الحب لا يموت

الجزء 55

هبطو تعشاو فالمطعم ديال الفندق و كانت تما سهرة غادي تبدا مع 23:00 قرو ينظمو ليها، طلعو لغرفهم باش يلبسو، علاء لبس كوستيم فالكحل و تحتو قميجة فالابيض، و نسمة لبسات كسوة كلاسيكسة ديال السهرات فالكحل تاع الساتان طويلة و طالون فالكحل حتا هو مع مونطو قصير تاع الوبر فالكحل و جمعات شعرها و دارت مكياج خفيف، و حمزة لبس كوستيم فالازرق و ميسم كسوة فالرمادي طويلة بالكمام مع طالون و صاك فالكحل و نزلو للقاعة، كانو أجواء كلاسيكية بإمتياز، أضواء خفيفة تتزين المكان فرقة اوركيسترا تتعزف أجمل المقطوعات و ليكوبل كاين فيهم اللي تيرقص و كاين اللي جالسين مع بعضهم و مع الثلج تيطيح برا كان الجو زوين بزاف، خداو هوما واحد بلاصة جلسو مع بعضهم و طلبو ماكلتهم و بقاو تيهضرو على دوك الأجواء و تيستحضرو الذكريات ديالهم، كانت زوينة بزاف، نسمة كانت ساهية فحال عادتها تتفكر فدكشي اللي وقع، مشا بالها لديك التوحيمة اللي عند علاء فكتفو، فحالا شايفاها فشي بلاصة و ما عاقلاش، حتا فيقها من خيالها، علاء : هيهو فين سهيتي، نسمة : لا والو، علاء : صافي نساي دكشي اللي وقع و عيشي معانا دبا، نسمة : هاء فين مشات ميسم و حمزة؟ علاء : قبيلة ناضو يشطحو فين كنتي ديك الساعة؟! نسمة : آه إيوا نوضو حتا حنا، شد ليها يديها و مشاو للمنصة تيشطحو، دازت ليلة زوينة، نعسو و دوزو ديك الأيام على داك المنوال، دارو باريس كلها و تساراو فيها و تصورو حدا برج إيفل، كانت ديما نسمة تتحاول تقرب منو ولكن مكتقدرش، كانت ديما تتأنب راسها و تتحاول تخلص من داك الخوف ديالها ولكن مقدراتش، و كانت تتألم فاش تتجي تعاود ليها ميسم على دوك الليالي الحمراء اللي تيدوزو و على المتعة ديالهم و هي ما عارفاش المشكل تاع ختها، دوزو تما أسبوع و سافرو لبلجيكا و بالضبط بروكسل، و ما حجزوش ففندق ولكن ختارو جوج منازل شتوية كبيرة يدوزو فيهم العطلة ديالهم، كل ثنائي خدا منزل و كانو حدا بعضهم، حطو الحقائب ديالهم و قررو يرتاحو ديك الليلة حتال الغد و يخرجو، نسمة : علاء واخا تخرج تجيب ليا شي حاجة بغيت نوجد العشاء، علاء : را كلشي كاين شنو خصك؟ نسمة : جيب ليا الخبز، علاء : راه كاين، نسمة : جيب ليا الفواكه، علاء : راهم فالثلاجة، نسمة : لا أنا بغيت الأناناس ملقيتوش، علاء : من امتا وليتي تتاكليه؟ نسمة : وا عافاك تشهيتو جيبو ليا، علاء : واخا يا لالا هاوا غادي، خرج دغيا جابو و رجع، هي كانت باغا غير تخرجو من الدار باش تلقا راحتها فالتوجاد، كانت عازمة داك النهار تحدى خوفها و كلشي و توجد لشي ليلة زوينة عمرهم ينساوها، ساعا هو جا بالزربة قبل ما تبدا دير والو، علاء : هاوا ألالة الأناناس اللي بغيتي، نسمة : و مالك جاي دابا؟ علاء : هههه واش بغيتيني نبقا برا؟ نسمة : وا صافي عافاك خرج حتال بلاتي و آجي، علاء : باينة تحت راسك شي حاجة أنا عارفك، نسمة : وا صافي سير، علاء : واخا فيك تتجري عليا، نسمة : ههههه آه يالاه سير و تعطل شوية، علاء : حتا لين؟ نسمة : شي جوج سوايع عاد آجي، علاء : واخا يا لالة هاوا غادي، ولكن قوليلي ليا شنو باغا ديري؟ نسمة : خليها مفاجأة، علاء : ايبقا راسي ضارني، نسمة : ماشي بزاف فاش تجي غتعرف، علاء : واخا هانا غادي، خرج و هي سدات الباب وراها و بدات فالتوجاد، صايبات شليظات منوعين و گغاتان تاع الخضر و شي مقبلات غير حاجة خفيفة، و دخلات للدوش، فاش سالات دهنات عليها الكريمات معطرة و لبسات شوميز فالأسود مثير و الفوقاني تاعو شفاف و صايبات شعرها و طلقاتو و دارت مكياج مثير و أحمر شفاه غامق و شافت راسها فالمراية جات تتحمق، مشات لبيت النعاس طلقات الشوفاج باش يسخن البيت و عطراتو و دارت الشموع فوق الطبلة و عيطات على علاء، نسمة : آلو علاء، علاء : نعام، نسمة : قريب تجي؟ علاء : تنتسنا غير الأوامر من عندك أما أنا را قتلني البرد هنا، نسمة : ههههه صافي غير آجي للدار و غتسخن مزيان، علاء : يا العفريتة باينة موجدة شي حاجة، نسمة : أنت اللي بقيتي ناقص باش تكمل، علاء : اممم أنا جاي حمستيني، نسمة : واخا، قطعات و مشات حطات الماكلة اللي سخنات فوق الطبلة و شعلات الشموع و طلقات موسيقى خفيفة و تسناتو يجي، سمعات الدقان و مشات تتجري حلات عليه هو غير شافها بقا حال فمو، كانت زوينة بزاف و أول مرة يشوفها بداك اللباس، جراتو من يديه للطلبة جلساتو و حيدات عليه المونطو و تقابلات معاه، نسمة : ما فيكش الجوع؟ علاء : امم آه فيا، نسمة : إيوا مالك تتشوف فيا كول، علاء : أنت اللي وجدتي هدشي؟ نسمة : آه، علاء : تبارك الله عليك ما عندي ما يسالك.....