Mga Tula Ni Juana

Sa may kantina

Alas tres na ng hapon at dapat mag-eensayo pa kami
Kaya paglabas ko ng silid
Pagkaupo sa gilid ng mga bulaklak
Papanoorin lang sana ang kaklase kong sumasayaw ng cha-cha
At dapat bibili ako ng saging ulit

Kahit barado ang lalamunan
Pero bigla-bigla ay nakita ka sa durungawan
Kumakain ng pagkaing hindi ko alam
At dahil nasa loob ka
May ideya na namang namumuo sa kaisipan
Aruzcaldo ba yan?

Katulad ng katabi ko kanina
Naamoy ko pa ang pinaghalong
Asim at pait ng mga rekados
At medyo ayaw ng ilong ko
Na dati kapag kumakain ako ay hindi ko maubos-ubos

Dahil hapon na nga
Nagliliwanag pa ang araw na natatakpan ng ulap
At ang kakaibang amoy ng bakal doo'y umalingasaw na 'di ko maiwasang malanghap
Kaso sya
Patuloy pa rin sa pagsubo at pagnguya

Masarap nga kaya o sadyang
Mas masarap kang pagmasdan habang hawak-hawak ang kutsara?
Dagdag puntos pa ang balat mong parang hinalikan ng araw
At buhok na hindi nakakasawang pagmasdan
Kahit masilaw

Kahit pinagtawanan ako ng kaibigan ko
Na inakala nya
Gwardya yung tinitignan
Kahit matapilok pa ako sa harap nila
Ayos lang kasi baka malay mo mapalingon ka