النعاس .