خلف اسوار العشق انتِ مملكتي

البارت الرابع والعشرون

الكاتبه : عليا الناصر

البارت : 24

فرات : رجع بالسيارة ومن شاف منصور واگف ويا اثنين يم البوابه ومبين عليه عصبي ويصيح  وسيارتين طابگات برى وبيهن تقريباً سته صاعدين ومسلحين لان چانن مامظللات وقبل لايوصلهم شاف هذوله الاثنين طلعوا سلاحهم على منصور وواحد منهم صوب عليه ورماه وقبل لايوگع منصور شخط سيارته راد يگلبها الا شويه وتوجه عليهم دعم واحد والثاني فلت عاد جماعتهم نزلوا واشتغل الرمي عليهم فطبگ سيارته گدام منصور ونزل ركض وجر منصور واحتموا بالسياره

منصور : صوبوني الكلاب ولد الكلب آخ بس لو شايل سلاح ولك فرات وينو سلاحك

فرات : ماشايله عفته بالبيت لان خفت من السيطرات عاد زحف شويه وجرسلاح اللي دعمه ووگعة وگام يضرب عليهم بس واحد غافله من ورى وخرط عليهم وانصاب بمتنه ومن دحگ على منصور شافه وگع بالگاع جره بحظنه منصور منصور لاتسويها بيه شو افتح عيونك منصور وگام يضرب على خدودة وچان راح يكتلونه لوما مهدي طلعلهم يركض ويرمي صاح بي يولو يالخبل لاتركض عليهم لايصابونك دير بالك ولك

مهدي : يركض ويرمي وصاح يولو صاوبوا منصور اليوم احرگ ابهاتهم وگام يخرط بالرمي عامي شامي

أسد : طلع ورى يركض وصاح بي ولك مهيدي راح تصوبنه احنه هم على كيفك يول واجى ختل يم فرات ومنصور صاوبوكم مو

فرات : انه خفيفة اصابتي بس منصور اصابته قويه الچلاب ماكفاهم ضربوا بالبدايه ببطنه نوب رجعوا ضربوا بصدره أسد چنه مات يولو منصور شو رد عليي منصور

أسد : دحگ ومن شاف اللي دعمه فرات بالگاع ممدد عرفه لا يا ساقطين جايين تكتلوني اني واهلي حتى لاتنطون الگاع اني الكم

فرات : منهو هذوله ياگاع هاي بس لا گاعك اليم خوالك ومچلبين بيها فوگ حگنه يجون يدگونه الناقصين آنه الهم

وراها طلعوا الكل وصارت مواجهة وتصوب منهم تلاثه مهدي صوبهم عاد ذولاك راساً شردوا من شافو روحهم راح ينكتلون وعافو اللي دعمه فرات مدد بالگاع

أسد : الحسن اركض جيب سيارتي بسرعة وتقرب على منصور وصاح بي منصور منصور وطلع موبايله واتصل على الحارث الحارث الحگلي ولد عمي تصاوبوا زين نص ساعة يمك الگاك هناك اي اصابته خطيرة بصدره وبطنه زين انتظرنه وسد الخط

منصور : صحى وبصوت تعبان وحچى بالگوة أسسد رررقي ررقيه ااام اانه عدكم لا تتت خلوهـ ا ترووح لأهلها وگلووها ممنصوور يضحك علليچ مايتزووج ومازعلان مننچ ورجع غمى عليه

حجي حسن : يابابه يايابه شأگل لامك اگلها ابنچ الثاني هم راح نوسدوا الگبور مثل اخو

فرات : خالي گول يا الله مابيه غير العافيه ان شاء الله  لاتفاولون عليه