ရည်းစားဟောင်းက ငါ့ကိုမျက်စိကျနေပြန်ပြီ (ဘာသာပြန်)

158

{Unicode}

"ထွက်သွားစမ်း"

အမှန်တကယ်တော့ ယဲ့ထင်မှာ စိတ်ခံစားချက် သိပ်ကောင်းနေသည်တော့ မဟုတ်ပေ။

ငယ်စဉ်ကလေးဘဝမှ အရွယ်ရောက်ချိန်အထိ သူ့မိဘများက သူ့ကို သိပ်ဂရုစိုက်ခဲ့ကြခြင်းမရှိ။သူ့ထံတွင် မိဘနှစ်ပါးရှိသော်ငြား သူဟာ မိဘမဲ့တစ်ယောက်လိုသာ နေထိုင်ခဲ့သည်။

သူသည် မိဘမေတ္တာဆိုသည့်အပေါ် အမှန်တကယ်လည်း အရေးမစိုက်၊ ဂရုမပြုမိတော့။ သို့သော် သူ့အမေက စိတ်ပူပန်ကြောင်းကို ဖန်တလဲလဲ ပြသလာပြီး အက်ခရီလစ် မာဖလာကို သူ့ကိုပေး၍ ဝတ်ခိုင်းစေသောအခါတွင်လည်း ယဲ့ထင်မှာ စိမ်းစိမ်းကားကားနှင့် နှလုံးသားက ဝေးကွာ အေးစက်နေခဲ့သည်။

သူ့ရဲ့ ကောင်းမွန်လှတဲ့ မိခင်ဟာ အနှစ်သုံးဆယ် တိုင်တော့မှာတောင် မိမိသားဖြစ်သူရဲ့ ဓာတ်မတည့်မှုကို မသိခဲ့ရှာ။

သားဖြစ်သူ၏ အကြောင်းကို တစိုးတစလေးပင် မသိသော်ငြား သူ့သား၏ အိမ်ထောင်ရေးနှင့် လက်တွဲဖော် အပေါ်မှာတော့ အလွန် စိတ်အားထက်သန်စွာဖြင့် ဝင်ရောက်စွက်ဖက်နေခဲ့သည်။

ယဲ့ထင်သည် စီးကရက် တစ်လိပ် သောက်နေရင်း ကားပြတင်း အပြင်ဘက်ရှိ ပေါ်လိုက်ပျောက်လိုက် ဖြစ်နေသည့် အသင်္ချေသော မီးစင်ရောင်ဝါများကို ကြည့်ကာ ပြုံးရယ်ရင်း ခေါင်းခါမိသည်။

လက်ထဲမှ ဆေးလိပ်က တစ်ဝက်ကျိုးကျိုးထိ လောင်ကျွမ်းလာသောအခါ အနည်းငယ် အေးစက်နေသော လက်တစ်စုံက အနောက်မှ ဆန့်ထွက်လာပြီး အတင့်ရဲစွာဖြင့် ယဲ့ထင်၏ မျက်လုံးများကို ဖုံးအုပ်လာလေ၏။ ငယ်ရွယ်ပျိုမျစ်ပြီး ရွှင်မြူးနေသော အသံက သူ့နားထဲတွင် တီးတိုးတီးတိုးနှင့် မြည်တမ်းလာသည်။

"ငါမင်းအတွက် ဘာလက်ဆောင် ပြင်ထားလဲ မှန်းကြည့်"

ယဲ့ထင်၏ နှလုံးသားက တင်းကျပ်သွားသော်လည်း ရန်ကျားလိ၏ အသံကို ကြားသောအခါ ရုတ်တရက် နှလုံးသားက ပြေလျော့သွားရပြန်သည်။

သူသည် ရန်ကျားလိ၏ လက်ကိုဆွဲလိုက်ပြီး လက်ဖဝါးထဲ ဆုပ်ကိုင်ထားကာ မိမိလက်ဖဝါးမှ နွေးထွေးမှုနှင့် အကြင်သူကိုပါ နွေးထွေးစေသည်။ တစ်ဆက်တည်း ခေါင်းလှည့်ကြည့်လိုက်သောအခါ ရန်ကျားလိ၏ ပြုံးရိပ်သန်းနေသော တောက်ပသည့် မျက်ဝန်းနှင့် ကြုံဆုံလိုက်ရလေသည်။ မကြာသေးခင်က ဖန်လင့်ယီ၏ ကိစ္စကြောင့် စိတ်ထဲ ခါးသီးနေသော်လည်း ရန်ကျားလိကို တွေ့လိုက်သည်နှင့် ရုတ်ခြည်းဆိုသလို စိတ်အခြေအနေက လုံးဝကို ကောင်းမွန်သွားရသည်။ နှလုံးသားမှာ နွေဦးလေပြေအလား လက်ဖျားခါလောက်အောင် နွေးထွေးနေပါတော့သည်။