خلف اسوار العشق انتِ مملكتي

البارت الخامس والخمسون

الكاتبة : عليا الناصر

البارت : 55

ريحان : وصلت للمستشفى وچانت تنتظر دانية برى حتى يفوتن سوى  وفجأة گبت وبصياح هي هي هي ولك إنت ما تستحي على دمك رجال شكبرك شگدك شلون تمد إيدك عليها عوفها إنكسرت إيدك إن شاء الله

دانية : نزلها مهدي وراح ومن شافت ريحان هادة وتتمالخ ويا الرجال راحت عليها وجرتها من إيدها ولچ ريحان شبيچ وياه وأشرتلها عالرجال

ريحان : عتت إيدها وما ردت عليها بحدة والله إنتَ فلا تستحتي جاي أگولك عوفها

براق : بدموع لأن أذاها من ضربها سالم عوفني وكافي فضايح لخاطر الله وروح منا

سالم : صاح بيها غصباً ما عليچ تقبلين وأكسر راسچ وهسة أخذچ للسيد وأگطع عليچ مهر ونتزوج وما تخذينه لهذا اللي متقدملچ

براق : ما أتزوج والله وما أريد أي أحد بس عوفني بحالي

سالم : حچي يفيدچ عبالچ تضحكين عليه إنتِ وإمچ وتروحين تاخذين بالبوگة وجرها من شالها وگام يكفخ بيها

ريحان : ولك عار عوفها إنتَ صدوگ مو رجال وفلسين ما تسوى بسوگ الزلم وحقها ترفضك وما تاخذك

دانية : ولچ ريحان تخبلتي شجاي تسوين إنتِ ما تگوليلي

سالم : دفع براق ووگعها بالگاع إمشي زفرة منو إنتِ وتگولين عليه هيچ اليوم أني أعلمچ ورفع إيده يريد يضربها

سيف : بهالأثناء وصل ولزم إيدة وضربة بوكس وگلبه بالگاع كلب إبن الكلب منو إنتَ حتى ترفع إيدك عليها

سالم : مسح حلگة من الدم وفز ماكو كلب غيرك وهجم على سيف وتضاربوا وصارت هوسة والعالم إلتمت

ريحان : گومت براق من الگاع وراحن وگفن على صفحة وجرت جنطة دانية فتحتها وطلعت منها بطل مي هاچ غسلي وجهچ وإشربي ولا تخافين ونفظت ملابسها وعلى فكرة أني ريحان وهاي أختي دانية

براق : شربت المي وغسلت تسلمين شكراً يعني هسة إنتو أخوات

دانية : لا منو يگول هاي مو أختي ولا أعرفها وبحدة ولچ ريحان منو هذولة وشلون هيچي تهدين وتتعاركين ويا رجال غريب نسيتي روحچ لو شنو

ريحان : أهوو عاد دانية لچ بابا شبيچ هاي الدكتورة براق ومن دانية نظرتلها مستفهمة تنهدت اللي على أساس سيف يريد يخطبها

دانية : والتفتت على براق زين وهذا الحنفيش منو شيصير منچ

ريحان : اي والله دكتورة صدوگ منو هذا

براق : أبو يصير إبن عمة لأبوية ويريد يتزوجني بالغصب وأني ما أريده وكلما يسمع بواحد متقدملي ويريد يخطبني يهد ويتعارك وهيچي يتخبل

ريحان : شنو قابل تايهة هي بعدين هو هذا الرثع هم شكول وحدة تقبل بي 

دانية : ريحان إسكتي ولا تشعلينها زايد شوف يا الله كل اللي واگفين ما بيهم خير يفازعونهم واوحد راح يذبح واحد