الحب لا يموت

الجزء 52

العدول عاود السؤال مرة أخرى و فاش ما جاوباتوش قال : السكوت علامة الرضى، علاء حس بيها ماشي هي هاديك شد ليها فيديها و شاف فيها و تبسم، عطاهم العدول يسنيو حتا هوما، شدات الستيلو و يدها تترعد و سنات، العدول : اعلنكما زوجا و زوجة، مبروك عليكم، علاء بلا ميحيد الزيف على وجهها باس ليها راسها و جبهتها و قاليها فودنيها : مبروك علينا، و تسمعو الزغاريد و جا كلشي تيسلم عليهم و علاء و حمزة تعانقو و باركو لبعضياتهم و ميسم جات عند ختها تتعنقها و تبوس فيها ما قاداها فرحة، نسمة فاتها شوية الخلعة و ضحكات و دوزو ديك العشية من أجمل ما يكون، ما وصل داك الليل و مشاو الضياف حتا كانو مسهوتين بالخصوص نسمة باغا غير امتا تنعس، غير بدلو حوايجهم طاحو دودة .
الصباح نسمة حلات عينيها تتكسل، طلات على ميسم ما لقاتهاش بقات تتفكر فين غادي تكون، عاد تفكرات راهم تزوجو دبا و باينة غادي تكون خرجات مع حمزة فالليل ولا الصباح بكري، رجعات السينتة شوية اللور و جاتها غريبة أنهم مزوجين دبا، دبا علاء ولا راجلي؟ قالتها مع راسها و هي تضحك، حيت هاد الكلمة فشكل، ناضت دخلات دوشات و لبسات عليها بينوار و خرجات و هي تصدم بعلاء قدامها، علاء : صباح الخير، أمراتي، نسمة : صباح النور، قرب منها و باسها فحنكها و هي تزنكات، علاء : وآش تتحشمي مني؟ نسمة : لا، غير، مزالا ممولفاش جابليا الله فحالا غير تنحلم، علاء (خشا يدو فشعرها و طلقو ليها و هو يهبط على كتافها و عينيها) : تتحمقيني انسمة، تنتسطا عليك والله، نسمة : حتا أنا، "بغات تبدل الموضوع" نهبطو نفطرو؟ علاء : مالكي مزروبة؟ نسمة : لا غير، جاني الجوع و صافي، علاء : واخا أنا نسبقك حتا تلبسي و لحقي عليا، نسمة : واخا .
فاش كانت نازلة تلاقات فالدروج مع الحاجة مينا، نسمة : صباح الخير اخالتي، الحاجة مينا : صباح النور العروسة ديالنا، كيصبحتي؟ نسمة : الحمد لله اخالتي و انت، الحاجة مينا : بيخير ابنتي، إيوا قولي ليا كيف دوزتو الليلة كلشي مزيان؟ نسمة : الحمد لله نعست مزيان، الحاجة مينا : مفهمتينيش يمكن، زعما مع راجلك، واش ما وقع والو؟ نسمة (عاد فهمات قصدها) : لا كنا عيانين، الحاجة مينا : إيوا على خاطركم دكشي بيناتكم، إيوا يالاه نفطرو، نسمة : واخا، هبطو تجمعو على الطبلة كانت غير هي و عائلة علاء، حمزة و ميسم مشاو لدار حمزة مع والديه، و نسمة بقات بوحدها، فاش سالاو الفطور الحاج و الحاجة و شهد خرجو يجيبو شي حاجة من المدينة و علاء جاه شي شغل مزروب خرج دغيا و نسمة بقات مع الخدامات فالكوزينة، بغات تعاونهم و لكن مخلاوهاش بحجة هي مولات الدار دبا و نيت مزالا عروسة، بقات شادة معاهم الهضرة واحد السويعة، من بعد صونات لسيف هضرات معاه باش تعرف خبارهم قاليها را الدار كلها تقلبات فاش ساقو ليهم الخبار ما خلاو فين مشاو السي حمد قرب يتسطا، نسمة بقا فيها الحال بزاف الواحد ما تيعرف قيمة الواحد حتا تيفقدو، ولكن دبا فات الفوت و سالا كلشي ما بقا تيهمها والو، فاش سالات معاه الهضرة قالت آرا نتسارا فالدار نعرف كاع القنات فيها، بقات تدور من قنت لقنت من بعد خرجات للجردة و من الجردة خرجات قدام الباب، كانو قدامها غير المناظر الطبيعية، دارت على الدار و هي تبان ليها واحد الفيرما كبيرة و حداها إسطبل تاع الأحصنة و شي جنانات، من الفضول مشات تطل على الإسطبل بانو ليها الأحصنة كل واحد فبلاصتو و تياكلو، حتا حسات بشي واحد وراها دارت لقاتو صهيب : سمحيليا ياكما خلعتك، نسمة : لا لا، أنا اللي سمح ليا جيت لهنا بغيت غير نشوفهم و صافي، صهيب : لا مكاين حتا مشكل بالعكس خودي راحتك، نسمة : ديال من هدشي كامل؟ صهيب : ديال السي الحاج عبد الصمد، نسمة : آه تبارك الله هدشي زوين، صهيب : إلا بغيتي تشوفيهم غير دخلي ما كاين مشكل، نسمة: بصح واش نقدر ندخل؟ صهيب : بالطبع......دخلات للإسطبل و بقات تتشوف الأحصنة و تتقيسهم كانو زوينين بزاف، صهيب فديك اللحظة عاد تفكر فين شافها ولكن معرفش واش هي ولا ختها، بغا يسولها و بقا متردد، حتا زعم قال يسولها ما غادي يخسر والو، صهيب : اممم ختي نسمة ممكن نسولك إلا ما كان عندك حتا مشكل؟ نسمة : وي سول، "تيليفونها تيصوني" سمحليا خصني نجاوب : آلو علاء، علاء : حبيبة شنو تديري؟ نسمة : والو غير كنت تندور هنا و صافي، علاء : وجدي راسك أنا شوية و نجي نخرجك، نسمة : واخا و متعطلش عليا، علاء : واخا، نسمة : سمحيليا خصني نمشي، صهيب : آه بالسلامة .
طلعات نسمة بدلات و تسنات علاء حتا جا ركبو فالطونوبيل حتا وصلو للمدينة و مشاو لواحد المطعم لقات فيه ميسم و حمزة مشات تتجري عندها عنقاتها و جلسات حداها، نسمة : الخايبة توحشتك فين كنتي، ميسم غمزاتها زعما حتال من بعد و نعاود ليك، جاب الجرسون الغداء كلاو و خرجو تيدورو نسمة و ميسم القدام و موراه حمزة و علاء.....