خلف اسوار العشق انتِ مملكتي

البارت الأربعون

الكاتبه : عليا الناصر

البارت : 40

دانية : اسمعيني ريحان تجين ويانا ومترجعين يم هذولة الشياطين بعد وهسة خلي نشوف دكتورچ وين راح حتى اذا هاي خلي يخرجچ من المستشفى

هند : اي ريحانة تعالي ويانا على الاقل أني موجودة واغيرلچ الضماد وكلنا نداريچ هناك

ريحان : اي ميخالف اروح وهسة خلي نشوف الدكتور حتى يخرجني لأن حاسة روحي زينة وما كو داعي ابقى هنا بس والله أبو سمرة بعد حچاية هند ولا راح يشوف نفسة يجوز راح للكهف يعتكف يداوي گلبة المكسوروالمحطم من وراچ هاي اذا ما انجلط ومات من القهر

هند : ريحان رجاءاً سدي الموضوع ولا تجيبين سيرته وتضوجيني

ريحان : لچ والله خطية هذا ابو سمرة مسكين واگع بحبچ هو صحيح دبس وإنتِ چنچ گيمراية السدة ليش بس ليش هيچي كسرتي بخاطرة ما شفتي شصار بحالة انگلب وجهة گلاب اذا صار بي شي خطيته برگبتچ

هند : ريحان وتالي وياچ ليش ما تفهمين ما يوالمني والله وأني ما أريد مشاكل ويا ماما وأسد لأن أدري بيهم كلش زين يعارضون وميقبلون

دانية : ريحان عوفيها وكافي تضغطين عليها ولا عبالچ هي مثلچ من وگفتي بوجه الكل وأخذتي لحيدر هاي فقيرة وجبانة عيطة وحدة من أسد لو عمة منى تفقد الوعي وتنام بالانعاش هاي اذا ما دخلت بغيبوبة

ريحان : اي والله صدوگ وترى حتى إنتِ مو أحسن منها وبعد أجبن اذا عاط بيچ أسدچ تخترعين وتگومين تتراجفين منه

علي : دخل هو وجمانة السلام عليكم ها ريحانة شلونچ ان شاء الله صرتي احسن

ريحان : اي الحمدالله وعفية اذا ما تصير زحمة عليك روح للدكتور وخلي يكتبلي خروج لأن مالها داعي ابقى نايمة هنا

جمانة : ريحانة لازم تبقين على الاقل لباچر لأن جرحچ بعد طري وخاف ينفتح عاد على الاقل هنا راساً يعالجونة الچ

ريحان : هنودة موجودة وهي تضمده الية وتعالجة لعد عليش سويناها دختورة على گولة بيبي غير حتى نستفاد منها وتداوينا

جمانة : اي وأسد هم گال يخلي هند تجيچ لبيتنا مرتين باليوم حتى تضمدلچ الجرح

دانية : لا ماكو داعي لأن راح ناخذها ويانا

حيدر : دخل وبحدة وين تاخذينها وياچ ومن دانية دارت وجهها وما ردت عليه ريحان ممنوع تطلع لغيربيت مو بيتنا

علي : ريحان إنتِ بكيفچ وين تريدين تروحين ووين تشوفين نفسچ ترتاحين روحي

ريحان : أريد اروح لاهلي احسن هناك ارتاح وهم حتى هند موجودة تضمدلي ايدي

حيدر : واحنة قابل عجزانين منچ وماكو مضمدين نجيبهم يعالجونچ وهم جمانة تعرف تضمد وتخيط الجرح بعد شكو رايحة ما تروحين