الحب لا يموت

الجزء 54

علاء : شفتك ساكتة واش معرفتيش؟ نسمة : آه، علاء : ههههه وا شهر العسل يا الحمقة متقوليش ليا ما فكرتيش فيه، أنا بعدا مفكر و موجد لكلشي، نسمة : آآآآه شهر العسل وي وي ههههه، علاء : هههه ناااري تضحكيني بعد المرات تتبقاي ديري شي حوايج متنعرف ما نقول، هانتي المهم أنا غادي نقوليك واحد الإقتراح و شوفي إلا عجبك، نسمة : واخا تنسمعك، علاء : غادي نمشيو لباريس ندوزو تما واحد الأسبوع، و من بعد غنمشيو لبروكسل فبلجيكا نبقاو الوقت اللي بغيتو، نسمة : شكون حنا؟ علاء : أنت و ختك، عارفكم مكتفارقوش، اتافقنا أنا و حمزة و بقيتو غير نتوما توافقو، نسمة : آه صافي اللي درتوها أنا معاكم، علاء : واش ما باغاش؟ ياكما تبغي نمشيو لشي بلاصة أخرى، نسمة : لا را قلت ليك نمشيو، علاء : حيت بنتي ليا فحالا ممرتاحاش، ولا يمكن غير جاب ليا الله، نسمة : لا مكاين والو من هدشي، علاء : إلا كان كيفما تتقولي را 3 ايام و نمشيو، جمعي دكشي اللي غادي تحتاجي و وجدي من دبا، نسمة : واخا، علاء : يالاه ها حنا وصلنا، نسمة : أنا غادي نطلع نعس، علاء : مغتعشايش؟ نسمة : لا غير بصحتكم، علاء : بنتي ليا ماشي حتال لهيه، واش مقلقاك شيحاجة؟ نسمة : لا والله ما فيا والو غي عيانة بغيت نعس، علاء : صافي على راحتك .
دازو ثلاثة أيام جمعو فيها حوايجهم و استعدوا للسفر، داك الصباح كان الجو بارد بزاف و الأرض بيضاء بسبب الثلج، تجمعو و كان كلشي هو هداك، ديماراو الطونوبيلات بجوج و انطلقوا نحو باريس، الطريق كلها و هوما مستمتعين بمنظر الثلوج، وصلو مشاو نيشان لأوطيل طلعو للغرف تاعهم كانو حدا بعضهم حطو الحقائب و خرجو باش يتغداو، دوزو ديك العشية برا و رجعو مع 20:00 على أمل يتلاقاو الغد عاود، علاء : أنا غادي ندخل للدوش حتا تمدي ليا الفوطة واخا، نسمة : آه واخا......."فاش سالا عيط ليها" علاء : نسمة الفوطة عافاك، نسمة : هانا جايا، هزاتها مداتها ليه من وراء الباب و هو لواها عليه و خرج، فاش شافتو شافت صدرو عريان و لاحظات واحد التوحيمة صغيرة فكتفو اول مرة تشوفها، تزنكات و دورات وجهها للجهة الأخرى، علاء : مالكي قلبتي وجهك شفتي غول؟ نسمة : لبس عليك، علاء : ههههه وا راني راجلك دبا واش تتحشمي مني، نسمة : لا غير على البرد، علاء : إيوا دوري وجهك صافي، نسمة : حتا تلبس، علاء : وا غير دوري مزال ليا غير التريكو، نسمة : حلف، علاء : ههههه واش غنكذب عليك، نسمة : لا حلف، علاء : وا والله، دارت عندو لقاتو لابس عليه من اللتحت أما صدرو عريان، نسمة : دبا هادي هي لابس؟ علاء : صافي هاوا غيلبس، نسمة : دغيا، علاء : واخا ولكن بشرط، نسمة : شنو هو؟ علاء : عطيني بوسة، نسمة : لبس و نعطيها ليك، علاء : لا عطيها ليا عاد نلبس، نسمة : اوووف واخا، يالاه قرب، قرب ليها جات غتبوسو فحنكو و هو يقلب وجهو و جات ففمو و هي بعدات بالزربة و هو تيضحك، علاء : اححح هدشي عندك زوين، نسمة (لاحت عليه وسادة) : غشاش كذاب فيك القوالب ميسحابش ليا أنت هكا، علاء : ههههه مزال غير البدية هادي غا بلاتي دبا نوريك، نسمة : اشنو فجهدك مدير كاع! علاء : أنا جاي نوريك، مشا تيجري لعندها و هي هربانة و هو تابعها حتا قبطها و كالاها مع الحيط و قبط ليها يديها حتا حكمها و هي تتحاول تفلت منو و تضحك، علاء : امممم هانا شديتك شنو ندير ليك دبا؟ نسمة : هههه وا صافي طلقني، علاء : لا دبا أنت اللي جبدتيني، نسمة : اممم و شنو فجهدك مدير، علاء : أنا غنوريك، قرب ليها و طبع قبلة طويلة على فمها، علاء : تتحمقيني انسمة كلشي فيك زوين، نسمة : علاء، حل ليها شعرها و هو يتطلق على كتافها، كان زوين طويل و رطب بقا تيتلمسو و نزل تيبوس ليها فعنقها، علاء : تتشهيني كلك تتحمقي، نسمة بغيتك، هز راسو فيها لقا الدموع نازلين على حناكها و تو تخلع مة عرف ما يدير، علاء : نسمة مالكي شنو واقع ليك، شوفي إلا مكنتيش مستعدة خلي حتا تكوني على راحتك منبزز عليك والو، عنقاتو و بقات تتبكي و تشهق، كانت خايفة بزاف، تفكرات دكشي اللي كان تيوقع ليها مع أسامة و كيفاش كان تيتلمس فيها، هي بصح تتبغي علاء و كانت مستعدة تعطيه كلشي ولكن مقدراتش كان دكشي فوق خاطرها، فاش تهدنات هزات راسها لقاتو تيشوف فيها، علاء : تهدنتي شوية؟ نسمة دارت ليه آه براسها، علاء : شوفي إذا مكنتيش باغا دبا أنا مغدي نبزز عليك والو حتا تكوني مستعدة و باغا، أنا عارف بأنها أول مرة غادي تكوني خايفة و مخلوعة و طبيعي يوقع هدشي، و حتا أنا ما زربانش قدامنا عمر كامل، نسمة : ما مقلقش مني، علاء : هههه اويلي على حمقة باش مزوج، نوضي نوضي غسلي خنونتك و زيدي نتعشاو، دخلات غسلات وجهها و شافت راسها فالمراية لقات عينيها و نيفها حمرين بالبكا، مكانتش تتصور بأن دكشي غادي يأثر عليها حتال هاد الدرجة، بقات جالسة تتفكر مع راسها حتا تتسمع الدقان، علاء : نسمة ياك لاباس مالكي، نسمة : هانا جايا، غسلات وجهها و نشفاتو و خرجات......