الحب لا يموت

الجزء 14

لبسو حوايجهم و مشاو تعشاو عند نورة، فاش سالاو العشا تجمعو كلهم فالصالون، السي حمد : المهم ليوم بغينا نقولو ليكم شي حاجة مهمة، نسمة (تتهضر مع ميسم بشوية) : شنو هاد الحاجة المهمة، ميسم : لا ميقدرش، ميقدرش يديرها، نسمة : شنو؟ السي حمد : كلنا تنعرفو نورة من هادي شحال، المهم حنا تنبغيو بعضياتنا من هادي شحال، غير كنا تنتسناوكم حتا تكبرو و كل واحد يهز راسو، دابا كلكم كبرتو، مراد مزوج و قريب يكون عندو ولد حتا هو، سيف خدام و هاز براسو، و نتوما كبرتو و بخدمتكم حتا نتوما، و أسامة تبارك الله عليك راه خدام خصنا غير نشوفوه عريس، حنا قررنا نتزوجو و بغينا نقولوها ليكم، ميسم (ناضت تتغوت) : لا ميمكنش، ميمكنش هدشي، أنا مموافقاش، السي حمد : انا غير علمتكم ماشي جيت باش ناخد القرار ديالكم، نهار تمشيو كلكم را انبقا بوحدي فالدار شكون ايونسني، ميسم : لا مشغليش، إذا بغيتي تزوج نسا را عندك شي بنت سميتها ميسم.....خرجات تتجري و تبعاتها نسمة : ميسم تسناي ميسم حبسي عافاكي ميسم.....تتعيط عليها و لكن والو محبساتش، قطعات ميسم الشانطي و نسمة تابعاه حتا كيتسمع صوت الفران و نسمة غوتات، ميسم : لااااا نسمة.......و من رحمة ربي مول الطونوبيل شد الفران فآخر لحظة و مقاسهاش، ميسم : نسمة، شوفي فيا، شوفي، واش لاباس؟ نسمة : آه، كنت غنموت......نزل مول الطونوبيل و اطمئن عليها و مشا فحالو، ميسم : كنتي غتموتي الله يستر، نسمة : ميسم، بابا غيتزوج، ميسم : لبغا يتزوج يمشي لجنازتي عاد يحضر لعرسو، نسمة : لا سكتي متقوليش هكا، ميسم : كيفاش متقوليش هاكا، واش باقا مستوعبتيهاش مزيان؟ باباك غيتزوج، و حنا آخر وحدين ايسيقو الخبار، نسمة : را فاهمة، يالاه نرجعو للدار و نتفاهمو تما، ميسم : مبقيتش ارجع لديك الدار......من بعد محاولات عديدة و أخيرا قنعاتها باش يرجعو للدار و يتفاهمو على خاطرهم، الليل كلو و هوما جالسين تيتناقشو، فالاخير وصلو لحل هو أنهم يهضرو مع باباهم و يتفاهمو، الغد تجمعو كلهم فالصالون الكبير، سيف : نسمة، ميسم، سمعو، كل واحد عندو الحق، بابا ميمكنش يعيش بوحدو حياتو كاملة، و نتوما صعاب عليكم تفهموا الأمر، ميسم : و أنت جاتك عادي ياك، سيف : وا حتا هو عندو الحق أنا منلوموش، السي حمد : حتا نتوما واخا كبرتو راكم محتاجين لأم اللي ترعاكم و تحن عليكم، ميسم (بعصبية) : أنا عندي أم، الفرق الوحيد هو أنها ماشي حدايا، ولكن راها ديما معايا، و نفضل نكون يتيمة على أن ديك العقروشة تكون فبلاصة مي، السي حمد : ميسم نتابهي لكلامك، المهم هاد الزواج مستحيل يتلغى، من اليوم، نورة راها مرتي و واجب عليكم تحتارموها، و أسامة فمكانة خوكم، نسمة : لا ميمكنش واش غيسكنو معانا؟ السي حمد : علاه شنو، نسمة : لا ميمكنش، تزوجو مسوقيش، ولكن باش نسكنو فدار وحدة را مستحيل نتقبلها، مراد : بابا، انت حمد الله غير منين قبلو بهاد الزواج، صافي من حقهم يبغيو يبقاو بوحدهم منفرضوش عليهم بزاف عاود، السي حمد : صافي واخا
دازو دوك الأيام كلها متوثرة، تزوج السي حمد و نورة و دارو حفلة صغيرة فيها غير العائلات، ميسم متتحملش نورة و كانت عارفة من قبل را بيناتهم شي حاجة، و نسمة تتكره أسامة و تتشوف حياتها كيف غتولي........شهر داز كلو توثر، ميسم : نسمة تيليفونك تيصوني، نسمة : مفيا اللي يهضر مع شي واحد، ميسم و إذا قلت ليك را علاء اللي تيصوني، نسمة : آري التيليفون دغيا، ميسم : هههه حمقة هاكي، نسمة : آلو علاء، علاء : نسومي آش بان ليك نخرجو نضربو شي دويرة أنا وياك؟ نسمة : صافي انا ندوز للورشة فاش نخرج نتلاقاو، علاء : اوكي تهلاي فراسك، نسمة : بالسلامة، ميسم ميسم شوفي ليا شنو نلبس، ميسم : بغا يتلاقا بيك، نسمة : عادي نخرجو ندورو و صافي، ميسم : و ممعاهش حمزة؟ نسمة : لا مقال ليا والو، بغيتيه عيطي ليه، ميسم : لا، نسمة : واش مدابزين عاود؟ ميسم : آه، و كاعما صونا و مسولش، نسمة : ايوا انت راسك قاصح سيري دابزي معاه و تسناي منو يجي يصالحك، ميسم : نصوني ليه، نسمة : صوني، ميسم : شنو نقول ليه؟ نسمة : قوليليه را حنا خارجين يجي معانا، ميسم : هاوا تيصوني، حمزة : آلو شكون معايا، ميسم : كيفاش شكون معايا، ولا عرفتي شنو بالسلامة انا اللي معندي عقل معيطا ليك طيط طيط طيط، نسمة : أويلي مالكي حماقيتي، ميسم : شكون انت هاي هاي هاي، انا اللي معندي عقل تنصوني، هاوا تيعيط، نسمة : صافي جاوبيه و باراكا من داك الكبرياء الخاوي، ميسم : واخا، آلو شكون معايا، حمزة : وا صافي بغينا غير نضحكو معاك صدقنا هاجرينو، تبغي تخرجي؟ ميسم : ممسالياش انمشي للورشة، حمزة : حتا تخرجي و ندوز عليك، ميسم : دابا نشوف، حمزة : صافي نتسناك طيط طيط طيط، ميسم : شوفي قطع عليا، نسمة : ههههه حمقة كبري عقلك .