خلف اسوار العشق انتِ مملكتي

البارت الثامن والستون

الكاتبة : عليا الناصر

البارت : 68

خالد : أسد .. أسد لحظة أوگف يا أخي شبيك شنو إنتَ  تريد تخليني أركض وراك

أسد : بدون ما يلتفت عليه شوف دكتور محد گالك تركض وراية وبعدين إفهمها ما عندي حچي وياك ليش تلح بعد

خالد : إعترض طريقة ووگف گدامة شتريد تگول عني گول بس ما راح أفك عنك الا تفهمني شجاي يصير وسليمان شگايلك حتى يخليك تسكت وما تفتح حلگك بعدين ترى الساكت عن الحق شيطان أخرس ومو إنتَ اللي تسكت عن الحق وتصير شيطان

أسد : تعصب منه وطبگ حواجبة وبحدة شوف لا تظل تبحوش ومسوي نفسك الفاهم الوحيد بكل اللي جاي يصير ولا عبالك اذا عرفت كل شي وخبرته لأبوك راح ترتاحون لا إنتَ غلطان لأن إنتو أكثر الناس راح تنضرون واذا أني ساكت فمو لأن خوف ولا لأن أني شيطان أخرس مثل ما تگول وإنما لأن نطيت كلمة لأخوك تفهم شنو يعني نطيت كلمة

خالد : اي أكيد أفهم وهذا يثبت كل شكوكي ومتأكد سليمان مسوي مصيبه چبيرة هالجألئلك إنتَ بالذات وخايف من عدنا وإنتَ جاي تتستر عليه ولهذا أنة خبرته لأبويه بكل شي وهو جاي لهنا ويجوز باچر يوصل على الأغلب  وتفاهم إنتَ وياه وسليمان وخلي يفيدكم تكتمكم وكلمتك اللي نطيتها اله

أسد : ليش تظل زعطوط يعني من راح تشلع گلبه لأبوك وتجيبه مناك لهنا شراح تستفاد وعبالك راح ينحل كل شي بجيته  وما تتعقد الامور

خالد : بس فهمني إنتَ ليش تستصغرني وما شايلني من گاعي ودومك شايل خشمك عليه

أسد : لا تگوم تخربط وتخرط حچي من كيفك أني ما أستصغر أحد وبطل تعيش بهالأجواء القديمة واذا على اللي صار قبل بينا فما راح أعيده عليك لأن أني ما أحب أفتح الدفاتر القديمة وإنتَ تدري كلش زين منو السبب اللي خلاني أسوي بيك اللي سويته بعدين إنتَ هم الله يسلمك چانت بدايتك غلط تريد هند تجي تفوت من الباب وتخطبها مو تظل تركض وراها ووالله لو مسويها من الأول چان راساً إنطيتك ياها وما شلعته لگلبك

حجي خطاب : خيركم يابا ليش صوتكم عالي أسد وتالي وياك إنت َما تبطلوا إمن سوالفك

أسد : جدي لا تفهم غلط مثل الأخ وما كو لا سوالف ولا شي وأني طالع عندي شغل ومواعد جماعة وينتظروني

عبدالله : دخل هو وأميرة راجعين من المطار خير شعندك طالع بهالليل وهالجماعة الا تشوفهم بهالوكت هذا ما يصيروا تأجلها لباچر عمي خالد شلونك الحمدالله عالسلامة وتسالم هو وخالد وتباوسوا

أميرة : الحمد الله عالسلامة دكتور وراحت على دانية

أسد : لا ما يتأجل شغلي وماكو شي لا يظل بالك وبكر ويايه يعني ما رايح وحدي وأصلاً مواعدهم قريب هنا بمطعم حكم دكتور البيت بيتك ونورتنا بجيتك وعافهم وطلع