الحب لا يموت

الجزء 61

نسمة دارت ليها طن فراسها، نسمة : خالتي أنا شايفة داك الخاتم من قبل، نجاة : فين فين شايفاه؟ نسمة : فحالو شفتو عند علاء، نجاة : واش متأكدة هو نفسو؟ نسمة : فحالو تيشبه ليه بزاف، نجاة : قوليلي واش علاء عندو شي توحيمة فكتفو؟ نسمة : آه آه فكتفو ليمن، نجاة : ولدي، نسمة : شنووو كيفاش، نجاة عرات على كتفها فنفس البلاصة عندها نفس التوحيمة، نسمة : هي نفسها اللي عندو، يعني علاء هو ولدك اللي خداوه ليك؟ نجاة : هو هو حسيت بيها من اول مرة شفتو حسيت بشي حاجة من جيهتو، دبا متأكدة أنه هو، نسمة (مزال ما استوعبات) : واش بصح اخالتي، نجاة آه آه، نسمة : بقا مقدرتش نتيق كيفاش ممكن توقع شي حاجة فحال هكا، خالتي أنا غادي نعيط لسيف نسولهم فين وصلو، نجاة : عافاكي قوليليهم يلقاوه دغيا، نسمة : واخا.....صونات نسمة لسيف، نسمة : آلو سيف واش كاين شي جديد؟ سيف : عاد هضرت معاه غير دبا جاوبني فالتلفون، نسمة (بلهفة) : واش بصح؟ شنو قاليك؟ سيف : والو ما بغاش يقول لينا فين هو، عاد كنت غادي نصوني ليك نقولها ليك، نسمة : شوف ضروري خصك تلقاه ولا تهضر معاه، دير أي حاجة، سيف : عيينا معاه ووالو، نسمة : صافي أنا غادي نهضر معاه راسي، سيف : صافي.....بقات نسمة تتصوني تتصوني حتا جاوب، نسمة : آلو علاء، علاء : شنو بغيتي؟ نسمة : شوف سمع غادي نقوليك جوج كلمات و لبغيتي ديك الساعة تقطع قطع، علاء : قولي يالاه، نسمة : لقيت عائلتك، علاء : شنوووو؟ نسمة شوفي إذا كنتي غادي تستغلي نقطة ضعفي باش تجيبيني راكي تديري أكبر غلطة، ما غادي نتهنا حتا نلقا هذاك الشماتة و ناخد منو حقي نوريه، نسمة : و الله متنكذب عليك، شوف أنا عند خالتي نجاة آجي و غادي تعرف كلشي، علاء : صافي بقاي تما هانا جاي، ولكن إذا كانت كذبة عمري ما نسامحك، نسمة : تيق فيا، علاء : صافي.......نسمة : هاوا غادي يجي، نجاة : الله يا ربي الحمد لله و الشكر الله، نسمة : آلو سيف شوف آجي دبا للدار أنت و صهيب دبا دبا، سيف : امالكي آش واقع؟ نسمة : حتا تجي و تعرف......."الصونيت" نسمة : انا غادة نحل......سيف دخل هو و صهيب غير جلسو و هو يدق علاء، نسمة : هاوا جا هاوا، نجاة : عافاك خليني نحل انا، نسمة : آه اخالتي، فاش حلات الباب جات عينها فعينو بقات تتأمل فيه مدة، شدات وجهو بين يديها و دموعها سالو، نجاة : ولديييي، تلاحت عليه عنقاتو و تتبكي و هو باقي ما مستوعبش شنو واقع، نسمة ما قدراتش تحمل الموقف بقات تتبكي حتا هي، و سيف و صهيب غير تيشوفو براسهم ما فاهمينش القصة، جلسو كاملين و عاودات ليهم نجاة كلشي من الأول و علاء بقا مصدوم، هضرات ليه على الخاتم ووراتو ليه فالصورة و قالت ليه حتا على التوحيمة، و هو غير تيشوف مزال ما ميز هضرتها، مدة عاد باش تلاح عليها تيعنقها و دموع الفرحة فعينيه.......من بعد جلسو مجموعين و بقات نجاة تتعاود ليه على خوتو 3 لاخرين، وراتو تصاورهم و هضرات ليه على كل واحد فيهم، كانت فرحتو كبيرة بزاف، و اخيرا عرف اصلو و تلاقا بالمرأة اللي عطاتو الحياة و كانت سبب فأنه موجود....نجاة : جلس اولدي هضر أنت و مراتك حشومة تبقاو مخاصمين، علاء : صافي اخالتي ما فيا منهضر دبا، نجاة : ماماك أنا ماماك، علاء : مزال ما ولفت هههه، مزال حتا ما ستوعبت هدشي، كلشي طرا بالزربة، نجاة : كون ما كانت نسمة كون عمرنا نتلاقاو، نسمة قلب كبير و انت راجلها و سندها فالحياة، ما طولوش المخاصمة، كلشي تيتصلح، ولا ياكما ما بقيتيش تتبغيها؟ علاء : لا لا تنبغيها، نسمة (ضحكات) : حتا أنا تنبغيك، عافاك فهمني و قدر الوضع، خلينا نساو كلشي و نبداو صفحة جديدة، علاء : ما غادي نتهنا حتا نلقاه و ناخد حقي منو، نسمة : ربي غادي ياخدلي حقي عاجلا أم آجلا، غير خليها على الله، علاء : كيفاش خلاك تعيشي هكاك هاد المدة كاملة؟ ماشي حرام! فوقما تنتفكر دكشي تنتعصب، نسمة : علاء واش ما تايقش فربي؟ علاء : تايقة بالطبع، نسمة : إيوا صافي نسا، نسا كلشي و خلينا نبداو من جديد، غير حنا بثلاثة، علاء : حنا بثلاثة؟ شكون حنا؟ نسمة (حطات ليه يدو على كرشها) : ولدنا ولا بنتنا، علاء : ولكن......كيفاش واش حاملة؟ نسمة : آه، علاء : واش بصح بصح؟ نسمة : بصح، علاء : هي دبا انا غادي نولي أب، و حتا أنا غادي يكون عندي وليد صغير نبقا نديه معايا للجامع، ولا فنكوشة صغيرة نبقا ندلعها و نعسها معايا، نسمة واش بصح، نسمة : آه آه، علاء ناض تينقز من الفرحة و شدها باسها من يديها و عنقها و تصالحو، أخيرا تهناو و تحل المشكل، هي عنقاتو و بقات تتبكي، ما عرفها فرحانة حيت تصالحو ولا مقلقها الحمل، عنقها و خلاها تتنخصص عليه، دازت ليلة زوينة بزاف، عاودات ل ميسم كلشي خلاتها غير تتشوف، و علاء هضر مع الحاجة مينا و الحاج عبد الصمد و فرحو بزااااف، شهد اللي بقا فيها الحال غارت عليه حيت حسات باللي ما بقاش منهم صافي لقا عائلتو و غادي يخليهم .