الحب لا يموت

الجزء 27

دورات الخزنة و هي دير طق، ولكن متحلاتش "إلا كانت غادي تحل من أول مرة غير من الأفضل ميديرش ليها الكود، شنو يكون هاد الكود زعما؟ تاريخ ميلادو؟ نن متنضنش هو ماشي مكلخ تال هاد الدرجة، اممم، أيكون شي تاريخ مهم، ولا شي رقم عندو علاقة بشي حاجة" هزات ورقة و ستيلو و جلسات تتجرب فالاحتمالات و هي عارفة را إمكانية تعرف الكود فحالا تتقلب على نملة وسط الصحراء، بقات بقات حتا عيات "بففف حتا انا بلا عقل، عارفاها مغتحلش و مضيعة وقتي معاها" بقات تتبقش فالمجورا و هي تلقا واحد الألبوم ديال الصور، حلاتو و لقات فيه تصاورو فاش كان صغير، بقات تتموت عليه بالضحك حيت كانو حنيكاتو مطبزين و فمو حمر و واخا هكاك كان تيبان كيوووت.....سمعات الساروت تيدور فالباب و هي ترجع دكشي بالزربة لبلاصتو و خرجات من البيت تتجري لقات علاء قدامها : هانا رجعت ياكما تعطلت عليك، نسمة : اه لا لا متعطليش بالعكس جيتي بكري، علاء : أنا اندخل ندوش و نجي، نسمة : اه واخا.......دخل علاء للدوش و هي بقات جالسة حتا تتحس بشي ضربة خفيفة على راسها، هزات عينيها و لقاتها ميسم : إذن انت هنا و أنا تنقول شكون هاد صحبتها اللي اتبات عندها، نسمة : اااه، ميسم : شوفي فيا، مالكي هاد الأيام ماشي هي هاديك، نسمة : ممليش، ميسم : قوليليا شنو اللي مقلقك، واش أنا؟ نسمة : لا، ميسم : يعني انا اللي قلقتك، نسمة : صافي خليني، ميسم : لا قوليلي مالكي، نسمة : نقوليك مالي! واخا، أنت ألالة غير تعرفتي على ديك شهد نسيتيني، وليتي تخرجي معاها و تفكري فيها هي اللولة و تعاودي ليها، هادي هي انت حقا راك صحبتي قبل متكوني ختي و عمر شي وحدة تجي فبلاصتك و انت حبي اللول و اللخر و بلا بلا على الخوا، هايا فأول فرصة مبقيتش كاع فين تنبان ليك، ميسم : اي يخليلي اللي تيغير، را بصح انت حبي اللول و اللخر ولكن عاود زدتي فيه، انا قلت شهد تولي صحبتنا بجوج و نبقاو نخرجو و نتوانسو معاها، نسمة : انت عارفا علاش متتعجبنيش، ميسم (عنقلتها) : صافي سمحيلي و الله بلاصتك ميقدر يعمرها شي واحد متصوريش هاد اليومين بلا بيك حسيت بقلبي ماشي معايا، نسمة : متبقايش تقلقيني على والو، ميسم : عويناتي و الله منبقا نعاود، قوليليا آش درتي مع سي علاء لبارح، بقيتو بوحدكم آ، نسمة : هو بات مع حمزة و انا بقيت فالدار بوحدي، بلا متحمسي على والو، ميسم : اووف كنت تنتسناك تقولي شي حاجة، نسمة : للأسف، ميسم : أنا و حمزة ولينا مع بعضياتنا، نسمة : شنوووو فوقاش و علاش و كيفاش طرا، ميسم : اعترف ليا قاليا تنبغيك، قلت ليه حتا انا، و صافي، نسمة : و بصح تتحسي من جيهتو بشي حاجة ولا ،ميسم : اه و الله تنبغيييه عاد عرفتها، نسمة : و كيدرتي عرفتيها؟ ميسم : فاش تنكون حداه تنكون أسعد وحدة فهاد العالم، فاش تيصوني ليا ولا تيوصلني من عندو ميساج تنحس بقلبي غيطير، فاش تنكون معاه تنحس باللي الوقت حبس، متنكرهش ندوز حياتي كلها غير معاه، نسمة، الحب زويين و الله، نسمة : شهيتيني، ميسم : علاش انت متتبغيش؟ نسمة : آه ولكن، شوفي نتوما كلشي عندكم ساهل، اعترف ليك و انت كذلك ووليتو مع بعضياتكم، أما حنا، معرفتش شنو حنا، معرفتش شنو واقع و شنو توقع، تنكون معاه متنفهم والو، ميسم : و أنت تتبغيه، ميسم : تنبغيه و سكتي، تنموت عليه والله، لقاليا دبا نتزوجو نقوليه جيب العدول و قرا الفاتحة، ولكن هو، معرفتش، مبغاش يتفهم ليا، ولكن حسن يبقا هكا، حيت لا شي نهار شييي نهار منعرف كيف غيطرا و يجرى و يبغي يعترف ليا غنسخف ليه من قوة الفرحة، علاء : و حنا مبغيناكش تسخفي....دارو بجوجهم فدقة وحدة لقاوه متكي على الباب و تيتصنت ليهم، ميسم بقات غير حالة فمها و نسمة مصدومة، و السي علاء جالس تيشوف فيهم و راااشقة ليه، ميسم : امم تعطلنا خصنا نمشيو للدار دبا، نسمة يالاه....جراتها من يديها و خرجو بلا مينطقو بكلمة، نسمة : ويلي تشوهت قدامو، لا صافي هادي هي اللخرة ليا، واش فمي تياكلني، ميسم غيكون سمع كلشي ياكي، ناااري كيغاندير نشوف فيه، والله الوجه اللي يشوفو مرة أخرى مكاينش، ميسم : هههههه، نسمة : تضحكي، واش تضحكي بصح منيتك، لا والله حتا تضحك، واش انا هنا غنموت بالفقصة و الخلعة و كلشي مخلط عليا و أنت تضحكي، ميسم : وا انت مشفتيش راسك ديك الساعة تبلوكيتي، نسمة : ولكن مضحكيش، ناااري شافني و سمع كلشي، تفضحت قدامو، منكرهش الأرض تشق و تبلعني و لا هاد الحالة، ميسم : هانتي فكري بإيجابية شوية، ربما هادي فرصة باش طرا بيناتكم شي حاجة، ربما حتا هو معترفش ليك غير حيت ممتأكدش واش تتبادليه نفس الإحساس ولكن دبا غيتأكد، نسمة : غيسحابليه راني غير معشوقة فيه، مبغيتهاش توقع بهاد الطريقة، نبقاو كيفما حنا حسن ليا من هاد الحالة، ميسم : و أنت زعما ممعشوقاش فيه، عينيك تيفضحوك احبيبتي غير العمى اللي ميعرفكش تتبغيه، نسمة : حتال هاد الدرجة، ميسم : و كثر كاع، نسمة : اوووف كتزيدي تكملي عليا بهاد الهضرة، ميسم : ركبي بعدا حتال الدار و نهضرو......