الحب لا يموت

الجزء 41

رجعو اللور و تغطاو و نعسو على بعضياتهم حتا ضرب فيهم الضو ديال الصباح، كانت الشتا حبسات بعدا، علاء : نسمة، نسمة فيقي، نسمة (تتحل عينيها) : علاء، صباح الخير، فين أنا، علاء : أنت فدارك أحبيبة نوضي وجدي لينا الفطور باش نمشي نخدم، نسمة : شنو ! اينا فطور، علاء : ههههه بسم الله عليك ابنتي، نوضي جمعي شعرك و غسلي وجهك و يالاه نخرجو نقلبو على شي واحد يخرجنا من حريرتنا، نسمة : سير عليا أنا تنهضر نيشان و أنت تتفلا، علاء : وا بلا تقلاق غير تنضحك معاك يالاهي....ناضت غسلات و جمعات شعرها و خرجو من الطونوبيل و بقاو غاديين فديك الحرارة تيتسناو غير يبان ليهم شي واحد يسولوه، نسمة : علاء عييت، علاء : خصنا نكملو را مبقاش بزاف، نسمة : لا منقدرش نزيد كثر، بلاتي غير نستاراحو شوية و نكملو، علاء (تحنا ليها) : طلعي، نسمة : اويلي، علاء : طلعي أنا نهزك حتا ترتاحي و نهبطك، نسمة : لا لا حشومة، علاء : اويلي على حشومة عوتاني، زيدي طلعي و هنينا، نسمة : ههههه ناااري عمري نسا هاد النهار.......هزها فوق ضهرو و بقاو ماشيين حتا بان ليهم من بعيد واحد البيكوب جاي حتا وصل ليهم و هو يوقف، علاء : السلام أعمي، عافاك را سكتات لينا الطونوبيل و معرفناش فين حنا واخا توصلنا للطريق، السيد (سميتو علي) : أنا طالع للدوار نقربكم شوية و را ميبقاش ليكم بزاف على الطريق، و إلا بغيتو يالاه للدوار تشربو و كولو و ارتاحو حسن ليكم، علاء : نسمة شنو بان ليك نطلعو؟ نسمة : واخا نرتاحو شوية و ربما نلقاو شي واحد يوصلنا ولا يورينا الطريق، نيت أنا عييت، علاء : واخا، طلعي.......طلعو و بقاو غاديين حتا وصلو للدوار و مشاو مع السي علي لدارو كان هو و مراتو رقية و بنت كبيرة سميتها أميمة و ثلاثة خوتها صغار، كانو ناس ضريفين بزاف عطاوهم الماكلة و الشراب و ضايفوهم أحسن ضيافة، السي علي : شوف اولدي هنا فالدوار را الريزو مكاينش، و الطريق بعيدة إلا بغيتو شي واحد يوصلكم تسناو ولدي أنور رآه يجي فالليل را تيسوق الكاميو فاش يكون غادي سيرو معاه، علاء : مكاينش شي واحد يوصلنا دبا؟ مبغيناش نبقاو حتال الليل، السي علي : لا والو متلقاش، علاء : ايوا معندنا منديرو، نسمة خلي حتال الليل و نمشيو، نسمة : ناااري كون راهم مشوشين علينا، علاء : وايييه غير الله يخرج هدشي على خير و صافي، رقية (مرات السي علي) : واش نتوما مزوجين؟ علاء : لا لا هادي ختي و كنا تندورو حتا تلفنا على الطريق، نسمة (مع راسها) "ختك، انا غنوريك اسي علاء ختي كيفاش دايرة" رقية : آه ايوا قول هكاك، تبارك الله عليها فنة، نسمة : ربي يخليك اخالتي، سمحيلينا صدعناكم معانا، رقية : وا لاواه متقوليش هكا، الضياف مزيانين و نتوما معليكمش حالة التكرفيس، أميمة، نوضي ابنتي عطي للبنت شي حاجة تلبسها، نسمة : بلاش اخالتي، رقية : بدلي عليك و ارتاحي بينما جا أشرف يوصلكم، أميمة : يالاهي معايا....مشات نسمة معاها للبيت عطاتها گندورة لبساتها و جلسات تتهضر معاها، كانت بنت ديال العروبية التفكير ديالها محدود ولكن ضريفة، أميمة : سميتك أول مرة نسمعها، نسمة : آه متيسميوهاش بزاف، نسمة و ميسم، أميمة : شكون هذا؟ نسمة : هههه هادي ختي سميتها ميسم انا و ياها توأم، أميمة : واش بصح، و تتشابهو؟ نسمة : آه تنتشابهو فكلشي، أميمة : و دبا شنو تدير؟ نسمة : معرفتش كون راها مخلوعة علينا، أميمة : سعداتك خوك زوين، نسمة : شكون خويا، أميمة : علاء، نسمة : آه آه، رقية : أميمة جيبي معاك البنت و آجي تاكلو، أميمة : واخا أ مي هانا جايا، آجي ناكلو، نسمة : واخا.......تجمعو على الطبلة حطو كاسكروط كانت العشية ديك الساعة و بقاو تيهضرو، السي علي : ايوا آ السي علاء قولينا فاش خدام، علاء : فواحد الشركة، خدام مهندس و عندي نصيب فيها، السي علي : هي تتخلص مزيان، علاء : الحمد لله، السي علي : و متتفكرش تزوج؟ علاء : فالحقيقة معرفتش، رقية : ايوا خود ليك شي بنت البلاد تكون حادكة و زوينة و تربي ليك ولادك و كلشي، شوف بنتي تبارك الله كبرات غا فالعروبية و تتعرف دير كلشي، علاء : متنفكرش دبا، رقية : ايوا شنو مزال تتسنا، ديرني فحال الواليدة ديالك و سمع ليا، بنات المدينة تيكونو خفيفات و فيهم قوة التشراط، علاء : يكون خير اخالتي......."الدقان" حلو و هو يدخل أنور : السلام عليكم، رقية : أهلا ولدي، على سلامتك.......دخل جلس معاهم كلا و تعرف على علاء و نسمة، أنور : أنا را محال نمشي هاد الليلة، سمعت قبيلة فالراديو را الجو غيتبدل و غتكون الشتا مجهدة و يمكن يطيح حتا الثلج نتوما عارفين هنا را الجبل و الجو ديالو هو هذا، نسمة : ولكن.....علاء ميمكنش ليا نبقا كثر، غتلقاهم مشاو للبوليس و غيموتو بالخلعة عليا، علاء : عارف و لكن معندي مندير، أنور : را إلا كان الجو شوية مزيان غنمشي مكانش را منقدرش نغامر، شحال ديال الكسايد وقعو هنا غير بسباب الجو، علاء : سمعتي السيد معندو ميدير لينا، رقية : ديري هادي فحال داركم، باتو معانا و فاش يسحا الجو تمشيو، نسمة : ولكن.....، علاء : نسمة صافي سكتي........