خلف اسوار العشق انتِ مملكتي

البارت السابع والثلاثون

الكاتبة : عليا الناصر

ريحان : ما جاي أصدگ اللي صار بصراحة لحد هسة الخوفة بگلبي يعني نزلت أشرب مي بس التفت اربعة  مدري خمسة لابسين  أسود وسحبوا سلاحهم عليه وطلعوني لا وچمالة شلون يباوعون بنظرات وسخة مثل خلقهم الزفرة

جمانة : لعد أني شأگول چنه نايمن وچفتولنه للغرفة ماحسينة الا وهمة فوگ راسنه وبالگوة يلة خلوني اخذ ازار الصلاة واحطة على راسي وتلفلفت بي شلون مچان الله لا يوفقهم ان شاء الله والله من الهبطة گلت راح اطرح

ملاك : عمة جمانة تعالي بسرعة بيبي زنوبة هم رجعت تخربطت

جمانة : هاي حالتها صار ٣ ايام تصحى ومن تذكر الصار تدگ وتعيط وترجع تخرب والاكل والشرب گاطعته يا الله شأسوي هسة ونوب لا علي ولا حيدر موجودين

ريحان : اذا فرد مرة تخربطت خلي ناخذها للمستشفى خوما تظل هيچ واذا نبقى ننتظر علي وحيدر يجوز المره تموت لان صارلهم ٣ ايام هاجين برى ويدورن على سيف اللي مدري وين ضيعوا

جمانة : اسكتي يامعودة هسة تسمعچ خطية وتنجلط والله وگامت راحت على زنوبة وطلعت جهاز قياس الضغط قاست ضغطها

ريحان : ها يامعودة امشي ناخذها للمستشفى اني اعرف اسوق

فضيلة : انه اوديها خابرت السايق مالتي وإنتِن ظلن هنا لا تطلعن تفرفرن استرن علينا زلمچن هاجين والله يعلم بحالهم خاف يرجعون مايردولهم مره تداريهم تشوف طلباتهم ودفعت ريحان وراحت گعدت يم زنوبة شو گومي زنوبة زنوبة گومي خية گومي وگعدتها بالگوة ولچ مليكان روحي جبي عباتها وشحطاتها وإنتِ ام الز .. ام حفيدي لفيلها شالها عدل

زنوبة : وين تريدين بية عوفيني أموت شلي بحياتي آنه ووليدي الله يعلم بحالة هسة وين ما وين تووه شحالة هسة نايم گاعد جوعان عطشان اويلي عليك يمة وعلى حالك ولكم الله واكبر عليكم والله كلشي مامسوي ليش هيچي سويتو بي حسبيه الله ونعمة الوكيل خية ام علي دبريني شاسوي نار بگلبي وين اولي وين انطي وجهي

فضيلة : وين تولين اگعدي واسكتي وانتظري علي بلكي يالگالة حل

زنوبة : وان مالگى شأسوي ها شاسوي گللي ودبرني وگامت تلطم

فضيلة : خايبة كافي تلطمين وتفاولين عليه وامشي خلي أخذچ للمستشفى وگومتها بالگوة واخذتها وطلعن حتى توديها للمستشفى

ريحان : جمانة هاي فضيلة لو غيرها لا يمكن اني متيهة مو هي لان هاي حنت على خالة زنوبة واخذتها للمستشفى وما فشرت علينا ولاسبتنا ولا تعاركت ويانا

جمانة : اي والله حتى اني مستغربة منها لأن صارلها ٣ ايام هادئة وتگولي ام حفيدي بطلت تگولي ام الزمايل وتعيرني يله بلكي الله هداها

ريحان : يامعودة هاي ام لهب شيهدي منها الله بس خاف جاي تفكر بمصيبة جديدة وتستغل الوضع كالعادة هالساكتة ولچ ملاك لا تباوعين وتفتحين حلگچ على كبرة ولاتصفنين على كلامي وتاخذين بي فاهمة