الحب لا يموت

الجزء 49

دارت بالزربة لقاتها ربيعة، نسمة : ربيعة شنو باقا تديري هنا! ربيعة : ختي ميسم أنا عارفاكم شنو باغين ديرو، بغيت غير نسلم عليكم قبل ما تمشيو، ميسم : ولكن، ولكن شكون قالها ليك؟ ربيعة : حتا واحد، غير بنتو ليا هاد الأيام فيكم شي حاجة مختلفة و عرفتكم تتفكرو ديرو شي حاجة، ميسم : ختي ربيعة الله يخلي ليك ما عز عليك ما تقوليها لحتا واحد، شوفي حنا را والله ما نقدرو نبقاو هنا، منقدرش نخلي ختي ولا أنا نتزوجو بشي واحد ما باغينوش، ربيعة : لا لا كوني هانية حتا واحد ما غادي يسيق الخبار ليكم، نتوما فمتابة خواتاتي و ديما عاملتوني مزيان و حسبتوني وحدة منكم، أنا متفهمة مزيان الوضع ديالكم و مستحيل نوقف ضدكم، بغيت غير نودعكم قبل ما نمشي، ميسم : شكرا بزاف عمري نسا ليك هدشي، "عنقاتها" و سلمي على خالتي رحمة بزااااف و قولي ليها تسمح لينا، متصوروش شحال تنبغيوكم، ربيعة : شعور متبادل والله......جات نسمة : فين بقيتي؟ ربيعة O_O ،ميسم : متخافش را ما غادي تقول والو، يالاه سلمي عليها باش نمشيو را تعطلنا، نسمة : بالسلامة اختي غادي نتوحشك بزاف، ربيعة : غادي تخليو بلاصتكم كبيرة، نسمة : ردي البال لراسك و سمحيلينا، ربيعة : نتوما اللي سمحو ليا، الله يديكم على خير، نسمة و ميسم : بسلامة، ودعوها و ودعو دارهم اللي كانت فيها جل ذكرياتهم، وودعو الناس اللي فيها، شافو فيها آخر شوفة و ركبو و انطلقت الطونوبيل فاتجاهها للمطار، الطريق كلها و هوما ساكتين حيت كان صعيب عليهم يرحلو بهاد السهولة، فاش وصلو توادعو مع سيف حتا هو و رجع للدار باش حتا واحد ما يشك فيه، نسمة : دبا شنو غادي نديرو؟ ميسم : دبا را قريبة 23:00 الطيارة ما غادي تجي حتال 02:00 مزال لينا 3 السوايع، غادي نمشيو نشريو القص و نديرو شي حاجة نتفرجو فيها و ها حنا تنتسناو داك الولد اللي غادي يمشي معانا، نسمة : صافي، دكشي اللي دارو خدمو واحد الفلم و جلسو تيتفرجو فالمطار و منساجمين مع الأحداث حتا وقف عليهم واحد الشاب فعمر علاء : سمحوليا بغيت نسولكم واش نتوما اللي مع السي حمزة و علاء؟ ميسم : آه، أنت هو اللي غادي تمشي معانا إذن! هو :آه هو أنا، ميسم : أنا ميسم و هادي ختي، "دارت عندها لقاتها نعسات" مسكينة عيات، هو : ماشي مشكل خليها ترتاح، أنا صهيب، ميسم : متشرفين، صهيب : الشرف ليا ^عقلتو عليه يمكن ياكو! هو نفسو صهيب اللي تلاقا مع نسمة من قبل حدا البحر^ ميسم : آجي جلس حدانا بينما يوصل الوقت، صهيب : غير خليني مرتاح هكا، ميسم : لا ميمكنش تبقا واقف غير آجي، ما لقا ميدير هو يجلس حدها و جلسو تيتفرجو حتا وصل الوقت، فيقات نسمة و هي شافتو كاعما عقلات عليه وهو تيقول را شفت شي وحدة منهم فشي بلاصة ولكن فين بالضبط معقلش، وصلات الطيارة دخلو الأمتعة و شدو بلايصهم، كانو مقطعين ليهم فدرجة رجال الأعمال كانت زوينة بزاف، نسمة غير حطات راسها داها النعاس و ميسم بقات تتقرا شوية واحد الكتاب حتا داها النعاس فحال ختها.........حسات ميسم بشي يد تتحركها باش تفيق، حلات عينيها لقاتو صهيب : را الطيارة هابطة دبا شوية غادي نزلو، ميسم : نسمة فيقي را وصلنا، نسمة : خليني نعس، ميسم (تتعيبها) : خليني نعس، وا تنقوليك وصلنا شنو بغيتيهم يرجعوك للمغرب؟ نسمة : هانا متخليو حتا الواحد ينعس على خاطرو، ميسم : صافي خليك نمشي بوحدي، نسمة : و تخليني ياكي، ميسم : ههههه غير تنضحك معاك
فاش نزلو غير شافو فرنسا نساو كاع را كانو موحشين دارهم و را  الطريق كلها و هوما مغبنين، لقاو حمزة و علاء و شهد تيتسناوهم و معاهم شي ناس، جات شهد تتجري عنقاتهم و تتبوسهم : توحشتكم توحشتكم كنت تنتسنا غير امتا تجيو، ميسم : حتا حنا توحشناك بزاااف، نسمة : ايوا لاباس عليك؟ شهد : بيخير الحمد لله و نتوما؟ داز كلشي مزيان؟ نسمة : مزيان الحمد لله، علاء : و أخيرا تهنينا من كلشي، قوليلي كيف كانت الرحلة مزيانة، نسمة : الطريق كلها و انا ناعسة هههه، علاء : النعيعيسة ديالي، حمزة : وا راكوم مصحصحين بعدا، ميسم : لا كان كلشي زوين، حمزة : شكرا اصهيب على كلشي ضربناك معانا تمارة، صهيب : الواجب ديالي حتا حاجة مدرتها بالجميل، علاء : نعرفكم، هادي الواليدة ديالي مينا و الأب ديالي عبد الصمد و خلاص شهد غنية عن التعريف، مشاو سلمو عليهم و هوما فرحو بيهم بزاف، و مامات علاء عنقاتهم و فرحات بيهم فحالا تتعرفهم من زمان، كانت لابسة جلابة فالاخضر بالسفيفة وشال بيض و كانت زوينة بزاف عاد عرفو شهد لمن تتشبه، كانت بيضا و باينة فيها زعرا غي من حجبانها و عينيها خضرين زوينين و ما باينش فيها السن بزاف كانت تتبان مزالا صغيرة، أما باباه كانو الملامح ديالو عربية الشعر و العينين كحلين و حتا هو مزال صغير كان هو و علاء مصاحبين بزاف و تيتفاهمو مع بعضياتهم و كانت عندو كاريزما ولكن ضريف بزاف، حمزة : و أنا نعرفكم هذا الواليد ديالي يوسف و الأم ديالي حسناء، و ختي الصغيرة رغد، الوالدين ديال حمزة كانو تيتشابهو شوية بحكم أنهم أولاد العم، بجوجهم عينيهم زرقين، الأم ديالو كانت بيضاء و شعرها كحل باين من تحت الفولار و كانت عاطية العين، و باباه أسمر و شعرو قهوي و حتا هوما كانو ضريفين، أما الصغيرة رغد فعمرها 7 سنين و تتشبه لباباها بزاف، ركبو فالطونوبيل و مشاو لدار علاء .