الحب لا يموت

الجزء 39

شدو الطريق خارجة على المدينة شوية و كان الجو زوين بزاف و هوما غاديين تيضحكو و فرحانين، علاء : منكرهش ميتسالاش هاد الوقت اللي تندوزو معاك نبقاو غير حنا بجوج، نسمة : حتا أنا، ههههه نااري بزاف والله عمري نسا هاد اللحظات عمري كنت نتصور شي نهار نكون خارجة نتسارا مع 2 ديال الليل و ببيجاما مزال را الضحك نيشان، علاء : نبقاو نعاودوها لولادنا فاش يكبرو، نسمة : ولادنا، اممم عجباتني، شنو باغي وليد ولا بنية؟ علاء : باغيهم بجوج، ولكن باغي البنت هي اللولة حيت الأخت الكبيرة تتكون حنينة، نسمة : اممم عندك الصح، و شنو باغي تكون سميتها؟ يالاه جا يقولها و هو يصوني تلفونو، نسمة : شكون معيط فهاد الوقت، علاء : معرفتش نمرة بريفي اطط نشوفو شكون،.........غير جاوب على لابيل و سمع الصوت ديال المتحدث و هو وجهو تبدل، حبس الطنوبيل دغيا و نزل منها باش يهضر على خاطرو بغات نسمة تبعو مخلاهاش، بقات جالسة تتشوفو تيهضر بغات غير تعرف شكون هاد الشخص اللي معيط فهاد الوقت و اللي ميقدرش يهضر معاه قدامها، فاش سالا لابيل دخل دغيا قلب الطريق و كسيرا، نسمة : علاء مالك ياك لاباس، علاء : خاصني نرجعك للدار عندي شي شغل ضروري، نسمة : شنو هاد الشغل اللي عندك فهاد الوقت، علاء: شي شغل و صافي بلا متصدعي راسك ماشي شي حاجة مهمة، نسمة : انمشي معاك، علاء : لا الليل هذا خصني نرجعك تال غذا و نتلاقاو، نسمة : لا مبغيتش، علاء : نسمة هضرت معاك، نسمة : اوووف صافي......وصلو للدار نزلها و حتا كان غادي و هي تقوليه : علاء را الطريق اللي جيتي منها قبيلة مقطوعة سير من الطريق الأخرى حسن، علاء : واخا بالسلامة.......ركب و زاد و لكن واش هي غتمشي تنعس؟ بالطبع لا، نسمة كانت أذكى من أنها تقول واخا و تسمع للهضرة، هي سيفطاتو من الطريق المقطوعة غير زاد شويا لقا واحد الشجرة طايحة قاطعة الطريق و هي تبعاتو بلا ميشوفها و فاش نزل باش يشوف الطريق تخشات فالكوفر ديال الطونوبيل و سدات عليها، رجع للطونوبيل و مشا من طريق أخرى، بقا غادي تيسوق بسرعة و مع الطريق كانت محفرة و الشتا كل مرة تيتزدح ليها راسها وهي أصلا جالسة معوجة تعذبات مزيان ولكن واخا هكاك كان قاتلها الفضول باش تعرف فين غادي، طبعا مكانتش تتشك فيه ولكن بغات تعرف شنو مخبي عليها، كان السكات غير صوت الطونوبيل و الشتا اللي تيتسمع، حتا كسر الصمت صوت التلفون تيصوني، علاء : آلو.......أنا قريب نوصل.......مزال ليا شي خمسة كيلومتر و نكون تم.......واش دري........آه صافي........و متنساش الوعد ديالك.......الفلوس هايا معايا.........لا ما جا معايا حتا واحد جيت بوحدي........صافي.......سالا لابيل و نسمة مفهمات والو من غير أن علاء غادي يتلاقا مع شي شخص باش يعطيه شي فلوس، ولكن ديالاش هاد الفلوس؟ و شكون هاد الشخص؟ يكون زعما تيهددو؟ ولكن باش علاء متيديرش شي حاجة خايبة! تكون زعما شي صفقة على حساب الشركة؟ و لكن كون كانت غادي يجي معاه حمزة، و مغديش يخبي عليا حيت الأمر عادي، و علاش غادي يعقد صفقة مع شي واحد فالخلا؟ و علاش مخص حتا شي واحد يسيق ليه الخبار؟ ياكما شي عصابة نصبات عليه و بغات تدي ليه فلوسو؟ نارييي إلا كان هكا را كارثة، ولكن واش علاء مكلخ تالهاد الدرجة؟ بففف والله معرفت آش واقع و معرفت فين غيخرجنا هدشي.....حبسات الطونوبيل و نزل منها علاء و جلس تيتسنا، كانت ديك البلاصة خاوية غير صوت الصراصير و الكلاب تينبحو من بعيد اللي تيتسمعو، كانت تما واحد البحيرة كبيرة و مربوطة فيها واحد الفلوكة صغيرة باش اللي بغا يقطع للجهة الأخرى يركب فيها، بقا تيتسنا حتا جا لعندو واحد الولد صغير عطاه واحد البرية و مشا، فاش حلها لقا رسالة مكتوب فيها بأنه خصو يركب فالفلوكة و يقطع للجهة الأخرى، و دكشي اللي دار، طبعا فهاد الوقت نسمة كانت مزالا فالكوفر ديال الطنوبيل، بقات تما شي نصف ساعة حتا ضلوعها تعوجو و مبقاتش قادرة تحمل كثر، خرجات من تم و ضربها الهواء باااارد لقات راسها بوحدها فالخلا و معرفاتو حتا فين مشا، رجعات للطونوبيل جلسات فالكرسي اللور و حطات راسها محسات امتا داها النعاس فاش فاقت طلات بان ليها علاء راجع للطنوبيل، طلع و ديمارا و مشافهاش جالسة اللور عينو غير مع الطريق و ساهي حتا كان غيدخل فواحد الشجرة و هي تغوت "عنداااااك" عاد قلب الفولون و دار شافيها و هو مصدوم، حبس الطنوبيل و دار لعندها : نسمة شنو جابك لهنا؟ نسمة : سحابليك غنخليك تمشي بوحدك عرفت را تحت راسك شي حاجة و انا نتبعك، علاء : واش عارفة شنو درتي را خطر هاد البلاصة، نسمة : انا معاك الباقي متيهمنيش، علاء : كيدرتي ليها مفهمتش؟! نسمة : علاء قوليا شنو مخبي عليا، شنو جابك لهنا فالليل لهاذ الخلا بوحدك، علاش مباغينيش نعرف، ياك قلنا عمرنا نخبيو على بعضنا شي حاجة، علاء : ماشي شي حاجة مهمة دكشي علاش، نسمة : لا بالعكس حيت هي مهمة دكشي علاش مباغيش تقول، علاء : خلي حتا نرجعو و نقوليك، آجي كيدرتي وصلتي لهنا بعدا، نسمة : باغي دوخني بالهضرة، علاء : لا بصح بغيت نعرف، نسمة : تخشيت فالكوفر ههههه، علاء : و كفاش كيدرتي ليها، نسمة : هداك را الذكاء ديالي......