الحب لا يموت

الجزء 26

علاء : اوووف هدشي اللي كان ناقص، شنو انديرو دبا معندي كيندير نوصلك للدار......دار لقاها تتبكي، علاء : نسمة مالكي، واش تتبكي حيت غوتت عليك? سمحيليا ولكن را غير خفت عليك را كيفما منبغيش شي واحد يقيس ليا شهد منبغيش اللي يقيسك حتا انت، نسمة : يااااا شهد شهد شهد من الصباح، انا مالي و مال شهد، و أصلا بإينا حق تغوت عليا، علاء : واش مشفتيهش بغيتيني نخليك معاه؟ لاكان حتا دبا باقي الحال نرجعك لعندو، نسمة : اه حتا هذا نظر، رجعني لخويا، علاء : واش تيهروك عضامك فهاد الليل ولا شنو؟ نسمة : بقا ليك غير ضربني، ديرها حتا هي و كمل على أجرك، علاء : لا انا ماشي شماتة باش نضرب بنت، ولكن كبري عقلك معايا حتا انت، نسمة : اااه يعني انا عقلي صغير ياك هدشي اللي بغيتي تقولو، علاء : لا مقلتش هكاك ولكن، نسمة : ولكن شنو، علاء : واش انبقاو نتجادلو فهاد الخلا و نصاصات الليل دبا؟ نسمة : حتا انا بغيت نمشي للدار ديني للدار، علاء : مشفتيش الطريق مقطوعة معندنا كينديرو نمشيو، و الشتا ميمكنش نمشيو على رجلينا، صوني عليهم قوليليهم راكي مع صحبتك و غدا نجيبك لهنا، نسمة : معنديش شي صحبتي نبقا معاها، علاء : بقاي فالدار عندي، نسمة : شنوو، علاء : أنا نبقا مع حمزة و انت خودي راحتك فاادار، نسمة : و بغيتيني نكذب عليهم؟ علاء : عندك شي حال آخر؟ نسمة : بففف صافي .
دكشي اللي دارو عيطات نسمة و قالت ليهم را غتبقا عند شي صحبتها و مشاو للدار عند علاء، علاء : هانتي ديري فحالا داركم هادي اللي بغيتيها ديريها، انا غادي تصبحي على خير، نسمة : و أنت بخير.......مشا علاء دق على حمزة : علاء، ياكما خصك شي حاجة؟ علاء : طالب ضيف الله، حمزة : هههه دخل اصحبي.....دخلو و جلسو تيهضرو، حمزة : ياكما عندك شي مشكل نعاونك؟ علاء : هههه لا غير كنا خارجين انا و نسمة و لقينا الطريق لدارهم مقطوعة و مقدرتش نخليها بوحدها و قلت ليها تجي تبات عندي، حمزة : اه بون، ايه مرحبا بك عندي متحتاجش تشاور را دارك هادي حتا هي، احم احم احم، علاء : مالك، حمزة : شفتك هاد الأيام مكاينة غير نسمة على فمك آش تم، علاء : والو علاش، حمزة : اممم الله يجعلني نتيق، علاء : علاش شنو ايكون؟ حمزة : زعما والو والو؟ علاء : منعرف نكذب عليك، آجي حتا انت و ميسم شفتكم مواتيين، هااا؟ حمزة : حنا بعدا مصارحين بعضياتنا، أنت اللي باقي دايخ غير بوحدك، علاء : إيوا مبروووك على صحبي، حمزة : الله يبارك فيك عقبال ليكم، علاء : وا دبا انا را براسي مفهمتش و الله، مرة منكرهش نبقا غير حداها، مرة تتعصبيني حتا تنبغي نطرطق، مرة تتكون فرحااانة و فدقيقة تتقلب، مرة تنشوفها تتقرب ليا، و مرة تتبعد بزااف، مرة تتجيني فحالا تتبغيني، و مرة فحالا غير أصدقاء و صافي، مفهمتش و الله، حمزة : و انت؟ علاء : أنا شنو؟ حمزة : أنت متتحس من جهتها بوالو؟ علاء : معرفتش، تتعجبني آه، و منكرهش نبقا غيير تنتصنت لهضرتها، فاش وقع دكشي مع أسامة قربت نموت معرفتش محملتهاش فديك الوقت، ولكن غير شفتها من بعد تبدل كلشي، حمزة : عرفتي شنو، راك عارف الأسبوع الماجي خصنا نمشيو لفرنسا على قبل الخدمة، سير خدم ليك شوية و هدن راسك و كلشي تيجي مع الوقت، علاء : نسييت را غنمشيو ناريي، ميمكنش إلا ممشيتش؟ حمزة : ميمكنش اصحبي الخدمة، علاء : وايييه، يا ربي يحبس الوقت فهاد السيمانا، حمزة : هههه تسطيتي اصحبي، اه و أسامة را غيجي حتا هو لهنا يقابل الخدمة فبلاصتنا، علاء : أسامة عاود، حمزة : صافي اصحبي انا غير قلت، آجي واش مفيكش الجوع؟ علاء : لهلا يوريك من الغداء مكليت........*الصونيت ديال الباب* علاء : واش تتسنا شي واحد؟ حمزة : كومونديت بيزا، علاء : الله و أخيرا ناكلو، حمزة : و نسمة ميكونش فيها الجوع؟ علاء : را من الفطور مكلات عاد كنت تنفكر فيها، حمزة : ايوا دي ليها اصحبي حشومة تبقا بالجوع، علاء : واييه......هانا نمشي دغيا و نجي، حمزة (غمزو) : خود راحتك، علاء : إيوا الله يمسخك......مشا تيدق عليها ووالو متتجاوبش حتا تخلع، حل الباب بالسوارت و لقاها ناعسة فالصالون بحوايجها، علاء : باينة اتكون عيات......حط الصينية فوق الطبلة و حيد ليها صباطها و هزها داها لبيتو حطها فوق الناموسية غطاها و حتا كان خارج و هو يسمعها تتهضر : بقا معايا، علاء : نسمة واش فقتي؟ نسمة : بقا حدايا، علاء : واخا هانا حداك، مشا جلس حداها و بقا تيشوف فيها و تيتلمس فشعرها و هي ناعسة فحال الملاك حتا تأكد راها نعسات عاد رجع عند حمزة لقاه حتا هو نعس و مشا للصالون نعس فوق الفوتوي حتال الصباح .
فاقت نسمة الصباح لقات راسها فبيتو عاد تفكرات شنو وقع لبارح، غسلات وجهها و خرجات من البيت و هي تلقا صينية فيها الفطور و ورقة مكتوب فيها *صباح الخير المشعككة، أنا مشيت لاصال حتال وقت الغذاء عاد انرجع، مكرهتش نجي نلقاك باقا فالدار.......علا* قراتها و عاودات قراتها و عاودات و عاودات حتا حفضاتها و فكل مرة تتقراها تضحك على ديك المشعككة، فطرات و بقات تدور فالدار، مشات لبيتو و حلات الماريو ديالو و بقات تتشوف حوايجو و الساعات اللي عندو و العطور ديالو كلشي عندو زوين، حلات الجهة الأخرى و هي تبان ليها واحد الخزنة بالأرقام، دوراتها و هي دير طق........