الحب لا يموت

الجزء 22

حلات الفاليز و لقاتها عامرة بالحوايج، بقات تتقلب على شي حاجة تجي قدها ووالو "اناري هادي را ماشي بنادم واش كاين شي واحد رقيق حتال هاد الدرجة، السراول ديالها كلهم سليم حتا واحد ميجي قدي، و الكساوي ديالها حتا هوما، أما الملابس الداخلية را حالتهم بوحدها، هادي مدايرة بحال الوصلة دالخبز" بقات تتقلب تتقلب و فالاخير لبسات سوفيطما من اللتحت و تيشورت ابيض مرسومة فيه ميني ماوس و شورط قصير فوق الركبة فالاحمر و بالغين أبيض، تقابلات مع المراية و بقات تتشوف فراسها "واش من نيتها هاد ختنا تتلبس هدشي، تنبان بحال شي برهوشة عندها خمس سنين، ناااري واش غنمشي قدامو بهاد الحالة؟ لا ويلي ميمكنش، و ملابساش السوتيانات كلشي باين ناااري على فضيحة، بالحق انا علاياش تنقلب كان عليا نفكر فالعواقب من الأول" بقات تتقلب تقلب حتا لقات واحد الشال دارتو على كتافها و لواتو على عنقها و هبطاتو شوية "اممم دبا شوية حسن من الاول" بانت ليها الريحة ديالو محطوطة فوق الكوافوز دارت شوية فيديها و بقات تتشمها و تتفكر فاش تيكون دايرها *الدقان* علاء : واش ضروري فينما تمشي لشي قنت تسكني تما؟ نسمة : بلا نفيخ أنا جاية........رجعات كلشي لبلاصتو و خرجات لعندو، شافها بقا حابس الضحكة بزز، نسمة : مالك تيهروك جنابك، علاء : ههه لا ،نسمة : و علاش تضحك، علاء : هكاك و صافي، آجي نجلسو.......جلسات بالنفيخ و هو مراقبها و تيضحك، علاء : اممم فيك الجوع؟ نسمة : لا، علاء : غير شوفي و كان انا عارفك من الفطور مواكلاش، نسمة : شكون قالها ليك؟ علاء : حدسي قوي، نسمة : امم باينة......مشا علاء للكوزينة رجع هاز فيديه الشكلاط و الحلاوي و تشيبس و الكاطو كلشي، علاء : هاوا كلشي قدامك بغيتي شي حاجة هزيها، نسمة : صافي، علاء : ممكن نهضرو؟ نسمة : فاش؟ علاء (قاد الجلسة) : فبزاف الحوايج، نسمة : واخا نهضرو، علاء : المهم باغي نسولك على شحال من حاجة، فبالي شحال من حاجة مدوخاني باغي نعرفها، ولكن اول حاجة هي علاش كنتي تتبكي قبيلة حدا الطونوبيل........فاش قاليها هاد الهضرة عاد تفكرات شنو وقع، سنسلتها تسرقات، عينيها عمرو بالدموع و شداتها البكية، علاء : علاش تتبكي دبا، لمكنتيش باغا تقولي منبززش عليك، نسمة : علاااء، سنسلتي تسرقات، علاء : كيفاش! واش اللي ديما فعنقك؟ نسمة : آه اللي خلاتها ليا ماما الله يرحمها، علاء : و علاش مقلتيهاش ليا قبيلة، نسمة : معرفتش، مكنت عارفة مندير، علاء : صافي غير تهناي سنسلتك غادي ترجع ليك، نسمة : متنظنش، علاء : هي متتيقيش فيا، نسمة : لا، علاء : هاااا، نسمة : هههه تنتيق فيك ولكن صعيبة أصلا أنا مبقيتش عاقلة حتا على وجهو كيف داير، علاء : أنت غير نسايها انا واعدتك، نسمة : شكرا، علاء : و حاجة اخرى، أنا مغادي نسول على حتا حاجة بغيتي تعاودي ليا عاودي مبغيتيش على راحتك و أنا تنتيق فيك نتمنى تكوني تتستحقي هاد الثقة، نسمة (عنقاتو) : شكرا بزاف حتا انا تنتيق فيك و سمحليا على أي حاجة، وشكرا بزاف على كلشي *شافت الوقت* نااري العشرة دابا خصني نمشي تعطلت، علاء : اه هاكي سوارتك، نسمة : فين لقيتيهم؟ علاء : طيحتيهم فلاصال، و مغديش نسولك شنو كنتي تديري تما حيت اتفقنا واخا الفضول كلاني، نسمة : حسن ليك، علاء : آه را شهد قبيلة جابت ليك الطونوبيل را غادي تلقايها فالبارك لتحت، نسمة : قوليها شكرا فبلاصتي، هانا مشيت، آه و منساش تسلم عليها بزااف و قوليها شكرا على الحوايج و بوسها ليا، علاء : ضروري.....كانت نازلة من المصعد و تتهضر مع راسها "بففف، العشية كلها و هو ضريف فالاخير عورها، آش يكون عاجبو فهاد شهد كاع، سميتها مثلا؟ لاطاي ديالها؟ والله مبغا يتفهم ليا أنا جاني غير تيطنز حيت أصلا كون كانو بصح مع بعضياتهم كون متخليهش معايا بوحدنا، شتي انا ذكية هاهاها" ركبات فالطونوبيل و ديمارات حتا وصلات للفيلا ديالهم، مع العلم هوما فبلاصة خارجة على المدينة بخمسة كلم، حدا البحر و مكاينينش المنازل بزاف من غير شي ناس قلال، كانت عندهم الفيلا كبيرة فين ساكنين و الجردة دايرة عليها من جميع الجهات و حداها الفيرما ديالهم و قريبة ليهم الطاحونة اللي هادي أعوام و هي حابسة، و كانت الفيلا تطل على البحر، دخلات لبيتها بدلات حوايجها و هبطات للكوزينة، نسمة : خالتي هانا جيت، رحمة : أهلا بنيتي غبرتي علينا كاعما بقينا تنشوفوك، نسمة : سمحيليا اخالتي راكي عارفة غير مع الخدمة و الروينة، رحمة : الله ابنتي رتاحي ليك شوية متعييش راسك انت باقا صغيرة، نسمة : واخا اخالتي ميكون غير خاطرك، اه مشفتيش ميسم فينهي؟ رحمة : منين خرجتو فالصباح ماجات، نسمة : العجب، صافي انا غادة لبيتي إذا جات قوليليها تجي لعندي را بغيتها، رحمة : واخا، و كولي ليك شي حاجة متبقايش بالجوع، نسمة : لا را الكريشة عامرة هههه، رحمة : ايوا طلعي ستاراحي ليك، نسمة : هاني مشيت.......