الحب لا يموت

الجزء 45

ميسم : حبيبة صباح الخير، نسمة : حياتي صباح النور، ميسم : شفتك فرحانة فحالا موقع والو لبارح، نسمة : آه فرحانا، لقينا الحل، علاء قاليا العشية غادي يجي يهضر مع بابا و فاش يجيو والديه من فرنسا فالعطلة غادي نتخطبو رسميا، ميسم : ناااري حلفي واش بصح، نسمة : والله، ميسم : ياااااي أفضل حاجة ممكن توقع يا سلااام، نسمة : يا ربي يدوز كلشي على خير قولي آمين، ميسم : يا ربي آمين، أنا نطلع ليك الفطور فطري و نجلسو نهضرو مزيان فهدشي، نسمة : واخا.......فاش سالاو الفطور ديالهم جلسو تيهضرو حتا طلعات عندهم عمتهم : نسمة لبسي و يالاهي معايا، نسمة : فين اعمتي؟ العمة : زيدي و باراكا من الهضرة الزايدة، ميسم : سيري معاها بلا متجادلو الصباح هذا، نسمة : واخا انا نلبس و نجي.......لبسات و خرجات معاها مشاو للمدينة، وقفات قدام الطبيب و نزلو، نسمة : علاش اعمتي جينا لهنا؟ العمة : حتا ندخلو و تعرفي........دخلو مشاو لعند طبيبة نسائية و نسمة ما فاهمة والو، الطبيبة : حيدي حوايجك و نعسي هنا......حتا سمعات هاد الجملة عاد فهمات الفلم كامل، العمة : يالاه طلقينا دغيا تضيعي لينا الوقت، الطبيبة : بلا ما تخافي ما كاملاش عشرة دقائق دغيا، العمة : إيوا ما ديرش ماتخافش، نسمة : حتال هاد الدرجة وصلات بيكم الحقارة؟ كيفاش عطاتك نفسك ديري هدشي؟ واش أنا بنت ليك بنت الزنقة؟ واش بنت ليك خارجة الطريق؟ شفتي غير بلا متسناي مني نبغي حيت أنا اللي عارفا راسي شنو تنسوا و عارفا راسي شنو درت و شنو  ما درتش، أنا غادا فحالي، العمة : ماشي أنا باك اللي بغاها........غير سمعاتها قالتها تحجرو ليها الدموع فعينيها، حتال هاد الدرجة مكتيقش فبنتك؟ لدرجة أنك باغي دير ليها فحص العذرية؟ واش ذنبي هو أنني بغيت شخص من قلبي حب طاهر ماشي حب مصلحة ولا شهوة ولا نزوة؟ مقدراتش تزيد دقيقة تما دفعات الباب و خرجات تتجري معارفاش فين المهم تهرب من ديك البلاصة، داوها رجليها لدار علاء، دقات الباب و تسنات ما حل حتا واحد، دقات و دقات ووالو، بقات تتغوت بسميتو قدام الباب ولكن مؤكد ما كانش تما، معندهاش حتا التلفون باش تعيط عليه يجي، معرفاتش شحال داز ديال الوقت عاد سمعات صوت شي واحد طالع فالدروج، هزات راسها لقاتو حمزة : نسمة مالكي ياك لاباس، نسمة : فين هو علاء، حمزة : راه غير يبلاصي الطونوبيل و يجي، أنا نحل ليك الباب دخلي بعدا بينما يجي......دخلها و جاب ليها الما شربات و هو يدخل علاء، غير شافها فديك الحالة لاح السوارت و مشا جلس حداها بغا يعرف شنو واقع، علاء : صافي أحمزة الله يحفظك اصاحبي إلا بغيت شي حاجة را نعيط ليك، حمزة : واخا أنا نخليكم بوحدكم،مشا حمزة و بقاو بوحدهم و هي تعنقو و بدات تتبكي و هو مزير عليها باغي يعرف مالها و ضارو خاطرو عليها، علاء : نسمة شنو دارو ليك قولي ليا، علاش تيبكيوك علاش، شوفي فيا عاوديليا متبقايش غير ساكتة، نسمة : علاش متيبغيونيش علاش، علاش مكيتيقوش فيا، علاء : انا تنبغيك أكثر من أي واحد، أنا تنتيق فيك أكثر من راسي، متيهمش شنو تيقولو، عافاكي صبري غير شوية هدشي كلو ما غاديش يبقا غادي يولي غير ماضي، غادي نتزوجو و نعيشو غير حنا بجوج، و نولدو وليداتنا و نربيوهم أنا و ياك، و غادي نخليك أسعد وحدة فهاد الكون، عمر الدمعة ما تعاود تنزل من هاد العوينات "باسها فيهم"، نسمة : ولكن علاش تيديرو ليا هكا علاش؟ علاء : شنو دارو؟ نسمة : داتني عمتي ليوم للطبيب باش تجيب ليا شهادة العذرية، علاء (وقف من بلاصتو معصب) : كيفاااش؟ لا لا هدشي بزاف هدشي را فات الحد والله، يالاهي دبا غادي نمشيو نهضرو معاه، إلا كان هكا دبا نجيب العدول نتكاتبو و نتهناو من هدشي، را ميمكنش لينا نبقاو هكا واخا عائلتك ولكن منسمحش ليهم يديرو ليك هكا، انت أطهر بنت شفتها فحياتي كيفاش عطاتهم نفسهم يديرو هكا، نوضي دبا غادي نمشي نهضر معاه، نسمة : واخا
وصلو قدام الدار شد ليها فيديها حتا وصلو، دق و بقاو تيتسناو داز داك الوقت فحال أعوام، حلات ربيعة الباب و دخلاتهم و هي تلاقاهم عمتها فالباب : هاي هاي هاي، قول كنتي مع صحيبك، عادي راكي مولفة ولا لا، غير بلاتي يا بنت الحرام باغا تديري لينا الشوهة ياكي، السي حمد : جات ديك بنت الحرام، و شكون جايبا معاك، علاء : عمي بغيت نهضر معاك، السي حمد : تهضر معايا هيه، زيد دخل نيت را عندي شي هضرة نقولها ليك، خديجة طلعيهم للفوق منبغيهمش يجيو، العمة : هي اللولة، طلعاتها لبيتها دفعاتها و سدات عليهم، ميسم : نسمة شنو واقع؟ عاودات ليها و جلسو تيتناقشو فدكشي و تيقلبو على حل، و معارفاش شنو تيهضر علاء مع باباها لتحت، طلبات الله يتسالا هدشي على خير و سلام، و بقاو تيتسناو الباب يتحل يعرفو غير شنو واقع ولكن والو بقاو هكاك حتا داهم النعاس .