خلف اسوار العشق انتِ مملكتي

البارت السابع والعشرون

الكاتبه : عليا الناصر

البارت : 27

أسد : هاه هند خلصت عملية دانيه

هند : اي الحمدلله خلصت بس هوايه متأذيه الله لا يوفقهم وخنگتها العبره ماكملت وگامت تبچي

الحارث : طلع وراها أسد بت عمك رجليها منا لشهر أقل ان شاء الله يطيبن وترجع مثل قبل بس ..وسكت ودحگ على هند بعدين رجع التفت على أسد ترى شغلة داعمتها سياره موضابطه البنيه متعرضة لضرب عنيف مبين وهو سبب تكسير رجليها فاحچي الصدوگ ولاتضم عليه منو هيچي مسوي بيها وليش لان اكو هيئة تفتيش من اليونسيف بالمستشفى واذا كتبت تقرير راح يكشفوني چذاب فحتى نلم السالفه ونشوفلها غير مكان نخليها بي قبل لا باچر يدخلون لغرفتها ويشوفونها وترى هذوله دكاترة بريطانيين وامريكان مومثل جماعتنا مايتفاهمون بهيچي سوالف ويدخلونها بحقوق الانسان والعنف ضد المرأة ومدري شنو ويسوونها هوسه شكبرها شگدها

أسد : وهسة شلون يعني اطلعها من المستشفى وبعدها حالتها مامستقره

الحارث : إنتَ لو تحچيلي شصار چان أگد..

أسد : قاطعة وبحده اللي صار چانت مخطوفه والخاطفينها مكسرين رجليها ضاربينها بالبوري الحديد مالت المي وفضيله الكلبه الساقطه دازتهم عليها حتى تنتقم من عدنا ارتاحيت هسة

الحارث : بس ترى سليمه هي يعني مامتعرضة لاغتصاب وان شاء الله مرحله وتعدي أسد الافضل خلي ناخذها لبيتي هناك احسن منا ليومين لما  تستقر حالتها وبعدها طلعوها

خالد : السلام عليكم شلونچ دكتوره هند خير خوما اكوشي

هند : بلعت ريگيها ودحگت على أسد اللي خزرها وردت وعليكم السلام ماكو شي بت عمي سوت حادث بسيط واحنه يمها

خالد : سلامتها اذا تحتاجين شي اني موجود و..

هند : قاطعته شكراً الك دكتور بس دكتور الحارث موجود وميقصر

خالد : اي دكتور الحارث ميقصر ومع ذلك اذا احتاجيتي شي لاتترددين اني موجود عن اذنكم

أسد : بحده بعد إعزميه على چاي گهوة هسة وكتها تطگين سوالف ويا هذا السطل بعدين ولچ منين تعرفينه انتِ لهذا هااا وشنو هالميانه الزفرة وياچ

الحارث : من شاف هند دنكت وجفلت بالاول ومن صاح بيها تدخل شبيك يول لاتتخبل على البنيه شسوت هي خطيه خالد دكتور ويانا وهو المسؤول عليها بالتدريب وسلم عليها بعد شكو سويتها سالفه شكبرها

أسد : لاأسويها ولا أبد بس الميانه الزفره أني ماأحبها وهي تدري كلش زين بهالشي ومحذرها من عنده بعدين هو شنو هالواگة مالته مو جاي يشوفك واگف ويانا يعني مامحتاجينه شكو بعد يتباهى وكل شويه واني موجود واني موجود هاا