خلف اسوار العشق انتِ مملكتي

البارت الـرابـع والــعــشــرون

الـكـاتبة : عـلـيـا الـنـاصر

خـلـفَ أســوار الــعـشـق أنـتِ مـمـلـكـتـي

الـبـارت : 24

بعد العرس مباشرة ودع حجي خطاب العايله كلهم ووصى عبدالله وأسد يديرون بالهم عالبيت والعايله وبالذات دانيه وامها بعدهاحجيه زهرة وسلمى هم ودعن الكل وصعدوا بالسيارة مالت سلام اللي وداهم للمطار

زمرد : گعدت عالقفنة بالصاله ونفخت بقوة اووف عمه ودانيه معتكفات بالغرفة مالت عمة حتى ماطلعن يودعنهم همه راحو ودعوهن وبكر المسكين صارله يومين هاج حتى الحسن ضايج ومقهور عليه وخطية شگد دور عليه ولحد هسة ماگالوا لبيبي لطيفة قشمروا عليها گالولها راح لبيت البستان يبقى هناك شكم يوم كله من ورى ريحان علگتها ومشت

حجيه مهجة : كافي لحد يجيب طاريها للصفيرة حتى لاتكدّر امها المسيچينه ضغطها نوب صاعد نوب نازل والله آنه خايفة عليها لايصير بيها شي

هند : بيبي مااريد اخوفچ بس ترى وضعها لعمة كلش مو زين مدا تاكل ولاتقبل تاخذ علاج ودانيه وضعها بعد اتعس منها بس ساكته ومتحچي فشلون بيهن

حجيه مهجة : يمه آنه شبيدي عليهن احير عليمن التفت التفت عليهن لو على بكر لو على امو اللي لودرت بي هاج على وجهة وهايم شراح تسوي

زمرد : بيبي اشو جدو حسن ذابها عالصامت ومحد سمع صوته شعجب وخاصة على زواج ريحان مااعترض ولا گال كلمه

حجيه مهجة : من ورى منصور وخباله لنه طرد اهل رگيه وحسن زعل منه چيفن ما دارله بال وماسمع كلمته والله لو ماهالسالفة يبوو چان لعب بينه لعب وماخلصنه من لسانو

منى : دخلت شايطة ادري وتالي وياچن شنو مخليني وحدي بالبيت فزاعة خراعة خضرة ولاواحد يلفى بالبيت هسة هاي صغيرة ومتفتهم مااعتب عليها انتِ يالچبيرة الدكتورة متگولين خلي اروح لبيتنه خطيه امي خلي اگعد وياها أسولف اصخم صارلچ من يوم حنة فرات هجيتي وبعد مارجعتي للبيت

هند : ماما دنو تمرضت وبقيت يمها خوما اعوفها بوحدها ونوب هسة عمه اميرة تخربطت فلازم ابقى يمها هم تحتاجني

منى : واني ابقى ويا الحياطين هناك بعدين انتن وين اختفيتن وكت الزفة مالت ريحان بالله

زمرد : والله اني چنت العب بلي ويا سلام وكرار ابو اذان شنو اعوف الگيم واخسر من ورى زفة ريحان يازفة يابطيخ اهم شي اكمل الگيم وما اخسروهند چانت گاعدة ويا مريم وبيبي زهرة مسويات جلسه مالت كعك وچاي

منى : گومن امشن للبيت گدامي يله بيت خالتچن راح يجون عالعشا مو عيب منهم من جوي بحنة فرات وباتو وبقوا للعرس ماشافوچن انهزمتن هنا يله امشن