خلف اسوار العشق انتِ مملكتي

البارت الثامن والخمسون

الكاتبة : عليا الناصر

البارت : 58

حجية مهجة : ها يا حجي بشر شصار والخطاب وينو ما جي وياك

حجي خطاب : گعد بصفها والله يا حجية اسكتي وخليها والواحد ما يدري شيگول غير حسبي الله ونعم الوكيل والخطاب يقى هناك بالمستشفى يم نسابته

حجية مهجة : اي ما گتلي شصار وياهم هدية العوبة جتي خرطت وراحت وكل شي ما إفتهمت منها أنة

حجي خطاب : هذا إبن عم العروس قبل ما تطلع الزفة هاد عليهم وخارطهم بالرشاشة ومصوب العروس وبمكانها كاتلها وموتها ومصوب سيف هم وهسة حالته خطيرة وبالمستشفى والدكتور يگول اذا صحى ينشل لن وحدة من الطلقات جايه بالعامود الفقيري

حجية مهجة : لا إله إلا الله الله يرحمها هالمسكينة ويصبروا لگليب إمها زعم زوجتها حتى تفرح بيها نوب إنگلب العرس عزة وراح تدفنها بالتراب زين ماكو واحد شافة وگدر يمنعوا

حجي خطاب : مستغل الهوسة مالت الزفة ومن بينهم فايت وما حاسين بي الا من صايح عليهم وخارطهم ولوما ستر الله والخطاب مچيت عليه وضاربوا وما خذ الرشاشة من إيدوا چان ذبح الامة كلها

حجية مهجة : وليدي سبع ويذب روحوا عالموت الله يحميه ويحفظوا إن شاء الله وهسة وين أخذوا هذا المسودن ودوه للسجن والله هذا يستاهل إعدام ضيعلة بنية بعمر الورد الله لا يوفقوا إن شاء الله

حجي خطاب : أخذوه سلموه للمركز واي والله ضيعيها للبنية من وراه وأنة وحجي صافي حذرناهم والله منو وگتلهن سووه للعرس بالشمال لنه مو ثقة وما يتأمن بس شو همة ما راحوا للشمال وعلى أساس يطلعون بالزفة لهناك بس هو هذا قدرها البنية تموت بهاليوم

حجية مهجة : اي والله مسيكينة قسمتها وهذا سيف هم خطية الله رحم بحالها لأموا المسكينة وخلاه عايش حتى لو مشلول المهم حسوا بالدنيا

إبراهيم : جدي همزين لگيتك أبو درع وإخوانة بالمضيف وأبوية گالي إذا جدك موجود خلي يجي

حجي خطاب : هاي علمود سالفتوا لمهيدي والحسن همزين جوي خلينا نفضها بسرعة ونخلصوا من المشاكل ما بينا حيل يصير بينا مثل بيت مالك

حجية مهجة : لا اسم الله الرحمن اي يا حجي فضوها ودامهم يريدون فلوس إنطوهم شگد ما يريدون وسدوا حلگهم خما نجوزوا من وليداتنا

حجي خطاب : هو هم هيچ راح نسوي والحمدالله الولد المضروبين تشافوا واليوم طلعوهم من المستشفى

إبراهيم : شگد چذابين وكلاوچية مو على أساس فاقدين الوعي ومدخلينهم بالعناية المشددة طلع كل شي ما بيهم

حجي خطاب : جدي سوو هالفلم حتى يحبسونهم لمهدي والحسن وحتى يجبرونا نتوسل بيهم وننطيهم الفلوس وهسة من شافونا طلعناه لمهدي ودرينا بولدهم زينين وكل شي ما بيهم ما خلو واحد ما دزوه بس تعالوا إگعدوا ويانا وإفصلونا