مقبرة الحب الاول

مقبرة الحب الأول

مديحة : مالك يا عزة ؟
سلوى : أكيد عمر مضايقها .
مديحة : مش هيرتاح إلا ما يجيب لها جلطة .
مني : لا حول ولا قوة إلا بالله ، معقولة بعد الحب ده كله يزعلك ؟
سلوى : اتكلمى يا حبيبتى ، قولى مالك ؟ أختك تعبانة ؟ أشارت عزة بالنفى ، وزاد نحيبها ، وكانها تبكى كل مرارات وأحزان العمر ، تبكى يتمها وفقرها ، تبكى عشر سنوات أفنتها فى حب رجل أعطت له كل شئ وفى المقابل لم تجن سوى الجحود والخذلان والتحقير ، تبكى حظا عثرا أوقعها فى حب رجل مشغول بغيرها ، رجل من عشرتها الأولى له أدركت أنها لم ولن تدخل قلبه أبدا ، وأنها ستكون مجرد خادمة له ، لكنها أحبته وتعلقت بالأمل في دخول قلبه بهذا الحب .
اقتربت منها مديحة بود وقالت : أهدى يا عزة ، حرام عليكى نفسك وأولادك ، لو جرالك حاجة ما حدش هينفعك ولا ينفعهم ،
سلوى : سيبوها تهدى خالص ، وتتكلم براحتها.

لم تحافظ سميرة علي ثقة عبد الرحمن فيها ، أنشأت حسابا على الفيس بوك رغم انه حذرها من هذا البرنامج بالتحديد وكل برامج التواصل الاجتماعي ، حرصت على جعل البرنامج في الملفات المخفية ، لا تفتحه إلا عندما تكون وحدها. ولنيل ثقة عبد الرحمن أكثر لم تقم بعمل كلمة سر للموبايل ، تتركه لأولادها يلعبون عليه ، تتعمد فعل هذا في وجود عبد الرحمن .

بحثت سميرة عن حساب عمر على الفيس بوك حتى عثرت عليه ، ظلت تتابعه فى صمت .
نفس الشئ الذي سبق أن فعله عمر ، لكنه فشل فى العثور على حسابها ، لأنها اختارت اسما وهميا وليس اسمها الحقيقى ، حيث كان اسم حسابها أسيرة الماضى .
زميلة 1 : اللى بتعمليه ده خيانة على فكرة .
سميرة : أنا بأعمل إيه ؟
زميلة 1: جوزك عارف أنك عاملة حساب على الفيس بوك ؟
سميرة : لا طبعا ، ولو قلت له مش هيفهم وهيقول حرام ، وكانى جايبة الأصدقاء دول أوضة نومى مش فى عالم افتراصى .
زميلة 2 : معلش يا سميرة طالما ده تفكير جوزك يبقى كان لازم تحترميه وما تعمليش حساب على الفيس .
سميرة : أنا بأفك عن نفسي شوية وما بأعملش حاجة غلط ، وكل صديقاتى ستات وكل الصفحات اللي متابعاها دينية أو اجتماعية .
زميلة 1 : هى بتبتدى كدة ، شوية شوية هتلاقى نفسك بتدورى على حساب عمر ، والله أعلم هتعملى إيه بعد كدة .
سميرة : خلاص عمر انتهى بالنسبة لى .
زميلة 2 : انتى بتكدبي على نفسك والا علينا ؟ ده حتى اسم حسابك أسيرة الماضى .
سميرة : هو الماضى لازم يكون رجل ، أى حاجة حلوة فى الماضى .
زميلة 3 : خليكى فى الحاضر والمستقبل أحسن ، واوعي تلعبي بالنار يا سميرة .

انتظروا الحلقة القادمة بإذن الله