خلف اسوار العشق انتِ مملكتي

البارت الرابع والثلاثون

الكاتبة : عليا الناصر

بارت : 34

أسد : عمر عمر تعال ماشفت مهدي

عمر : لا عمو بعده ما راجع موراح يجيب دنو

أسد : هذا وين ولى وطلع موبايله اتصل عليه ما يرد واتصل على دانية نوب هم مترد شلون راح ابتلي بيهم اثنيهم بس يرجعون هسة مهدي وعقله على گدة إنت العوبه اللي ويا شجاچ وفات للبيت ينافخ

حجية مهجة : شوف إسييد آنه ما راضية تاخذون فطيمة للخطاب ولاعبالكم تضحكون على عقلي وتقنعوني وتخلوني انخ واقبل لا لو تموتون ما أرضى وعبيد لا عباله مريض ونخافو عليه ويمشي كلمتوا علية محد گالوا روح اخطبها

أسد : گعد بصفها جده لا أحد يضحك عليچ ولا أبد وترى حتى احنه ماندري بي من راح خطبها من عليوي بعدين مو هذا الخطاب عزيز گلبچ شلون ترفضين زواجة من فاطمة وإنتِ تدرين بي مستقتل عليها لونسيتي من رحتي لابوها مالك وخطبتيها ومن رفض وتحجج وگالچ بعدها صغيرة قنعتيه يزوجها الة  وماجزتي منه الا وافق

حجية مهجة : اي صدگ سويت هيچ بس هذاك أول مو هسة لني أدري بيها ماتصلحلوا مره وتشلعوا لگليبوا وشيسوي بيها وهي يومية فحطانه والربو مخلص گلبها مريضة معلله شجابرة ياخذها خمن ياخذلوا وحدة معافية وهم مووجه بومة ونحس ماوراها هي وإمها غير بس المصايب

أسد : والله بعد هاي تحلينها إنتِ والخطاب وأني خلي أشوف بومتي وين راحت شو لحد هسة مارجعت من دوامها تأخرت ورجع إتصل على دانية

حجية مهجة : يول المسودن شلون تگول على مريتك بومة وهي چنها غزال والكل حاسدينك على حسنها وعقلها

أسد : اي متشوفين يومية صايرتلي مصيبه من عيون العالم الفاكينها عليه من وراها هلگد ما حاسديني عليها  أگول ماتنذريلي نذر شي توديني لسيد يقرى عليه بلكي تنشال عيون العالم مني ودنگ وضحك صفح

حجية مهجة : اي شكو بيها أود .. وقطعت گلامها من شافته يضحك وصاحت بي تضحك عليه وتاخذني على گدوا لعقلي يول وعسته بالعوچية مالتها يالخبل يا أبو الجناني إنتَ ما تآمن بهاي السوالف بس آنه أأمن بيها ودام الله يگدرني وأوفيها أظل أنذر طول عمري

إبراهيم : فات يركض أسد همزين لگيتك وما طالع وگام يلهث

أسد : خير ولك أبوك بي شي

إبراهيم : لا الحمدالله بس دانية يمكن صاير بيها شي هي ومهدي

أسد : فز واگف وصاح بيه شصاير بيهم ولك احچي

إبرهيم : قبل شوية چنت يم وليد وخابروهم بيت خاله گالولهم صاير تفجير كلش قوي يم مدرسة البنات اللي تدوام بيها دانية وهم بيتهم هناك وهم متأذين جهالهم مجرحين والجام مالتهم كله متفلش

أسد : ولك شجاي تخربط إنت وجرة من زيگة وهزة احچي عدل لا أدفنك هنا هسة والله

إبراهيم : والله هذا اللي سمعته وجيت طايرأشوف دانية رجعت لو بعدها ومن عمر گالي ماراجعة بعدها جيت طاير أدورعليك حتى أكولگ وهمزين لگيتك ما طالع