خلف اسوار العشق انتِ مملكتي

البارت الخامس والستون

الكاتبة : عليا الناصر

البارت : 65

أسد : يول ما تجوز إنتِ نفسك ما لعبت ما مليت من النسوان يومية وحدة مطبب سمرة مطلع شگرة

أمير : أهوو لو بس تبطل مني يا أخي شعليك بيه إنتَ أني عندي النسوان مثل الفواكه وأحب أنوع وأسوي كوكتيل

أسد : ومرتك وجهالك شنو موقعهم عندك بعدين مرتك مو خطية تخونها وهي ما مأذيتك ومداريتك ومدارية جهالكم وحافظة بيتكم وصاينته

أمير : يا معود خيانتيش أني أتزوج متعة يعني بالحلال ومرتي مقدرة ومقامها عالي ومحفوظ وعلى راسي حاطها بس والله ما أگدر من أشوف وحدة حلوة وتعجبني گلبي يگوم يطگطگ عليها وما ألگى روحي الا نخيت وتزوجتها

أسد : والله على هذا طيحان حظك زين ما تنسى شغلك وتگوم تخربط وتلوص الاول والتالي

أمير : لا عاد كل شي ولا شغلي لهنا وstop وهسة خلينة نحچي شوية وأفيدك وتفيدني هذا قتيبة اللي سألتك عليه شتعرف عنه إنت

أسد : واحد ساقط وطايح حظ حظة وواگع من السطح ومنتهي بس مرة

أمير : شنو علاقتة بيت مالك سمعت جهاد يگول گرايبهم إبن عمهم يمكن

أسد : لا مو إبن عمهم تعرفها لفضيلة هذا الساقط يصير إبن أختها وهو من نفس طينتها

أمير : والله مبين هو من سوالفه المكسرة ووسخاتة إنتَ خوما متواجه وياه وعدكم طلابة شي منا منا

أسد : لا أعرفة ولا يعرفني وما متواجه وياي بيوم وهسة گولي ليش كل هالأسئلة عليه اله علاقة بموتت حيدر وخطف بكر ودانية

أمير : والله لحد هسة ما مبين اذا اله علاقة بهالقضايا لو لا بس بالتحقيق إنذكر إسمه أكثر من مرة وخاصةً بالشغلات مالت التزوير بس لحد هسة ماكو إثبات رسمي عليه

أسد : توقع منه هذا يسوي أي شي لأن بايع ومخلص وأهم شي عند الفلوس والدياحة وما تهمة شنو الطريقة اللي يحصل بيها عليهن

أمير : وشيخ سليمان الى متى راح يظل ساكت ما حچيت وياها لأبو الشيخ وفهمته شمسوي إبنه يجوز هو بگدر يفك  عگدت لسانة

أسد : لا ما حاچيته والله لأن سليمان طلب مني ما أدخله بالموضوع وترجاني وأني نطيته كلمة وتدري بيه ما أگدر أرجع عنها لكلمتي

أمير : معناها لازم تقنعة يحچي وبأي طريقة والصراحة ما جاي أفتهم ليش جاي يتستر  عليهم وشنو مصلحته من كل اللي جاي يسووي

أسد : والله الظاهر الموضوع أكبر منه وبي مواثيق وعهود وهو إبن عرب وشيوخ ولازمينه من إيدة التوجعة من هالناحيه ولاويلة ذراعة

أمير : أسد ما عدنا حل ثاني مفاتيح هواي إمور بيده لو نطق راح نحل هوايه شغلات مدوختنه وشوف راح أنطيك مهلة يومين تحاول تحچي وياه وتفهمة خطورة الوضع ما إفتهم وإقتنع أني بنفسي أروحلهم للبصرة وأواجهة واذا ما قبل  أخبره لأبوه الشيخ بكل شي وخلي هو يتصرف