الحب لا يموت

الجزء 40

نسمة : تنسمعك، علاء : امممم واش ضروري تعرفي، نسمة : علاء واش تتخبي عليا؟ ياك قلنا منخبيو على بعضياتنا والو؟ علاء : واخا واخا، معرفتش منين نبدا، نسمة : بدا منين ما بغيتي، علاء : المهم هانتي، هادي مدة كان اتصل بيا شي واحد، عارف كلشي عليا، قاليا رآه عارف عائلتي و غيعاوني باش نلقاهم، و بغا الفلوس فالمقابل، و أنا مقدرتش نبقا جالس مندير والو، صافي هدشي ما كاين، نسمة : و فين مشيتي قبيلة؟ علاء : عطيتو الفلوس، نسمة : و قاليك شي حاجة؟ علاء : اممم مزال، نسمة : واش منيتك اعلاء، واش فلوسك شايطين عليك؟ و إلا كان غير شي واحد تيتفلى؟ و علاش طلقتيه بلا ميقوليك والو؟ علاء : نسمة أنا بغيت نعرف عائلتي، هو قاليا نحط ليه الفلوس فواحد البلاصة من بعد غيعاود يتصل بيا، نسمة : حتا أنا بغيتك تلقا عائلتك، ولكن، ولكن أعلاء ماشي أي واحد قاليك شي حاجة تمشي، را ماشي كاع الناس فحالك، بنادم را قلبو خايب، و تيشوف غير المصالح تاعو واخا يكون على حساب الناس، علاء : إلا جات غير الفلوس را هانية، ولكن را غير احتمال أنني ممكن نلقا عائلتي أهم من ديك الفلوس، نسمة : علاء را تنخاف عليك، تصور الله يستر تكون شي عصابة ولا شي حاجة، را يشدوك حتا واحد ميجيب ليك خبار، علاء : بفففف والله معرفت شنو ندير، يمكن عندك الحق تسرعت شوية، ولكن تستحق نحاول على الأقل مغديش نبقا نقول كون غير مشيت ربما كنت نلقا شي حاجة، نسمة : عافاك متبقاش تخبي عليا، علاء : سمحيليا را مكنتش باغي ندخلك فهاد الشي، بغيت نخليك بعيدة على المشاكل ديالي، نسمة (قبطات ليه فيديه) : أنا معاك فكلشي، فالخايبة و الزوينة، أنا عارفة حتا أنا لو كنت فبلاصتك مكنتيش تخليني، ياك ولا لا؟ علاء : على شكون عندو فحال هاد الملاك و يخليه، اجي نرجعو دبا للدار و نخليو هاد الحريرة تال من بعد، كون راهم مشوشين عليك، نسمة : ناااري نسيتهم، تلقاهم مخلوعين عليا، علاء : ايوا يالاهي.....مشاو للطونوبيل ركبو و ديماراو، زادو شوية و لقاو طريق وحدة تتخرج، بقاو غاديين فيها حتا لقاو راسهم فطريق ديال اتجاه واحد، علاء : معرفت هاد الطريق فين تتخرج، نسمة : عنداك نخرجو فشي بلاصة متنعرفوهاش، علاء : بانت ليا الطريق مزيانة، فاش نلقاو شي خرجة را نخرجو منها، اصلا معندنا كيف نديرو نرجعو غير يالاه، نسمة.واخا.....بقاو غاديين مدة طويلة حتا نعسات نسمة و هو خلاها مبغاش يفيقها......كانت الطريق خاوية، و الظلام، و الشتا خيط من السما محبساتش، بقا غادي مدة عاود حتا حس براسو بعد بزاااف و لكن مكان عندو فين يرجع، و ملاحضش باللي را تسالا ليه ليسانس حتا حبسات بيه الطونوبيل، عيا معاها باش ينوضها ووالو، بقا تيتسنا يدوز شي واحد يعاونو و لكن والو كانت الطريق خاوية و الليل غير هوما اللي تم، شاف حتا عيا و رجع للطونوبيل، نسمة : وصلنا؟ علاء : فقتي؟ نسمة : آه، فين حنا؟ واش باقا الطريق طويلة؟ علاء : تسالا ليا ليسانس، خصنا شي محطة باش نعمرو، نسمة : ايوا يالاه نمشيو ليها، علاء : مبغيتش نخلعك ولكن....أقرب محطة بعيدة ب 12 كلم، و مكاينش الريزو هنا، أصلا حتا إلا كان را التلفون طفا ليا، و من قبيلة و أنا تنتسنا على الله يدوز شي واحد ووالو، نسمة : و شنو انديرو دبا؟ أنا مجبت معايا والو، علاء : معرفتش، ضروري منلقاو شي حل، نسمة : و عارف هاد البلاصة بعدا؟ علاء : فالحقيقة لا، معرفتش هاد الطريق فين تتخرج، معرفت شنو ندير، نسمة : علاء فيا البرد، علاء : آه أنا نشعل ليك الكليم، ياكما جاك الجوع؟ نسمة : شوية، ولكن نقدر نصبر، علاء : عندي شي حاجة فالكوفر أنا نجيبها و نجي، نسمة : واخا.....خرج جاب دكشي و رجع، علاء : بلاتي واحد الحاجة، نسمة : شنو، علاء : حنا دبا فينا الجوع ياكي و ماشي الوقت باش تشرطي اللي كانت كوليها و صافي، نسمة : علاش مالي تشرطت عليك، علاء : لا غير قلت ليك، و حاجة أخرى، غادي تاكلي بالسكات الضحك ممعاناش، نسمة : ههههه دبا منين قلتي ليا مضحكيش عاد جاني الضحك، يالاه أ السي علاء طلقنا را جاني الجوع، علاء : هاكي.......شدات الميكة حلاتها و بدات تتقلب حتا طاحت عينيها على واحد الحاجة و بدات تضحك تضحك تضحك حلفات لا سكتات، علاء : هادي هي مضحكيش، صافي مال سيريلاك ماشي ماكلة.......نسمة : هههعههععع علاء واش بصح تتاكل هدشي، ههههههه نااااري صدمتيني فيك، علاء : تيعجبني، أصلا سيريلاك بنين و تيعطي الطاقة، نسمة : هههههه لا صافي دبا جبتي ليا التمام، علاء : صافي كولي و سكتي، أري نخلط ليك و كولي إلا فيك الجوع، نسمة : ناري نتا عالام والله، علاء : لا اجي دبا غير بيني و بينك! واش ماشي بنين؟ نسمة : وا هو بنين ولكيييين، علاء : ايييوا صافي هانتي قلتيها، هاكي كولي و نعسي حتا يطلع النهار و نشوفو شنو نديرو فحريرتنا......نسمة : اجي نوكلك، دير ااااه، علاء : بقا ليك غير ديري ليا الرياگة و تهناي، نسمة : أصلا أنت فحال شي بيبي صغير، شوف شحال زويون، علاء : عارف عارف، نسمة : ميغركش زينك، علاء : ايوا غير بيني و بينك، أنا ماشي زوين؟ نسمة : ناااري عرفتي فاش تلاقينا تاني مرة حدا البحر، كنتي تتهضر فحال هكا محملتكش جيتيني عاجبك راسك بزاف، علاء : معرفتش شحال من واحد قالها ليا، ولكن والله حتا تنتعامل عادي، و دبا غير بيني و بينك تنضحكو عادي، نسمة : عادي أنا عجبتيني كيفما أنت، زوين و ضريف و قلبك بيض، و تتبغيني، ياك بعدا، علاء : حميمقة شكون هذا اللي ميبغيش وحدة فحالك، قطيوطة، نسمة : عويناتي أنت، علاء : يالاه نرتاحو شوية و غدا يحن الله.