الحب لا يموت

الجزء 20

نسمة : شنو قال؟ ميسم : قاليك اما فلاصال ولا حدا البحر، هانا تنتسناه يسيفط ليا البلاصة، نسمة : البحر، فين تلاقينا أول مرة، ميسم : هاوا سيفط الموقع، يالاه سيري أنا هنا حتا تسالي و صونيلي، نسمة : واخا......خرجات نسمة و توجهات للاصال، 'كان قالينا حمزة هو مكانش عاجبو هدشي ديال الشركات و التخربيق، ولكن على قبل باباه قرا فهاد المجال، كان الحلم ديالو تكون عندو صال ديال الرياضة، و فاش سالا قرايتو فتحها و ولا تيمشي ليها فاش متتكونش عندو الخدمة، تنتصور الشكل ديالو كيفاش غيكون، هادي هي البلاصة' كانت لاصال زوينة من برا و باين عليها شي حاجة زوينة، كانت غتحط الطونوبيل و هي تسبقها واحد البنت و خدات ليها البلاصة 'بففف كيفاش هدشي ياك أنا كنت قبل منها' نزلات منها واحد البنت زوينة بزاف، كانت رقيقة و طويلة شوية، عينيها خضرين و شعرها زعر فايت كتافها شوية، بيضة و حروفها زوينين و باينة فيها البراءة، كانت لابسة حوايج رياضية و طالقة شعرها و باينة لاباس عليها، دخلات ديك البنت للاصال، حطات نسمة طونوبيلتها حداها و تبعاتها، كانت لاصال كبيرة و فيها الناس تيترينيو، الآلات فكل بلاصة و الموسيقى مطلوقة و كاينين الحمامات و مطعم صغير و صالة ديال الرقص و الديكور ديالها واعر، بقات تتقلب بعينيها على علاء حتا حسات بشي يد تحطات عليها، دارت لقات واحد الولد : السلام ختي ياكما خصك شي حاجة باش نعاونك؟ نسمة : واش كاين مول لاصال؟ الولد : واش تتسولي على السي علاء؟ نسمة : آه آه هو، الولد : رآه تيتريني فالجهة الأخرى ولكن لبغيتي تسجلي نقدر نعاونك، نسمة : لا شكرا انا بغيتو هو.....مشات للبلاصة فين وراها داك الولد كانت فالجهة الأخرى من لاصال كانو فيها بيبان ديال الزجاج تيطلو على المسبح و معلقين فيها الخناشي ديال البوكس و بان ليها علاء تيلعب البوكس و تيضرب بحر جهدو و شعرو فازك بالعرق و نازل ليه على وجهو و لابس تريكو بلا كمام و تيبانو يديه مفتولين أول مرة تشوفهم، بقات غير تتفرج فيه من البعد، خدات نفس عميق و جمعات الشجاعة ديالها و مشات باش تواجهو، يالاه زادت خطوة و هي تسمع شي بنت تتعيط ليه، دارت تشوف شكون و هي تلقاها ديك البنت الزعرة ديال قبيلة، هو غير شافها خلا كلشي و مشا لجيهتها تيجري و داز من حدا نسمة بلا ميشوفها ولا ينتبه واش هي كاينة أصلا، طارت عليه بتعنيقة و تتبوسو و هو مزير عليها و طاير بالفرحة و تيقوليها غير توحشتك توحشتك، نسمة بقات غير واقفة مصدومة من دكشي اللي تتشوف "صافي؟ الدور ديالي هنا غيوقف، قول كنتي غير مدوز بيا الوقت بينما جات حبيبتك، ولا كنتي دايرني ختك وانا حسبتك شي حاجة، بالحق سري هذا أنا اللي مطيحة بكرامتي و جايا حتال عندك" كان قلبها تيضرب و حاسة بغصة فقلبها و هي تتقول هاد الهضرة مع راسها، مسحات دمعة على خدها و مشات تتجري باش تخرج و هي تساطح مع واحد السرباي كان هاز صينية اتاي و كان سخون تكفح عليها و طاحو الكيسان فالأرض و كلشي دار تيشوف حتا علاء و فاش شافها تصدم : نسمة! البنت : شكون هادي، علاء : شهد بقاي هنا أنا جاي.....السرباي : ياكما تحرقتي اختي سمحي ليا مشفتكش....نسمة بان ليها علاء جاي و هي تنوض من بلاصتها و خرجات تتجري، "مفيا اللي يتواجه معاه ولا يسولني شنو كنتي تديري تما وعلاش جيتي، ناااري اتاي حرقني" هو شافها خارجة و تبعها : فين مشات هاد البنت دبا، و شنو جابها لتما أصلا، باينة جات على قبلي، ولكن علاش هدشي اللي بغيت نعرف......خرجات و تتقلب على السوارت ديال الطونوبيل و ملقاتهمش : تفوو فين غنكون طيحتهم، علاء : نسمة تسناي.....نسمة : ناااري شافني.....خلات الطونوبيل و مشات تتجري و هو تابعها وسط الناس، وكان أسرع منها قبطها من يديها، علاء : تسناي مالكي هربانة، نسمة : مهرباناش، علاء : الله الله و شنو كنا تنلعبو شفارا و بوليس؟ نسمة : شنو بغيتي مني علاش تابعني، علاء : أنت اللي تابعاني، شنو كنتي تديري فلاصال؟ نسمة : والو، مكنتش عارفة را ديالك أصلا، علاء : وشكون قاليك را ديالي أصلا، شوفي بجوجنا عارفينك جيتي لعندي، كنتي باغا شي حاجة قوليها، نسمة : ما باغا نقول والو، علاء : راسك قاسح، نسمة : وأنت أناني و متكبر و عاجبك راسك، علاء : زيدي زيدي خرجي، بفففف أنا غنديك على قد عقلك، نسمة : شنو سحاب ليك راسك آش تكون فملك الله، علاء : والو غير عبد فقير، واش تحرقتي، نسمة : مسوقكش سير قابل شغلك، علاء : أنت هي شغلي دبا، نسمة : آه آه تيقتك......شد ليها راسها بين يديه و بقا تيشوف فعينيها، هي قلبها قرب يسكت، علاء : المهم خصني نمشي دبا تهلاي فراسك.......شافتو غادي تيبعد و قلبها باقي تيضرب، مكرهاتش كون غير بقا حداها، كون غير جلسو تيتناگرو و ميمشيش و يخليها، باينة راجع لعندها، رجع عند حبيبتو، اوووف نسمة شنو تتخربقي عاود، عاد قبيلة مكنتيش حاملاه و شوف دبا الهضرة اللي تتقولي.....