خلف اسوار العشق انتِ مملكتي

البارت السادس والخمسون

الكاتبة : عليا الناصر

البارت : 56

الحارث : دحگ على خالد هاي تحتاج عملية وفوراً

خالد : فرك وجهة بإيده ليش شبيها

الحارث : ما تشوفها عدها الزايدة ومبينة حالتها مستعجلة وإذا نتأخر أكثر تنفجر ببطنها وتموت لا سامح الله

خالد : أني اللي أسويلها العملية وهسة راح أروح أحضر غرفة العمليات وأكمل الإجراءات بسرعة وإنتَ إنتقلها بعدين وجيبها ورايا

الحارث : يولو خالد إنتَ مخبل عاقل بهالحالة هذي مالتك وتريدني أخليك تروح تسويلها العملية

خالد : يا معود وشبيها حالتي كل شي ما بية والله

الحارث : لا كل شي ما بيها حالتك دحگ لروحك شلون ترجف وگلبك راح يطلع من حلگك من الخوف يول إصطلب شجرالك إنتَ شدعواك وعبالك هاي أول مرة تجيك هيچي حالة

خالد : يا خوي والله مو بيدي وخايف عليها تتأذي ما تشوفها لحد هسة فاقدة وعيها

الحارث : اي وتريد تسويلها العملية بخوفك هذا بلكي رحت موتتها للبنية لا سامح الله شراح يخلصك من أسد هو هسة شايش عليك وما يبلعك ولا يواطنك بعيشة الله

خالد : هذا غضب طلعة من الحسابات هسة ولا تجيبلي طارية وتغثني بي ولا تخاف على هند هاي بعيوني وما أذيها لن هي روحي ماكو واحد يأذيها لروحة وأنة هسة راح أسويلها العملية وإن شاء الله تنجح وإنتَ خليك يمها وطلع

الحارث : طلع موبايلة هلا أسد شلونك شنو نايم هااا لا ماكو شي بس شوية هند مو زينة اي يمنا بالمستشفى إجتي وتخربطت عدها الزايدة ووضعها مستعجل ولازم واحد يوقعوا على أوراق مالت العملية حتى ندخلها فوراً اي والله مستعجل حيل تمام أنتظرك الله وياك وسد الخط أدري خالد هلگد ما مستعجل وإنخبص نسى لازم ياخذ موافقة أهلها ويريد يدخلها على مسؤوليته والله هالحب يذل أحسن رجال ويخليه ما يسوى فلسين ..

------------

منى : هاي بنتك أبد ما تسمع الكلام هسة إنتِ مريضة وتدرين بروحچ حالتچ مو زينة شلون تجين بوحدچ للمستشفى وتتخربطين وتوگعين بالله لو متخربطة بالطريق ومدعومة وميتة چان شحصلنا

عبدالله : يا مره ما يصير إلا اللي الله كاتبوا  وهسة إگعدي وإنتظري لما يطلع الدكتور ويطمنا على حالتها

أسد : ها ما طلع الدكتور مو عبالك تأخروا وطولوا هواية

عبدالله : بابا تهدى شوية إنت الثاني وتعال إگعد هسة يطلعون

أسد : گعد بصفة وگام يهز برجلة أني ما بلغت أحد بس إنتو لأن ما بينة حيل بس يسمعون العشيرة كلها تجي لهنا

عبدالله : زين سويت شكو جايين وبالذات جداتك تعبانات خطية وإختك ما بيها شي إن شاء الله ومنا لشوية يطلعونها