خلف اسوار العشق انتِ مملكتي

البارت الرابع والأربعون

الكاتبة : عليا الناصر

البارت : 44

أسد : راساً ضرب الميز بقبضة ايدة قوي وحچي بحدة ومن بين سنونة هسة تگومين تولين منا لا أرتكب بيچ جريمة وأدفنچ هنا ومن دحگت عليه مصدومة وفكت حلگها عليه متفاجئة صاح بيها بسرعة كلبة گومي ولي شتنظرين

خالد : من شاف هند شلون إخترعت وگامت ما تندل طريقها وأخذت جنطتها وطلعت تركض حتى عثرت بالكراسي أكثر من مرة لزم أسد من متنه لحظة أخ أسد لا تفهم غلط ترى بس..

أسد : قاطعة وبحدة صاح بي وهو يدفعة بقوة إكل نعل وانچب ولا تفتح حلگك بكلمة وعافة ومشى وصاح بدانية ما تمشين تولين إنتِ الثانية شكو فاكة حلگچ و سحبها من ايدها وطلع صعدها بالسيارة وشغلها وهو يسوق سريع وينافخ

دانية : أسد على كيفك لا تسوق سريع ومن ما رد عليها وبقى يسوق سريع حتى زاد السرعة أسد راح أتقيء والله على كيفك هند ما عدها شي ويا هذا الدكتور لا تتخبل عليها وإنتَ صدوگ فهمت غلط و..

أسد : قاطعها ولچ شأفهم غلط ها گاعدة وحدها ويا وبمطعم شيسووون يحلون قضية الشرق الاوسط يعني ولو صدوگ ما عدها شي مثل ما تگولين ما تگعد وحدها هالگعدة ويا

دانية : مو إنتَ ما تعرف شصاير بينهم حتى تحكم راساً على گعدتهم من شفتهم سويه

أسد : ليش شصاير ولچ احچي لا تضمين علية لا والله اليوم كلچن اشعلچن شعل وأسويچن طشار بس أرجع احچي

دانية : ما كو شي ينگال وخفف السرعة لخاطر الله والله مصاريني راح تطلع من حلگي أسد كافي خبال خفف السرعة ومن زاد السرعة بعد أكثر بعنادها وطير السيارة تطير ما تحملت وراساً طلعت علاگة من جنطتها وفتحتها عالسريع وتقيئت بيها وأسد ولا إهتم الها ولا دارلها بال

أسد : لحگ على هند اللي زادت سرعة سيارتها ومن وصلت للبيت وراساً عافتها بالبوابة ما دخلتها ونزلت تركض راحت لبيتهم حتى عافتها مشغلة والباب مفتوح طبگ السيارة مالتة بصفها ونزل وراها وصاح بمهدي تعال فوت السيارات لا تخليهن سادات الباب ولحگ هند لبيت ابوه

دانية : نزلت وراه وكومة تقيئت مهدي فدوة جيبلي مي بسرعة ورجعت تتقيء

مهدي : جابلها بطل مي هاچ هاچ يا معودة شجرالچ ما تگوليلي شوفي شلون انگلب وجهچ وعبالك مصارينچ راح تطلع من حلگچ

دانية : أخذت منه بطل المي وغسلت وجهها اي والله حچيك صدوگ شنسوي لأسد أفندي وسياقته مالت المخابيل

مهدي : ابقي هنا لا تحركين لا توگعين وخلي أروح أصحي امچ تجي عليچ تاخذچ تفوتچ للبيت

دانية : لا لا تصيحها بية أمشي أني أروح هاي هية بعد تقيئت وإرتاحيت مشكور مهدي ورجعتله بطل المي ولحگت أسد لبيت عمها