الحب لا يموت

الجزء 35

وراها واحد الفيديو سيفطاتو ليه ميسم فيه نسمة ناعسة و تتهضر، هي شافتو بقات تتحمار و تصفار و غطات وجهها بيديها و هو بقا تيضحك، علاء : عرفت حاجة جديدة عليك هههه مكانش يسحابلي كتهضري و انت ناعسة ،نسمة : غا الفوتوشوب هذاك، علاء : هههه صافي الالة غا فوتوشوب، نسمة : وا صافي صافي ناااري شحال تتشد فالحاجة، علاء : و عندي ليك واحد الهدية عارفها غادي تعجبك، نسمة : ياااه بصح شكرا بزاف، شنو هي، علاء : غمضي عينيك، نسمة (مغمضاهم) : هانا، علاء (حط ليها شي حاجة فيديها) : حلي عينيك دبا، نسمة : لا ميمكنش واش بصح، تتشبه لسنسلتي بزاااف شكرا، علاء : را سنسلتك هادي، نسمة : لا ميمكنش واش بصح، علاء : آه، نسمة : آه آه بصح والله حتا هي عاقلة كنت واحد المرة تقطعات و سوداها ليا مول الذهب هايا البلاصة باقا باينة، ولكن....،كيفاش حتا لقيتيها، علاء : واحد الدري صاحبي هو اللي عاوني معرفتش كيفاش دار ليها ههه، نسمة : عرفتي واخا نبقا نشكرك من دابا تال غدا را مكافياش، علاء : حنا مبيناتناش شكرا أنا واعدتك ووفيت بوعدي هذا ما كان، نسمة : حياتي أنت تنحماق عليك، علاء : و انا كثر، حقا مبروك ليك، نسمة : علاياش؟ علاء : حيت وليتي خالة هههه، نسمة : آه بصح، فرحانة بزاف، خاصك تجي لعندنا تشوفو عرفتي شحال صغيور و فنيون تيحمق، علاء : مبقا والو نهار السبوع وريه ليا، نسمة : ضروري، قوليا بعدا شنو غادي تجي لابس؟ علاء : خليه سوكخي تا يجي وقتو و تعرفي، نسمة : لا بغيت نعرف واخا غير تلميح، علاء : غادي نلبس شي حاجة بلدية، نسمة : اووووه الناس ديال البلدي، متشوقة باش نشوفك، و متفركسش بزاف را غيكونو تما بنات العائلة احم احم راني تنغير زعما، علاء : يخليلي اللي تيغير، المشكلة واخا نقوليك انت مديري والو راكي زوينة من عند الله، اجي ديري اللثام و تهناي، نسمة : هههه واش انت بعقلك، المهم متخافش عليا مغديش نلبس شي حاجة تتلفت الأنظار و مغديش نجمع مع الدراري بزاف غير السلام السلام باراكا، علاء : سيري الله يرضي عليك، لهلا يخطيك عليا وصافي، نسمة : حتا أنت، علاء : يالله نوصلك للدار دبا و غدا نتلاقاو، نسمة واخا.....
دكشي اللي دارو مشات للدار دخلات دوشات و نعسات......دازو الأيام بالزربة، داك النهار فاقت نسمة بكري لقات كلشي فايق، الريحة ديال الند و البخور معطرة الدار و الأنواع ديال الحلوة مستفين فالبلاطويات، التريتور تيقاد دكشي و كلشي تيجري من هنا لهيه، مشات هي و ميسم للصالون تلاقاو تما بشهد دارو سوان كامل و صايبو شعرهم و الماكياج و رجعو للدار نسمة لبسات قفطان فالاخضر و مطرز الذهبي و جمعات شعرها و الباقي خلاتو مطلوق، و ميسم لبسات جبادور أبيض و شربيل حتا هو أبيض و جمعات شعرها بوكلي، أما شهد فلبسات تكشيطة فالاحمر و مطرزة بالذهبي و طلقات شعرها الأشقر جاو فنين، هبطو للتحت يستقبلو الضيوف حيت هوما مالين الدار زعما و مشات معاهم شهد تيعرفوها عليهم، كانو شي أشخاص أول مرة غادي  تشوفوهم، فاش سولو سيف عرفو بأنهم من عائلة نورة، كانت من بينهم واحد البنت تكون كبر منهم بشي عام، داخلة هي و جوج بنات و هي وسطهم، كانت زوينة ولكن دايرة بزاف الميكاب، باينة فيها قويفزة، عندها واحد الضحكة تتسمع من بعيد، سلمات عليهم و جلسات فواحد القنت، ميسم : نااري على تريكة كيدايرة، حتا بابا معندو شغل عارض على فحال هاد الأشكال، نسمة : فخاطر مرتو على هو يقدر يخصر ليها، ميسم : بغيت ليها غا شي تكربيعة قدام كلشي نضحكو شوية، شهد : هههه والله حتا يكون منظر ولا أروع.....كانو تيهضرو حتا حسات نسمة بشي يد تتجر ليها فحوايجها، شافت عرفتو شكون لقات؟ حفصة البنت اللي كانت تلاقاتها من قبل فحديقة الالعاب، نسمة : يا حياتي شكون جا لعندنااا، حفصة : عقلتي عليا، نسمة : و شكون ينسا الفنون، شكون قال را باقي نتلاقاو، فين هي سارة الصغيرة، حفصة : سارة مريضة بقات مع الميمة، نسمة : آه لاباس عليها، توحشتك يا ختي، حفصة  (عنقاتها) : حتا أنا توحشتك، ميسم : منين تتعرفيها؟ نسمة : واحد المرة تلاقينا فبارك ديال الألعاب و تصاحبنا ههه، ميسم : هههه سعداتك بيها، شهد : شوفو شوفو شكون جا، دارو بثلاثة بان ليهم علاء فالباب تيبارك لمراد، كان لابس فوقية فالابيض و الباج و بلغة بيضاء و داير القب على راسو، كانت هديك أول مرة تشوفو هكا، بقات حابسة الضحكة و هو هز راسو فيها لقاها تضحك، جا سلم عليهم و فاش وصل لنسمة غمزها بعينو و هي حشمات و هبطات راسها للأرض، ميسم : جيتي بوحدك؟ علاء : آه حمزة را شدو غير شي شغل قاليا سبقني رآه شوية و يجي، ميسم : آه بون، علاء : أنا غادي ندخل تال شوية و نجي واخا، نسمة : واخا، ريحتك زوينة، علاء : و انت كلك زوينة، نسمة : تتحشمني، علاء : ويتك ويتك، يالاه خليني نمشي را الهضرة معاك مكتسالاش، نسمة : واخا سير....