الحب لا يموت

الجزء 31

نسمة : هانتي ميسم جمعي ليا حوايجي معاك انا غادي نقاد الدوش و فاش تساليو آجيو، ميسم : واخا *دازو 5 الدقائق* نسمة : وجدتي ليا منلبس؟ ميسم : آه هاوما، نسمة : واش تضحكي عليا ولا شنو، ميسم : لا علاش مالكي، نسمة : و شنو هادو؟ سوتيانات فالغوز ياكما باقا تنرضع صبعي را قريب نكمل 21 عام، و بيجاما ديال هيلو كيتي، ناااري حرام عليك، حيدي انا عارفا شنو انلبس، فينهوما هادوك الكوحل المشبكين، و مغديش نلبس بيجاما شوفي معايا شي كسيوة زوينة ولا شي حاجة، ميسم : نسمة شوفي فيا، نسمة : اممم، ميسم : أنت راكي غير اتهضري معاه ماشي غدوزو نوي غوج، خخخ والله حتا فتي الحب من لهيه انت را العقل مشا ليك، نسمة : العقل مشا ياكي، إيوا لاكان مع علاء غير خليه يمشي معندنا منديرو بشي عقل، ميسم : هههه هبيلة، زيدي دوشي بعدا و حتا تخرجي و نشوفو ليك متلبسي، نسمة : حتا هذا حل واخا، شهد يالاهي حتا انت، شهد : واخا.....دخلو بثلاثة بيهم حيدو حوايجهم و بقاو تيعومو فالما سخون و و تيديرو الكريمات و الشومبوانات هادي تنفع هادي ضر حتا دازو عليهم كاملين، سالاو لبسو بينواراتهم و خرجو، ميسم : هانتي انا غادي نلبس بيجامتي و انت خليك هكاك انا و شهد نقلبو ليك فالحوايج، نسمة : واخا.....بقاو تيقلبو فالحوايج هادي تصلاح هادي لا حتا نزلو داك الماريو كامل فالاخير لقاو اللبسة اللي تجي، ميسم : هايا اللبسة لقيناها و دبا آجي ندوزو لشعرك ووجهك، نسمة : ولكن مديروش ليا شي حاجة معيقة، ميسم : متخافيش، شهد : انا نصايب ليك الميكاب تنعرف ليه مزيان، ميسم : و انا نقاد ليك شعرك، نسمة : شهد آجي نسولك، شهد : وي سولي، نسمة : واش علاء متيعجبوش الميكاب؟ شهد : ماشي متيبغيهش غير تتعجبو البساطة و صافي، تتعجبو المرأة تكون على طبيعتها باش نهار تدير المكياج تتبان واعرة بزاف، و متيبغيش داك الميكاب المعيق اللي تيلفت الأنظار فهمتي، و حتا فاللباس متيعجبوش اللباس يكون معيق، نسمة : و هاد اللبسة كيف جاتك؟ شهد : زوينة، متخافيش ميقول عليها والو بالعكس اتعجبيه بزاف انا متأكدة، نسمة : نتمنى، ميسم : أنا ساليت ليك الشعر، شهد و انا ساليت ليك المكياج، بقات لينا غير اللبسة هاكي لبسي، نسمة : بغيت نشوف راسي كيجيت، ميسم : لبسي و شوفي راسك مرة وحدة، نسمة : واخا......كانت الكسوة فالكحل حد الركبة و الكمام و الكول ديالها طالع، لبسات معاها ليبا موس فالكحل مشبكة و طالون فالكحل و شعرها جمعاتو ذيل الحصان، أما الميكاب دارت ليها شهد ايلاينر رقيق و مسكارة و كحل و أحمر شفاه خفيف و مدارت ليها والو فالبشرة ديالها حيت هي أصلا بيضة و صافية، تقابلات مع المراية و عجبها راسها، كانت زوينة بزااف، نسمة : جيت زوينة ياكو، ميسم: الحبيبة ديالي تتحمق، جيتي فنة، ولكن عرفتي شي حاجة مختلفة فيك اليوم، نسمة : شنو هي؟ ميسم : الفرحة باينة على وجهك، الحب زوين ياكي، نسمة : آه بزاف، شهد : ليوما خويا يتلف على القبلة، نسمة : ناااري غير سكتي رجلي تيترعدو من الخلعة، ميسم : غير مديريش فبالك و كلشي أيكون مزيان، نسمة : نتمنى، ولكن حتا نتوما لبسو شي حاجة باش منبقاش غير بوحدي، ميسم : بصح زيدي حتا حنا نقادو، شهد : أنا خصني نلبس حوايج الخروج حيت انمشي، عندي شي حوايج شريتهم لبارح فاش كنت مع سيف را بقاو فالطونوبيل انا نمشي نجيبهم، ميسم : غير بقاي انا نسيفط شي واحد يجيبهم ليك، شهد : واخا شكرا، عرفتي نتوما لاطاي ديالكم زوينة كلشي عندكم هو هداك، ماشي فحالي شوفي، ميسم : علاش أنت مالكي شنو ناقصك، كلشي فيك زوين، شهد : مشفتينيش كيف دايرة، رقيقة بزاف و معنديش الصدر، نسمة : حتا انت آش غديري بيه غير صداع الراس هانا زعما مطفراه، شهد : انت بعدا على الأقل علاء ايلقا فيك ميدار انت عارفا الرجال شنو تيعجبهم، نسمة : ناااري متقوليش علاء، صافي أصلا أنت عند طاي مانكان عرفتي شحال من وحدة تمناتها و ملقاتهاش، و الرق ديالك زوين ماشي خايب، اللي يسمعك تتهضري هكا يقول هادي غير شي خيبوعة، أنت تبارك الله الزين منك تيقطر شكون عندو هاد العينين و هاد الشعر و هاد الضحكة، ميسم : وي بصح نسمة عندها الحق، شهد : شكرا طلعتو ليا المورال فهاد الصباح، *الدقان* نسمة : ناااري يكون جا زعما، نسمة : هههههه را غير كلثوم جابت الحوايج من الكوفر، شهد : لا صافي انت ساليتي معايا، نسمة : متديوش عليا......ميسم و شهد ختارو حتا هوما اللبيسات و المكياج اللي يديرو و قادو راسهم، ميسم لبسات سروال كحل و شوميز فالباج كتافها مشبكين و طلقات شعرها مع مكياج خفيف أما شهد فلبسات سروال جينز مع تريكو فالبيض و فيه كتابة فالكحل و جاكيت جينز و سبرديلة و كاسكيط فالبيض و مكياج خفيف، وقفو ثلاثة بيهم قدام المراية و جاو تيحمقو، شهد : مع هاد الأناقة كلها ضروري منديرو شي سيلفي، نسمة : هههه ضروري......بقاو تيتصورو حتا سمعو صوت طونوبيل، شهد : علاء جا، نسمة : ناااري قلبي قلبي، ميسم : يالاهي نهبطو، نسمة : غير سبقوني انا انتبعكم، ميسم : عنداكي تعطلي، نسمة : لا متخافيش......