الحب لا يموت

الجزء 21

كانت سارحة فأفكارها، تكات على الحيط، غمضات عينيها و بقات تتفكر، حتا حسات بشي يد تحطات على عنقها : حطي دكشي اللي عندك، نسمة : كيفاش......حسات بموس تحط على كرشها، قلت ليك آري داك الصاك......بالخلعة عطاتو الصاك كان فيه التلفون و الفلوس و كلشي، و قبل ميمشي جر ليها السنسلة من عنقها و هي جات تشدها و هو يجرحها فيديها و هرب، نسمة : لااااا لا السنسلة ديالي تسنا عافاك عافاك نعطيك اللي بغيتي خلي ليا غير سنسلتي عافاك تسنا....هي تابعاه و هو هارب منها حتا تلفاتو بين الناس، بقات تتقلب عليه بحال الحمقة بين بنادم و والو الأثر ديالو مكاينش، عيات و هي ترجع حدا طونوبيلتها و تفكرات را معندهاش السوارت و جلسات حداها تتبكي......كان علاء خارج هو و شهد و شافها جالسة تتبكي مشا لعندها، علاء : نسمة مالكي، نسمة شوفي فيا، هزي راسك، نسمة : بعد مني بعد مني، علاء : لقلقتك سمحيليا مقصدتش نبكيك، نسمة : ماشي عليك صافي خليني، علاء : مالكي فيدك، شوفي حرقتي راسك قبيلة و دابا جرحتي يدك، نسمة : شوف فيا، كتفهم الهضرة؟ فرق مني، علاء : وا دبا أنت اللي متتسمعيش و متتفهميش، نسمة : لا شنو تدير طلقني، علاء نزلني.......هزها فوق ظهرو و داها للطونوبيل حطها حداه و ديمارا و زاد، نسمة : دابا انا مباغاش نجي معاك هبطني فحالي، علاء : نسمة صافي هنينا، نسمة : و أنت مالك مسوقكش فيا، علاء : را بديتي تتعصبيني، نسمة : انت معصب غير بوحدك انا مالي فيك.......شاف فيها مخنزر و زدح الفولون و هي تصقل بقاو الطريق كاملة و هوما ساكتين حتا وصلو لدارو، علاء : دخلي، نسمة : تسطيتي شنو اندير انا فدارك، علاء : واش خاصك ضروري تعكسي فأي حاجة أو مالكي على هاد القسوحية كلها، نسمة : و أنت مالك سوقك فيا، علاء : اه يالاه دخلي.......شافت حتا عيات و دخلات معاه، كانت الشقة ديالو زوينة بزاف، كانو شي فاليزات محطوطين حدا الباب، الديكور ديالها عصري و راقي و كلشي منظم و مقاد، جلسها فالسيجور و مشا جاب العلبة ديال الدوا و داوا ليها الجرح، علاء : واش تحرقتي بزاف؟ نسمة : لا غير حوايجي اللي تقاسو، علاء : سيري دخلي دوشي باش يبرد الحريق، نسمة : شنو، علاء : اتبقاي بحوايجك هاكا؟ نسمة : امم واخا.......مشات للحمام حيدات حوايجها و طلقات الما و تخشات فالحوض، كانو تما حتا مستلزمات نسائية، كريمات و شامبو و صابون، عمرات الحوض بالجيل دوش و عمر الحمام بالفقاعات و جلسات تتلعب بحال شي بنت صغيرة و تضحك غير بوحدها، علاء : نسمة ياك لاباس مالكي تتغوتي، نسمة : هههه لا والو غير تهنا، علاء : واش كلشي هو هذاك؟ نسمة : آه ، "ناااري عمري كنت نتصور يوقع ليا هدشي، فآخر يامك وليتي دوشي عند راجل فدارو، مربيت فيك ميصلح هههههه، ولكن زوينة" بقات غارقة فالما تتلعب و تصايب فقاعات بالصابون حتا عيات، غسلات شعرها و جسمها و جات اتخرج و هي تفكر حوايجها، "ناااري شنو انلبس دبا، حوايجي تقاسو بآتاي ميمكنش ليا نلبسهم، شنو ندير" بقات جالسة تما تتفكر شنو دير حتا سمعات الدقان، علاء : واش ساليتي؟ نسمة : آه، علاء : حلي الباب، نسمة شنوووو، علاء : متفهميش غلط انمد ليك غير البينوار ولمبغيتيش نحطو ليك هنا حتا نخرج و آجي هزيه، نسمة : صافي حطو، علاء : هاوا.....حط ليها البينوار حدا الباب و فاش سمعات الباب تسد خرجات لبساتو و خرجات من الحمام و شعرها فازگ تيقطر على وجهها و حناكها مزنگين، لقاتو جالس ملاهي بالتلفازة، شافها هاكاك جاتو غريبة، بقا تيشوف فيها مدة حتا توترات، نسمة : معرفت منلبس، حوايجي راك شايفهم كيف ولاو، علاء : إيوا خليك هاكا *غمزها* نسمة : كتسطى عليا ولا شنو، علاء : تنتسطا عليك، نسمة : آآآ، علاء : احم، المهم را دوك ليفاليز ديال شهد فيهم حوايجها ديهم للبيت و شوفي شي حاجة لبسيها، نسمة : شهد! واش هي البنت ديال قبيلة؟ علاء : هي هديك، نسمة : و متقلقش لعرفاتني قست ليها حوايجها؟ علاء : لا بالعكس عادي عندها، نسمة : اممم واخا....حتا كانت غادة للبيت تلبس و ضرها راسها، شكون هاد شهد؟ "نسولو؟ لا منسولوش، ولكن شنو فيها؟ غيبقا يقوليك هادي غير فضولية، ولكن را بصح راسي بقا ضرني" نسمة : قوليا بعدا، شكون ديك شهد؟ علاء : اممم بقا ضارك راسك ياك، نسمة : لا غير سولت، صافي بالناقص مبقيتش باغا نعرف، علاء : صافي غير آجي انا انقوليك، اممم شهد حبيبتي، هادي خمس سنين و حنا مع بعضياتنا، و الشهر الجاي انتخطبو، نسمة : شنوو، كيفاش، علاء : اتحضري حتا انت للخطوبة ضروري. راكي فحال ختي الصغيرة، نسمة : اه اه، علاء : يالاه سيري لبسي و آجي نهضرو....مشات تتجر رجليها و مفقوووصة، دخلات للبيت و زدحات الباب وراها و تلاحت فوق الفراش، "دابا هذا واش من نيتو تيهضر، لا لا ميمكنش، إلا كان هكا نموت انا حسن ليا" بقات تتهضر مع راسها و الغيرة اتقتلها، "نلبس بعدا و نمشي نشوف شنو بغا"