الحب لا يموت

الجزء 12

ركبو و ديماراو الطونوبيل و زادو، علاء تيسوق و نسمة حداه طالقة الأغاني على حر جهدهم و تتغني و تشطح معاهم، و حمزة اللور متبع الطريق بعينيه و ميسم حاطة يديها على وجهها و ساهية فيهم، وصلو لواحد البلاج خارج شوية على المدينة بلاصاو الطونوبيل و نزلو للرملة، نسمة : ياااااي يا سلام توحشت البحر، ميسم : حتا أنا، اجي نقوليك، نسمة : نعام، ميسم (تتهضر بشوية) غنعومو ولا لا؟ نسمة : علاش حنا علاش جايين أصلا؟ ميسم : و باش غتعومي؟ نسمة : متجيش نعومو حداهم بالمايوه ياك، ميسم : تجي معيقة، نسمة : بففف كنت باغا نعوم، علاء : عومي شكون منعك، نسمة : بسم الله الرحمن الرحيم خلعتيني، علاء : أنت قلتيها بالجهد بغيتيتي منسمعكش؟ سيري عومي الجو زوين و البحر نقي و مكاينش بنادم بزاف، نسمة : لا صافي بلاش، علاء : واش مكنتيش معولة تعومي ولا شنو، نسمة : باش غنعوم؟ علاء : علاش مكنتيش دايرة بحسابو قبل متجي؟ نسمة : كنت و لكن......علاء : نااري تتفقصي، ولكن شنو؟ نسمة : متجيش نعومو قدامكم بالمايوه، علاء : شنو شنو قلتي، علاه أنت باقا تتلبسي داك العجب؟ نسمة : آه علاش؟ علاء : هداك خليه لبنات ست سنين و لا لدوك السفريطات اللي متيحشمو متيرمشو، انت بنت داركم دكشي ميليقش ليك، نسمة : صافي غير بلاما تعصب، بالناقص من شي عومان، علاء : لا عومي مقلناش ليك لا، غير لبسي شي حاجة مستورة و زوينة، نسمة : مجبتش معايا، علاء : و هادو اللي لابسة؟ نسمة : لا هاد الكسوة تتعجبني مبغيتهاش توسخ، علاء : نااري راسك قاسح، صافي سيري عومي نسمة : لا مبغيتش، علاء : مبغيتيش، نسمة : اه، علاء : صافي انت اللي بغيتي، نسمة : شنو تدير، أويلي نزلني فين غادي، لا علاااء لا البحر لا مبغيتهاش تفزك معندي باش نبدل.......هو هازها تيضحك و هي تتغوت و لا حياة لمن ينادي، لاحها فالما و هي ناضت تتغوت و هو هرب و خلاها تما، خرجات من الما و بقات تابعاه و هو هارب منها، نسمة : علاء وقف حشومة عليك درتي ليا هكا، علاااء حبس باراكا "ناااري ضحكتو زوينة ولكن غير بلاتي اسي علاء و الله لبقات فيك" علاء : ههههه باش تعلمي تعكسي مزال، نسمة : صافي را بعدنا عليهم بزاف يالاه نرجعو، علاء : حلفي مديري شي حاجة، نسمة : مندير والو، علاء : لا حلفي، نسمة : و الله، علاء : صافي زيدي، نسمة : حرام عليك فزكت كلي، علاء : الحال سخون دغيا ينشفو حوايجك، سنسلة ديالك زوينة، نسمة : آه........لقاتها خرجات و رجعاتها تحت حوايجها، علاء : باينة من شي شخص عزيز، نسمة : بزاف، منين كنت صغيرة كانت عطاتني ماما وحدة و ميسم وحدة، كان كلشي تيخالط بيناتنا و فاش ولينا تنديروهم عاد ولاو تيفرقو، من داك النهار و هي فعنقي منقدرش نحيدها، علاء : اه و ماماك فيناهي دبا كاعما شفتها، نسمة : ماتت فاش كنا صغار، علاء : آه سمحيليا، نسمة : معليش، علاء : ميسم و حمزة تيهضرو خلينا نجلسو هنا منقاطعوهمش، نسمة : واخا، وأنت فيناهي عائلتك؟ علاء : انا عائلتي كلها ففرنسا، نسمة : و شنو اللي خلاك تجي لهنا؟ علاء : نقلب على عائلتي، نسمة : كيفاش مفهمتش؟ علاء : أنا فاش عقلت على راسي كانو هادو هما عائلتي، حتا كبرت و قالو ليا راهم غير تبناوني، ماما مكانتش تتولد، فاش يأسو تبناوني و دازو ست سنين و هي تحمل، و حيت أنا فحال ولدهم مقدروش يتخلاو عليا، و جات ختي للدنيا، و كبرت معاهم انا حسبتهم عائلتي و هوما حسبوني واحد منهم واخا عمامي و جدي مكانوش باغييني فاش تولدات ختي حيت غنتقاسم معاها الورث ولكن هوما مفرطوش فيا، نسمة : آه مكانتش فخباري، و دبا ختك عارفاك ماشي خوها الحقيقي؟ علاء : اه، و فاش عرفات دارت حالة هههه بغاتني نكون خوها بصح، خصكي تعرفي عليها نيت نتوما تتشابهو حتا هي بكاية فحالك، نسمة : انا ماشي بكاية، اجي ولكن كيف غدير تلقا عائلتك الحقيقية؟ علاء : من نهار عرفت الحقيقة و أنا باغي نعرف شكون عائلتي، سولت الواليد و عاود ليا كلشي، الملجأ منين جابوني و وراني الوراق ديال التبني ديالي، أنا هادي خمس سنين و أنا تنقلب، لقيت داك الملجأ كان تحرق و سدوه، قلبت حتا لقيت المدير ديالو اللي كان فوقتي، قاليا را كاع الوثائق ديال الأطفال اللي كانو تما تحرقو، و سيفطني عند واحد الراجل كان خدام تما فداك الوقت قاليا را يقدر يكون عارف شي حاجة، شحال و أنا تنقلب عاد لقيتو حيت كان تحول من ديك المدينة مشا لمدينة أخرى، المهم فاش لقيتو قاليا را بقاو شي وثائق فلتو من الحريق ديال شي دراري و لكن هو معارفش فينهوما حيت المدير اللي عارف دكشي اللي نجا من الحريق فين تسيفط، رجعت باش نمشي عند المدير و كلي أمل أنني نلقا شي وراق دياولي نعرف على الأقل غير كيدرت حتا وصلت لتما، نعرف غير واش عائلتي حية ولا لا، ولكن للأسف فاش رجعت لقيت المدير مات، و حتا واحد من غيرو مكان عارف بلاصة دكشي، من داك الوقت لدابا باقي موصلت لوالو، هادي عاماين و أنا معارف حتا جديد بخصوص هاد الموضوع، و باقي عندي أمل أنني شي نهار نلقا عائلتي، نسمة : القصة ديالك مؤثرة و الله، مكانش يحسابني مدوز هدشي كامل، علاء : اه و لكن عادي، باقي متشبت بداك الأمل لعل شي نهار نلقا طرف الخيط اللي يوصلني ليهم .