الحب لا يموت

الجزء 43

خرجو بثلاثة بيهم للغابة و علماتها أميمة كيفاش تجمع العواد و فاش سالاو رجعو للدار قابلو الغذاء حتا وجد و كلاو و خملو الدار و فالليل سخنو الما و دخلو للحمام سخنو عضيماتهم، السي علي و رقية مشاو ينعسو و علاء و أنور و أميمة و نسمة طلقو الراديو و تجمعو كاملين فالبيت تيتصنتو ليه و حداهم براد ديال أتاي و خبز الدار و زويتة بلدية، بقاو مجمعين حتال واحد الوقيتة، أنور : أنا مشيت نعس، الكل : تصبح على خير، أميمة : مزال ماغاديش تنعسو؟ نسمة : انا مفياش النعاس، علاء : حتا انا، أميمة : أنا جاني النعاس خليت ليكم الراحة، نسمة : تصبحي على خير، أميمة : و انت بخير
علاء : نسمة بغيت نسولك على واحد الحاجة، نسمة : شنو هي، علاء : عقلتي فاللول فاش يالاه تعارفنا، فاش كنا فالبحر، و حتا فاش كنتي قدام الباب فالليل، كنتي تتبكي، شنو اللي بكاك ديك الوقت؟ نسمة : فوقاش معقلتش، علاء : بدينا بالكذوبات، دبا بلا ضحك قوليليا علاش كنتي تتبكي؟ نسمة *نقوليه ولا لا؟ ولكن إلا قلت ليه يقدر يتعصب عليا، يقدر ميهضرنيش، ولا اكفس حاجة يمشي يقتل أسامة، أنا عارفاه يديرها فاش تيتعصب متيبقاش يعقل على راسو، دبا شنو ندير* علاء : وا جاوبيني دبا، نسمة : والو والو غير بكيت وصافي، علاء : متقوليش دبا؟ نسمة : وا عافاك مديرش معايا هكا، علاء : تصبحي على خير، نسمة : علاااء، وا علاء، علاء : شنو بغيتي؟ إلا كنتي بصح تتيقي فيا مغتسناينيش حتا نسولك المفروض انت غتجي عندي ديريكت تقولي ليا، نسمة : وا غير فهمني عافاك، علاء : المفروض منخبيو على بعضياتنا والو، ولكن مدمتي أنت باغا تخبي خليك على راحتك، يالاه نعسي دبا، نسمة : وا علاااء، علاء فيق، وا سمعني، دبا علاش متتجاوبش، علااااء، علاء (وقف و دار فيها واحد التخنزيرة) : مغتنعسيش دبا، نسمة : واخا واخا هانا.......
نعسات و بقات تطل عليه من تحت الفراش و هو ناعس، غمضات عينيها و بقات تتفكر و تخايل حتا حسات بيه تحرك، ناض لعندها و بقا تيعيط ليها بشوية و تيحركها حتا سحابليه راها نعسات، خرج و سد الباب وراه، بقات هي جالسة تتفكر واش تبعو ولا لا، تسنات شوية لعله يرجع ولكن تعطل، لوات عليها البطانية و خرجات من البيت تشوفو و هي تلقاه جالس قدام العتبة ديال الباب و تيشوف فالسما، بقات تتفكر واش تمشي تجلس حداه ولا لا، فالاخير رجعات فحالها تغطات و نعسات .
صبح الصباح * علاء : نسمة نوضي، را طلع النهار و الجو صفا شوية نقدرو نمشيو، وا فيقي يالاهي نمشيو، هيهو، واش متتسمعيش ولا دايرها بلعاني، نسمة حلي عينيك.....بقا شحال تيحرك فيها و تيفيقها حدها حلات عينيها و رجعات سداتهم، رقية : مالها واش مبغاتش تفيق؟ علاء : معرفتش اخالتي واش بصح ولا غير دايراها بلعاني، رقية : بلاتي نشوفها (قاست ليها راسها) : إييي السخانة طالعة ليها بزاف، علاء : ياكما ضربها البرد، كاين شي طبيب قريب نديها ليه يشوفها؟ رقية : كاين مصطفى ولكن شاد كونجي، أنور : شنو نديرو دبا خصني نمشي، علاء : نسمة شوفي فيا واش تقدري تمشي؟ نسمة : لا عافاك خليني والله ما قادرة نتحرك، علاء : ميمكنش نبقاو هنا، غير يالاه و فاش نوصلو سيري للطبيب ديك الساعة، رقية : أنا غادي نعاونها تلبس سير أنت وجد راسك باش تمشيو، علاء : واخا
لبساتها حوايج سخان و علاء لبس حتا هو و تسالمو معاهم واخا ما سخاوش بيهم و ركبو مع أنور فالكاميو القدام و مشاو، نعاس نسمة فالطريق و علاء بقا شاد فالهضرة مع أنور حتا دخلو للمدينة، أنور : خصنا نتفارقو هنا انا غادي نقلب الطريق دبا، علاء : الله يحفظك اصاحبي عاونتونا بزاف كون ما كنتوش كون رانا مجليين فشي خلا دبا، أنور : الله أودي الواجب هذا، هاك قيد عندك نمرتي حتا توصلو و صوني ليا نتهنا عليك، علاء : كون هاني.......نزلو و شدو طاكسي، علاء : دينا للطبيب عافاك، نسمة : لا غير ديني للدار، علاء : راكي مريضة يشوفك الطبيب بعدا و نتهنا عليك و ديك الساعة نديك لداركم، نسمة : لا ما بغيت لا طبيب لا والو ديني غير لدارنا، علاء : مالكي معكسة ؟ نسمة : ديني للدار، علاء : ديها أ سيدي لدارهم، وصلو قدام الباب نزلو و بقاو داخلين، دقو فالباب، شوية هو يتحل كانت ربيعة (مصدومة) : ختي نسمة فين كنتي حماقينا بالتقلاب عليك حتا عيينا، ما خلينا حتا بلاصة ما شفناها، علاء : كاينة ميسم؟ ربيعة : آه دخلو أنا نقولها ليها دغيا و نجي......مشات قالتها ليها هبطات تتجري من الدروج فاش شافت نسمة تلاحت عليها عنقاتها و بقات تتبكي و حتا نسمة مقدراتش تحبس دموعها، جا سيف كانو عينيه حمرين و مراد حتا هو و كلشي تجمع، تخلطات عليهم الفرحة و البكا و كلشي،  السي حمد كان خارج عيطو ليه ديك الساعة جا، غير شاف بنتو مشا تيعنقها، فاش سالاو جلسو.....