الحب لا يموت

الجزء 57

وصلو للكلينيك فين ناعس لقاوهم جالسين كلهم تيتسناو، غير شافوهم جات شهد تتجري عنقات نسمة و بقات تتبكي، شهد : نسمة اهئ اهئ بابا مريض اهئ اهئ، معرفت شنو ندير، نسمة : تهدني عافاكي متبكيش، قوليلي شنو وقع ليه، شهد : معرفتش كنا جالسين حتا طاح وقع كلشي دغيا مفهمناش شنو واقع، اهئ اهئ غير الصباح كان صحة و سلام، نسمة : و شنو قال الطيب، شهد : مزال ما قال لينا والو، نسمة : عافاكي متبكيش ميكون غير الخير، جلسو تيتسناو الطبيب حتا خرج تجمعو عليه كاملين تيتسناوه شنو يقول، الطبيب : السيد راه حسن دبا، الحمد لله منين جبتوه بكري كون تعطلتو غير شوية ما كانش يعيش، علاء : شنو عندو بالضبط؟ الطبيب : الضغط ديالو ارتفع بزاف، كون بقا شوية كان ممكن يطرطق ليه عرق فراسو، ولكن دبا الحمد لله را خرج من حالة الخطر، فاش قالها ارتاحو بعدا شوية، بقاو تيتسناو حتا حل عينيه و خلاهم الطبيب يشوفوه واحد بواحد، اطمأنو عليه و رجعو للدار بقات معاه غير الحاجة و شهد، دخلو نسمة و علاء للبيت هو تلاح نيشان فالفراش و غطا راسو، نسمة شافتو ما مرتاحش فمرة، مشات حداه حطات يدها عليه، نسمة : بلا ما دير فبالك را سمعتي الطبيب شنو قال، عمي غادي يبرى إن شاء الله و يولي صحة و سلام، دير أملك فالله، هز راسو شاف فيها، علاء : نسمة أنت عارفة معنديش من غيرهم، هوما عائلتي و كلشي بالنسبة ليا، إلا وقعات لشي واحد فيهم شي حاجة والله حتا نحماق ولا نتسطا ولا توقع لي شي حاجة، نسمة : عارفة عارفة غير رخف على راسك عافاك، علاء : آجي حدايا، مشات تخشات حداه عنقها و حط راسو على صدرها و بقات هي تتلعب ليه بشعرو حتا نعس.......الغد فالصباح بكري فطرو و مشاو عندو للكلينيك لقاوه حل عينيه و حالتو تحسنات على قبل، دازو 4 أيام قاليهم الطبيب را ممكن يخرج، رجع للدار بقاو مقابلينو و الدوا فالوقت و نسمة بقات معاهم دوك الأيام كلها و ما جاتهاش الفرصة فاش تخبر علاء بالحمل ديالها، كانت مرة مرة تتجيبها الدوخة و تتمشي ترض ولكن حتا واحد ما نتابه ليها كان كلشي مقابل السي عبد الصمد، داز أسبوع تحسنات الحالة ديالو بفضل الله و رجع مزيان، ديك الليلة كانو هوما فبيتهم علاء شاد التلفون و نسمة جالسة تتشوف فالمجلات حتا بدات تتشم ريحة القهوة، نسمة : علاء شميتي، علاء : شنو؟ نسمة : ريحة القهوة، علاء : فين هي ما شميت والو، نسمة : لا را كاينة، علاء : هههه تتوحمي عليها، نسمة : آه، "هي قالتها من نيتها و هو غير تيضحك"، علاء : إيوا إلا تتوحمي نجيبها ليك، نسمة : و تشهيت حتا لا گلاس، علاء : ههههه غتخرجي يدك من الشرجم و دخليها تلقايها تجمدات و باغا گلاس، نسمة : والله حتا بغيتو، علاء : لا واش تتهضري من نيتك، نسمة : والله، علاء : و لا لقيناه تاكليه؟ نسمة : آه، علاء : مكتفلايش، نسمة : لا، علاء : ولله حتا نديرها ليك على قد فمك، لبسي يالاه، نسمة : هههه دقيقة نكون واجدة.....لبسات مونطوها و دارت طربوش تاع الصوف و كاشكول و ليكات و لبسات ليبوط تاعها و وقفات عليه، نسمة : هانا واجدة، هز راسو فيها بقا غير معجب، علاء : لا دبا واش بصح تتهضري، نسمة : وا والله مكنتفلا، دبا قولي واش غادي تمشي ولا لا؟ علاء : هههه هانا نايض، خرجو بجوج كان كلشي نعس ديماراو الطونوبيل و مشاو للمدينة، كان الموت تاع البرد و المحلات بداو تيسدو، بقاو تيدورو تيقلبو على شي محل تيبيع گلاس و تقول واش لقاو، اللي قالوها ليه تيضحك و يبقا معجب، نسمة : صافي إلا ملقيناش غير يالاه نرجعو، علاء : لا غير نزيدو نقلبو ضروري ما نلقاو، نسمة : و إلا ما لقيناش؟ علاء : غادي نلقاو......زادو شوية و هوما يبان ليهم واحد المركب تجاري كبير، مشاو غادي يدخلو و هو يحبسهم السيكيريتي : سمحولينا ولكن را غادي نسدو، علاء : عافاك غير دقيقة ناخدو غير شي حاجة و نخرجو دغيا، السيكيريتي : سمحليا ميمكنش ليا ندخلك دبا، علاء : را المدام عندي كتوحم على لاگلاس و ما لقيناه ف حتا شي بلاصة أخرى، السيكيريتي : اممم إيوا اذا كان هكا ما عندي ما نقول دخلو غير متعطلوش بزاف، علاء : كون هاني.....غمزها و دخلو و هي تتعجب كيفاش حتا عرف راها حاملة، بقات غير كتشوف فيه، علاء : هههه دغيا تيق مسكين فاش قلت ليه كتوحم، و نيت كديري فحال الموحمات، يالاه دخلي ختاري اللي بغيتي بالزربة و يالاه، نسمة "قل هكاك هو غير تفلا على السكيريتي باش يخلينا ندخلو و أنا تيسحابلي عاق بيا، بالحق أنا عارفة كيفاش غادي نقولها ليه ماشي دبا حتا نوجد ليها مزيان بغيتها تكون شي حاجة مميزة مكتنساش" قالت هاد الهضرة مع راسها و دخلو خدات لكلاس اللي بغات خلصوه و خرجو رجعو للطونوبيل راجعين للدار و هي تا تاكلو و فرحانة، دازت ليلة حمقة ديال الصح......علاء : نسمة ياك تتيقي فيا، نسمة : بطبيعة الحال، علاء : واعديني معمرك تخبي عليا شي حاجة، نسمة : شنو سبب هاد الهضرة دبا؟ علاء : غير بغيتك كيفما تنتيق فيك تيقي فيا حتا أنت، نسمة : حتا أنا تنتيق فيك، علاء : واعديني متكونش بيناتنا أسرار و أي حاجة تقوليها ليا، نسمة : تنواعدك......