خلف اسوار العشق انتِ مملكتي

البارت السابع والستون

الكاتبة : عليا الناصر

البارت : 67

حجية مهجة : خايبة الططوى شلون دزيتهم هيچي بسرعة بدون ما تگولين وتحچين ونوب إسييد مو هانة وتلفونة مسدود مدري وينو

زمرد : بيبي الله يخليچ ترى من غير شي أعصابي مفورة وخايفة هواية على دنو وبعدين أني شعلية وتگولين إنتِ دزيتيهم غير جاها الطلگ وشنسويلة لأسد قابل نبقى ننتظرة بالله ما إجى منا ليومين بعد لو تلاثة نگول للجنين إبقى ببطن إمك هسة ولا تطلع لما يجي أبوك

حجية مهجة : يالعوبة أنة ما گلت هيچي كليتيني ورميتيني بس چنت أريد إسييد يحضروا ولادة إبنو لو بنتو

حجي خطاب : دخل زمرد جدي شگد صارلهم من راحوا للمستشفى

زمرد : صار فوگ ساعة تقريباً وإتصلت بالحسن وما رد عليه لأن حضرتة زعلان وماخذ موقف مني وأني چان ما إتصلت بي وعبرته بس ماما وعمة أميرة نسن موبايلاتهن

حجية مهجة : أنة ما أصبر بعد إمشي يا حجي وخلينه نروحو على دوينة نلحگهم للمستشفى

حجي خطاب : لحظة يا حجية إصبري طلع موبايله وإتصل بالحسن ها جدي وين صرتو ليش هيچي ما جاي ترد على زمرد وشلعتوا لگلبنة هسة وكتها ها جابت اي يا الله عمك عبدالله وياكم زين زين هسة أگللهن جدي دير بالك بالرجعة من تسوق الله وياك

حجية مهجة : ها بشر شجابت بنية مو لن حبالتها فاهية لا تنست لا نفسها لعبت

حجي خطاب : حجية شلچن بهاي السوالف والخرافات اللي مالها كل صحة لا أبشرچ ما جابت بنية وجابت توم ولد والحسن يگول راساً جابت ما تأخرت 

حجية مهجة : وي بصلاة محمد وال محمد على بنيتنا ووليداتها كلللللووووش كللللوووووش

فاطمة : نزلت من فوگ وطبگت جواجبها هاي شكو شصاير على شنو هالهلاهل وگعدت ضايجة بصف حجي خطاب

زمرد : دانية جابت توم ولد يوم الچ الله عليكم خلوني أني أبشرة لأسد حتى أقطة بالبشارة

حجية مهجة : إنتِ بس هذا الهامچ يولي چنچ منشار صاعد نازل تلفحين بهالفلوس وين توديهن ما تگلليلي

زمرد : أسوي بيهن ذهب والله مو تدرين بيه أحب الذهب

حجي خطاب : زمرد جدي گومي حضري الغرفة الجوى اللي ينام بيها إبراهيم لمرت أخوچ عمتچ وإمچ يگولن وطلعي هدوموا وشغلاتوا خليهن بالغرفة الفوگ وإستعجلي لنهم راح يردون

زمرد : گامت اي جدو رايحة أحضرها فاطمة تجين وياية

فاطمة : اي يلة إمشي وگامت راحن هي وياها

حجية مهجة : الف الحمد والشكر الك يا ربي من گريت عينو لإسييد بگومة مريتو بالسلامة هي ووليداتو ولو هو چان عبالوا تجيب بنية وخابصنا سارة وسارة