خلف اسوار العشق انتِ مملكتي

البارت الستون

الكاتبة : عليا الناصر

البارت : 60

خالد : عصر الضرف بإيده هند ظلي هنا وديري بالچ تطلعين ورايا برى وطلع هو

هند : راساً راحت فتحت جنطتها وطلعت موبايلها ودگت على أسد وهي ترجف ألو أسد وينك إلحگ علينة وتعال بسرعة الله يخليك وحچتله اللي صار بشكل مختصر

خالد : رجع وبحدة صاح بيها ولچ هاي شسويتي وجر الموبايل من إيدها

هند : هاي شبيك خابرت أسد شكو تصيح عليه

خالد : ترى أنة مو أطرش وسمعتچ كلش زين شحچيتي وشكو خابرتيه لهذا صخام أخوچ غضب هاااا وبعدين ما تستحين تگوليله الحگ علينة شنوشايفتني مو رجال مو بعينچ أنه

هند : مو قصدي أقلل من قيمتك بس إنتَ غريب هنا وأهلك بعدين عنك وما عندك
أحد يوگفلك وأسد أخوية وموغريب وإحنه متعودين شيصير نگوله وما نضم عليه شي و..

خالد : قاطعها وصاح بيها إنلصمي ولا تسوينه اليه ملاك وهو السبب وكل المصايب من جوى راسة وأنة متأكد هو اللي كسر الجام ودز هاي الرساله لن محد اله مصلحة ما أخذچ غيرة وهو من البداية معارض وما متقبلني لو نسيتي شسوى بيه قبل

هند : بحدة أسد أكبر من إنو يسوي هيچ شغلات تافهة ومالت مزعطة ولو چان عند شي ضدك چان ما بقى ساكت وراساً گالة بوجهك مو يتختل مثل الجبان ويجي يكسرلك جام بيتك ويعوفلك ورقة وطلقة أسد ما يسويها واذا على اللي سواه وياك قبل ورفضة الك بالبداية من إجيت تخطبني وشلون طلب من بكر ينهي عليه حتى يفركشها للخطوبة فهذا چان طلب من أبوك الشيخ گاله ما أريدكم تنطونه إختك وإرفضوه لأن هو يعاندني ومفشلني گدام عمامة والعشيرة ولأن دومة يعترض على عاداتنا وتقالدينة وما عاجبته تصرفاتنا ودومك مبتعد عنه

خالد : هههههه والله ضحكتيني ولچ هاي لهدرجة أخوچ مسويلچ غسيل دماغ ودار دار ما لگى غير هاي الچذبة گالها الچ وقلة ما بيده نوب يتبلى على أهلي وعلى أبوي الشيخ

هند : اللي جاي أگولة الك مو كذب واذا ما تصدگ إتصل هسة بأبوگ وإسأله وراح يأكدلك إنو كلامي صحيح مو كذب  شوف خالد أسد خط أحمر وما أسمحلك تحچي عليه لو تتهمة بأي إتهام باطل وجرت الموبايل من إيده وشالت جنطتها وتريد تطلع

خالد : إعترض طريقها ومسكها من متنها وين وين رايحة من كل عقلچ أخليچ تروحين لوحدچ شايفتني رجل كرسي هنا وتتصرفين على كيفچ

هند : دفعت إيده عن متنها وبعدتها أخوية على جية وهو راح ياخذني ويرجعني وياه للبيت وإتهامك اله مستحيل أسامحك عليه

أسد : بهالأثناء وصل طبگ سيارته برى ونزل لأن هند نطته العنوان ودخل ومن شاف جام الصالة مكسر صاح هند هند وينچ هند وفات للصاله عليهم لأن الباب چان مفتوح ولچ هاي شصاير وياكم ترى كل شي ما إفتهمت منچ من خابرتيني