الحب لا يموت

الجزء 8

الصباح فاقت نسمة بكري، فالأصل ماشي فاقت ولكن غير حلات عينيها و ناضت من فراشها أما النعاس مشافتوش الليل كامل، الليل كلو و هي تتفكر فالطريقة باش تقولها لباباها، و لقات بأنها تقولها ليه مباشرة هي أفضل طريقة، باقا تتحك عينيها حتا ترمات عليها وسادة جاتها فوجها نيشان، ميسم : هاهاها 1_0 نسمة : صباحاتو الله، ميسم (وقفات ليها على راسها و دارت يديها على خصرها) : تنسمعك، نسمة : هاااا؟ ميسم : كيفاش هااا، قوليليا فين مشيتي لبارح، نسمة : هبطت نشرب علاش؟ ميسم : ساعة و انت تتشربي، هضري فين كنتي، نسمة : ميسم بغيت نقوليك واحد الحاجة، ميسم (جلسات قدامها ) : وي تنسمعك، نسمة : امم معرفتش كيفاش غادي نشرح ليك، ميسم : غير هضري قولي آش ضارك انا نعاونك راني ختك زعما، نسمة : شي حاجة وقعات ليا، كتوقع، بففف معرفتش، أنت عارفاني متنحملش أسامة، ميسم : اه، نسمة : ولكن معارفاش علاش، هو...هو كان *غلبوها دموعها* ميسم : مالو أسامة شنو دار ليك؟ نسمة هضري عافاك.....تحل الباب حتا ترضخ مع الحيط و دخلات عمتهم عاقدة حجبانها : حتال امتا ناويين تبقاو هنا؟ من الصباح و حنا تنعيطو ليكم، ميسم : واخا اعمتي هاحنا هابطين، العمة : مالكي انت تدمعي، ميسم : شي حاجة بيناتنا، صافي هبطي هاحنا جايين، خرجات و زدحات الباب موراها، ميسم : هادي مالها ليوم ممولفاش ليها تعامل هكا، نسمة : تلقاي شي حاجة معصباها، خلاص يالاه نهبطو، ميسم : قوليلي بعدا شنو ضارك، نسمة : خلي حتال من بعد، الموضوع طويل و ماشي وقتو دابا، ميسم : اللي بغيتي، يالاهي نهبطو، مسحي دموعك و متبقايش تبكي حتا حاجة متستاهل، نسمة (ضحكات ما بين دموعها ) : واخا...هبطو لقاو كلشي تياكل فصمت على غير المعتاد، الجو متوثر و علاش منعرف، كلاو و مشاو للورشة مرجعو حتال الليل عيانين نعسو حتال الصباح، الغد فاقو على صوت شي واحد تيغوت، خرجو تيجريو لقاو مراد هاز مرتو و تيدور بيها فحال شي حمق فوسط الدار، بقا كلشي تيشوف فيه متسائل آش واقع، مراد (طاير بالفرحة) : صفاء......صفاء حاملة، السي حمد (ضحك واحد الضحكة واسعة و و عنقتو لعندو و كانت هاذي اول مرة يعنقو من مدة طويلة ) : و أخيرا و أخيرا شحال و حنا تنتسناو، الله يا ربي، كان كلشي فرحان و كلمة فرحة مكافياش باش تعبر على دكشي باش تيحسو، كلشي ضاحك و ناشط، و طبعا ما بين هاد الفرحة نسمة شافت باللي مستحيل تقول ليهم دكشي و تأجلها حتال وقت آخر، دازو أيام روتينية كان فيها أسامة مسافر على شي شغل و الأوضاع كيف المعتاد، ميسم : بففف الملل، نسمة : واييه بزاف، توحشتو، ميسم : شكون؟ نسمة : شكون؟ ميسم : شكون توحشتي؟ نسمة : لا غير تنهضر مع راسي، ميسم : شكون توحشتي؟ نسمة : علاء، ميسم : شكون علاء؟ نسمة : عقلتي على داك البوكوس اللي تلاقيتيه فالريسطو و سحابليه انت هي أنا؟ ميسم : اه اه ضروري، نسمة : سميتو علاء، ميسم : علاء الدين و البساط السحري، و انت ياسمينة هازك بين دراعو و يديك على عنقو فواحد القلعة كبيرة، تيتحنى على ركابيه و تيشد ليك يديه، نسمة، هل تقبلين الزواج مني؟ نسمة : لاواه الزعتر، ديك المخيلة عندك غا ديال التهراس، عادي رانا غي صحاب، ،ميسم : و لكن بيني وبينك خونا بوكوس غيساعد على تحسين النسل فالعائلة، نسمة : ههههه قالت ليك تحسين النسل، خصني نعرفك عليه راه ضريف، أصلا انا معنديش صحاب بزاف مكاين حتا مشكل يكون عندي صديق ولا لا؟ ميسم : لا احبيبة مكاين حتا مشكل غير خصو يكون شخص مزيان و صافي حيت فهاد الوقت مبقات تيقة، نسمة : متخافيش، ميسم : اختاريتي شنو اتلبسي؟ نسمة : علاش فين غاديين؟ ميسم : متقوليش ليا نسيتي، را الليلة معروضين عند خالتك نورة، قالك غيخدمو على شي مشروع جديد و بغاتنا نتجمعو كاملين حيت ولدها غيجي، نسمة : شكون واش أسامة؟ ميسم : ياكما عندها شي ولد آخر و انا مفراسيش؟ نسمة : مغنمشيش، ميسم: لا مفر، بابا حلف حتا نمشيو كاملين قاليك عرضات علينا لالاهم نورة حشومة يبقا شي واحد، نسمة : زعما راها غير معشوقة فينا، على أي انا باقا مختاريت والو يالاهي معايا نشوفو منلبسو، ميسم : يالاه
ايوا لبسو البنات و تقادو جاو تيحمقو و من المضحك انهم لبسو نفس اللبسة، سروال كحل و قميجة فالقهوي، نفس الفصالة و كلشي، و جمعو شعرهم ذيل الحصان، جاو فوطوكوبي، وقفو بجوجهم قدام المراية و جلسو تيضحكو، بقاو تيتصورو حتا سمعو السي حمد تيعيط ليهم، هبطو عندو عنقهم فرحان و مشاو.....دخلو استقبلاتهم نورة و جا أسامة يسلم على نسمة و هي تقلب وجهها، لقات عمتها تتشوف فيها و تتوشوش هي و جداتها، دخلو بقاو تيهضرو و مجمعين، السي حمد : نهار كبير هذا اللي تجمعنا فيه هكا، نورة : كبير بيكم، السي حمد : ايوا اسي أسامة اش خبارك مع شي خدمة، أسامة : بيخير أعمي، السي حمد : ايوا راك كبرتي مناويش حتا انت دير دارك و وليداتك؟ أسامة (تيشوف فنسمة) : قريب إن شاء الله، السي حمد : هي كاينة شي حاجة هههه، أسامة : ان شاء الله علاش لا، ميسم : نسمة آجي معايا. نسمة : فين ؟ميسم : نغسل يدي ياه على فين، نسمة : ياكما بغيتيني نشد ليك يديك حتا تسالي، سيري غسلي و آجي، ميسم : واخا فيك.....ميسم *اربي هاد الدار كبيرة بلا فايدة ياك ساكنة غير هي و ولدها و قليل حتى فين تيجيو، سيري شري ليك دار على قدك و....ااااي، محسات براسها حتا دخل فيها شي واحد و هي طاحت فالأرض مقسحة، هزات راسها تشوف شكون.......