خلف اسوار العشق انتِ مملكتي

البارت الخمسون

الكاتبة : عليا الناصر

البارت : 50

زنوبة : يمة سيف شصاير ما تگولي هاي جمانة شجاي تحچي شنو طلاگ وليش راحت لأهلها ما تفهمني علي شمسويلها يول ما تحچي وتريح گلبي

سيف : يمة دخليچ خلي أني أفتهم بالأول شصاير وأفهمچ بعدين وبس فتح  موبايلة اللي چان مغلق رن بإتصال من علي هاي علي جاي يتصل وفتح خط هلا علي

علي : صاح بي وبعصبية أثول ليش غلقت موبايلك

سيف : الظاهر جمانة غالقته لأن چان بإيدها

علي : وإنتَ شلون تنطيها الموبايل أني شفهمتك هي ثور

سيف : لا تصيح عليه وتغلط أني شعلية بعدين أني سويت كل اللي گلتلي عليه بس جمانة أخذت الموبايل بدون علمي بعد شأسويلها

علي : زين وهسة جمانة وينها موجودة يمك

سيف : لا راحت لأهلها وتگول خليه يطلگني وبعد ما أرجع

علي : ولك شلون خليتوها تطلع وبهالليل وحدها تروح على الاقل وصلها إنتَ

سيف : لا تخاف عليها مخابرة إبن أخوها وجاها وأخذها علي ما تگولي شنو اللي صار وجمانة ليش راحت يا أخي فهمني منال الصخلة هي السبب وأكيد إلها إيد بالسالفة مو

علي : منا لبعد شكم أرجع وأحل الموضوع  وأفهمكم كل شي هسة لازم أسده الله وياك وسد الخط

زنوبة : وهسة ما تفهمني باللي صاير هاي منيل شمصخمة ويا علي هناك وجمانة درت بيها وهالراحت زعلانة لأهلها بهالليل وتريد تطلگ من علي مو

سيف : يوم والله ما أدري بس كل اللي أعرفة جاي يضغطون على علي حتى يرجعها لمنال على ذمته وما أدري شنو اللي  لازمينه عليه وجاي يهددونة بي

ريحان : طلعت من المطبخ والله دريت هاي منال مراح تعديها بسلام طلعتها من المصح وگتلها لجمانة وحذرتها منها تگولي هو وبت خالته يگعدون ويحلونها بيناتهم أني ما عليه وهاي النتيجة هي راح تتطلگ ومنيل يرجعها

حيدر : رجع چان برى هاي شجاي تحچين إنتِ معقولة علي يرجعها لمنال بعد كل هالمصايب اللي سوتها وهو ما صدگ يخلص منها بعدين مو حلف گدامنا كلنا وقسم يمين ما يرجعها لو شيصير وجمانة شلون يطلگها وهي حامل بأبنة ما تحچون شبيكم

سيف : يا معود شبيك إنتَ الثاني ما يطلگها لجمانة هي راحت زعلانه وتريد تتطلگ لأن الظاهر منال موصلتلها خبر من موبايلها لملاك وهاي جمانة إشتعلت وعلي يريد بس يرتب وضعة هناك وياهم ويرجع بس جمانة ما إنطت مجال عفية نسوان شگد تغارن لخاطر الله وما بيچن وحدة عاقلة وراكزة ما ينلامون من يگولون عليچين وحدتچن بنص عقل

ريحان : شدعوة عيني سيف على أساس إنتو الرياجيل اللي عقل الواحد بيكم يوزن بلد

حيدر : فكونة إنتَ وياها ولا تدخلونه بمقارنات فارغة علي شناوي عليه وليش ما عافهم ورجع