الحب لا يموت

الجزء 17

ميسم : لا لا واقعة شي حاجة هنا، نسمة هضري دوي قولي آش كاين، الجدة : أبنتي مالكي تتغوتي، الولاد تيبغيو بعضياتهم و بغاو يتزوجو، مدرنا حتا شي حاجة عيب، ميسم : و لكن، نسمة شوفي، شوفي فيا، قولي شي حاجة.........والو نسمة مهضرات مقالت والو، بقات غير جالسة فبلاصتها و تتشوف، و ميسم تعصبات كثر، علاء غير تيتفرج ببرود و متيدير حتا شي ردة فعل، ميسم : وا نسمة متعصبينيش متعصبينييييش هضري، حمزة : ميسم غير بشوية، ميسم : ماشي سوقك أنت، نسمة هاكي شربي الما و هضري على خاطرك.........هزات نسمة الكاس و بقات تتشوف فيه مدة و هزاتو حتال الفوق و رضخاتو مع الأرض حتا ولا كل طرف فجيه و طلعات تتجري للفوق، السي حمد : دابا شنو واقع هنا شنو هاد الحالة، نورة : شوف معا بنتك هادي ماشي حالة ديرها بنت بعقلها، السي حمد : انا انمشي نتفاهم معاها، الجدة : لا غير جلس أنت، خديجة يالاهي معايا نشوفو هاديك مالها، ربيعة جمعي داك الزاج ليمشي يجرح شي واحد........طلعو لعندها للبيت و ميسم تابعاهم، العمة : لا أنت مغاديش دخلي، ميسم : كيفاش لا؟ اندخل و أي حاجة متعلقة بأختي راها تتمسني أنا اللولة، العمة : قلت ليك لا هي لا،......دفعاتها و سدات الباب و ميسم بقات تدق حتا عيات ووالو و هي تحط ودنيها على الباب و جلسات تتصنت لهضرتهم، الجدة : آش هاد الحالة درتي محشمانا مع الناس تخلي اللي يسوا و اللي ميسواش يهضر فينا، نسمة : أنا مباغاش هاد الزواج، الجدة : و علاش كنتي فرحانة قبيلة؟.........نسمة بقات ساكتة شنو اتقول؟ كان تيسحابليا صاحبو اللي جاي يخطبني ماشي هو؟ أنا متنبغيهش هو تنبغي صاحبو؟ الجدة : ايوا سكتي دابا، العمة : هيييي صافي باراكا، سمعي انت، يسحابليك را حنا مسايقسنش ليكم الخبار، داك النهار فاش بات معانا أسامة شفت كلشي، شفتك فاش كنتي لابسة دوك جوج خويطات وهو مغمض ليك عينيك و أنت غادة معاه و فرحانة، و فاش دخلتو للبيت و أنا تنقول الرجوع الله هاوما ايخرجو و والو، باغا تشمتي بينا، نوليو حديث الناس، كلكم دكشي اللي تيعجبكم، و دابا فاش جا باغيك الحلال مباغاهش، ياك ابنت الحرام، إيوا قولي ليا لا مدرتش، قولي را مدرتي والو و بداي تصنعي البراءة، نسمة : لا اعمتي انت مفاهماش، العمة : إيوا فهميني، نسمة : أنا ممشيتش معاه بخاطري، العمة : آه زيدي لفقي فالكذوب حتا هو، الجدة : أنا اللي كنت تنقول ربيت و عرفت منربي، ساعا خرجات عليكم ديك الضصارة ديال مكم كانت مفشاكم ها كيفاش خرجتو، نسمة : متجبديش ليا ماما، الجدة : إيوا انا قلت غير اللي كاين، و شفتي، مقدرتيش تنكري، نسمة : "شنو نقوليهم؟ نقوليهم را بغا يغتاصبني؟ نقوليهم را من صغري و هو تيتعدا عليا؟ نقوليهم كيفاش باغيين تزوجوني بشخص فحالو؟" خرجات نسمة لقات ميسم حدا الباب، ميسم : نسمة مالكي، واش بصح دكشي، ولكن مفهمتش شنو واقع بالضبط؟.......مجاوباتهاش و نزلات تتجري للتحت و هي تلقا حمزة و علاء واقفين حدا الباب، مداتهاش فيهم و خرجات تتبكي، حمزة : صحبي سير تبعها متخليهاش بوحدها و الليل هذا، علاء : مسحابش ليا غتصدق هكا، كنت نتمنى تزوج بيه على أنها دير شي حاجة فحال هكاك، قلبي تيقول ليا متيقش و لكن دكشي اللي سمعت، و هي مقالتش لا ،مقالتش أنا مدرتش، حمزة عافاك يالاه نمشيو للدار راسي غيطرطق عليا، حمزة : اللي بغيتي..........السي حمد : غير سمحي لينا بزاف مكنتش تنتوقع توقع شي حاجة فحال هكا، نورة : ايوا بنتك باقي عقلها صغير آش نديرو، السي حمد : كوني متأكدة غادي يتصلح كلشي و نديرو كلشي كيفما بغينا خلي غير تفوت هاد الليلة و صافي، نورة : واخا، أنا غادة نعس، السي حمد : واخا تصبحي على خير
جمعو الروينة اللي فالدار و كلشي نعس، إلا ميسم اللي جالسة تتفكر فختها، مشات عند سيف، ميسم : سيف، سيف : نعام اختي، ميسم : نسمة مكايناش، من قبيلة خرجات و باقا مرجعات، سيف : اتكون بغات تبقا بوحدها، ميسم : و لكن را الليل دبا، سيف : اتكون عند شي صحبتها و لا مخبية فشي بلاصة حتا تهدن، سيري تنعسي و غدا را اتبان، ميسم : تصبح على خير.........ميسم :" لا ميمكنش فين اتكون مشات و اللي هذا؟ نمشي نسول مراد" ميسم : مراد، مراد : نعام، ميسم : نسمة خرجات و باقا مجات، يالاه نشوفو فينها، مراد : الليل هذا حتال غدا و نشوفو و أصلا هي بنت كبيرة را ماشي باقا تترضع صبعها، ميسم : بففف صافي.........حطات راسها على الوسادة و جالسة تتفكر، أما نسمة فكانت مشات لبيت الطاحونة اللي كانو تيتخباو فيه فاش كانو صغار، غمضات عينيها و بقات تتبكي فحال كل مرة تتحس بالظلم، داز نهار كرهات فيه الناس كلهم إلا ختها، كرهات قلبها اللي بغا شخص متيستحقش، كرهات راسها حيت هي يتيمة، حيت متقدرش تعبر و تهضر، نعسات و هي حاقدة على كلشي.........و علاء حط راسو على الوسادة و تيحس بخيبة كبيرة، كان تيتمنى أن البنت البريئة اللي بغاها تبقى كيفما هي، عقلو متيق و قلبو تيكذب كلشي، حتا واحد معارف داك الصباح كيفاش غادي يصبح، و شنو ايتبدل فحياتهم كثر .